LUCIAPAQA IZQUIERDA KAQ CHAKINMI MANA ALLI. Pëtaqa wamra këkaptinmi, chakinta parälisis qorqan, tsë qeshyaqa alläpam muyakun. 16 watayoq këkaptinmi, patrönan kënö nirqan: “Mana cäsukuptiki y mamänikipa respëtunta faltaptikim Diosnintsik castigashurqunki”. Tsënö niyanqantaqa yarparëkanllaraqmi.

DÄMARISQA PEQANCHÖ JUK TUMOR KANQANTAM MUSYARIRQAN, peru papäninqa kënömi nirqan: “¿Imataraq rurarqunki ari? Itsachi alläpa mana allikunata rurarqunki, tsëchi Dios castiguëkäshunki”. Dämarisqa alläpam llakikurqan tsënö niyaptin.

Unëpita patsëmi nunakuna creiyashqa Diosnintsik castigamashqa qeshyanqantsikta. Usos y costumbres de las tierras bíblicas nishqan libruchömi nin, Jesus kawanqan witsampis “jutsata rurayanqampita o mëqan familiankunapis tsëta ruranqampita castigashqa kayanqanta”. Edad Media nishqan witsampis, “muyakoq qeshyakunawan Diosnintsik nunakunata castiganqantam creiyarqan”, tsëtam La medicina medieval y la peste nishqan libru willakun. Tsëqa, ¿qeshyatsirnin Dios castigaptinku sufriyarqan 1301-1400 watakunachö? O ¿cientïficukuna estudiayanqannöku tukï bacteriakunarëkur qeshyayarqan? Itsapis kënö tapukunki: “¿Diostsuraq nunakunata qeshyatsirnin castiguëkan?”. a

KËMAN PENSARI: Qeshyatsirnin y sufritsirnin unë witsan nunakunata Diosnintsik castiguëkaptinqa, ¿allitsuraq kanman karqan Tsurin Jesucristu qeshyëkaqkunata kachakätsinqanqa? Tsëta rurarninqa, Diospa contranchi këkanman karqan (Mateu 4:23, 24). Peru Jesusqa manam imëpis Diospa contran churakarqantsu. Teytampaqmi kënö nirqan: “Noqaqa pëta kushitsinqan kaqkunatam imëpis rurä” y “ruranäpaq mandamanqantanölla[m] llapantapis rurëkä” (Juan 8:29; 14:31).

Jehoväqa “alli kaqta y limpiu kaqta” ruraq kanqantam Bibliachöqa willakun (Deuteronomiu 32:4). Pensari, Diosnintsikqa manam jukpa culpanrëkurqa avionchö llapan këkaqkunata juk accidentiwan castiganmantsu. Diosta adoraq Abrahan jutiyoq nunapis Diosnintsik mana castigakunqantam musyarqan. Tsëmi Diosnintsikqa “alli ruraqta y mana alli ruraqta juntu” ushakätsinmantsu (Genesis 18:25). Jinamampis Bibliachömi kënö nin: “Diosqa manam mana allitaqa rurantsu” (Job 34:10-12).

Diosnintsikqa manam jutsata ruranqantsikpitatsu castigamarnintsik sufritsimantsik. Juk wisku nunawan tinkuyanqanchömi, Jesuspis qateqninkunata nirqan tsënö mana kanqanta. Qateqninkunaqa Jesustam kënö tapuyarqan: “Maestru, ¿pitaq jutsallakurqan kë nuna wisku yurinampaq, kikinku o teytankunaku?”. Jesusnam kënö contestarqan: “Manam ni kë nunatsu ni teytankunatsu jutsallakushqa” (Juan 9:1-3).

Diospaq mana allita pensayaptinchi Jesuspa qateqninkunaqa tsëta wiyarirnin alläpa espantashqa quedariyarqan. Tsë wisku nunata kachakätsirmi Jesusqa rikätsikurqan nunakunaqa pantashqa këkäyanqanta (Juan 9:6, 7). Diosnintsik mana sufritsimanqantsikta musyarirqa, alläpachi qeshyapäkoqkuna kushikuyan.

 Bibliam kënö nimantsik:

• “Mana allikunawanqa manam pipis Diosta pruëbaman churëta puëdintsu, ni pëpis manam pitapis mana allikunawanqa pruëbaman churantsu” (SANTIÄGU 1:13). Peru manam tsëllatsu Diosnintsikqa ichikllachönam ‘mana allikunata’ ushakäratsimunqa, tukïläya qeshyakunata, nanapäkïta y wanïtapis.

• Jesusqa “llapan sufrikaqkunata[m] kachakätsirqan” (MATEU 8:16). Nunakunata Jesus unë witsanchö kachakätsinqanqa qallananllaran. Diospa Gobiernunqa maskunatapis ruramunqam.

• Diosqa “nawinkunapitam llapan weqita pitsanqa, y wanïqa mananam masqa kanqanatsu, ni manam alläpa llakikï ni waqakï ni nanatsikï kanqanatsu. Unë kaq cösaskunaqa pasarishqanam” (REVELACION [APOCALIPSIS] 21:3-5).

Tsëqa ¿imanirtaq entëru patsachö tukïläya sufrimientukuna kan? Diosnintsik culpayoq mana këkaptinqa, ¿pitaq culpayoq? Unëpita patsëmi nunakunaqa tsëta musyëta munëkuyashqa. Qateqninchömi tsëpita yachakurinki.