PERU religionkuna juknölla kananta munaqkunaqa manam tsënötsu pensayan. Tsëmi juk kaq kënö nirqan: ‘Mä niyämë, ¿mëqan religiontaq llakipäkïta, Patsa limpiu kananta, posadatsikoq këta yachatsikuntsu?’

Rasunmi, catölicukuna, catölicupita rakikashqa religionkuna, hindükuna y musulmankuna höra höraqa juntakäyashqa waktsa këta ushakätsiyänampaq, nunapa derëchunta respetatsiyänampaq y kë Patsata rakchatäyanqanta y patsaman bombakunata pampayanqampita acuerdu mana kayanqanta rikätsikuyänampaq. Jina pensayanqankunapita parlayänampaq y acuerdu këman chäyänampaqmi juntakäyashqa. Y juntakäyanqanchömi vëlata tsaritsir, müsicata tocar y Diosman mañakur kayashqa.

¿Tsënö juntakäyanqanwan chikinakuyanqanta altsayanqatsuraq? ¿Tsënö juntakäyanqanrëkurtsuraq alli kawakïta Diosnintsik apamunqa?

Llapan religionkunata juntëta procuraq nunakunam gälakuyan, 76 nacionkunapita 200 religionkunata acuerduman chätsiyanqanta. Tsënöqa rurayan, llapan religionkuna imachöpis juknölla kayänanta munarmi, peru rurananqa sasam (ajam) kashqa. Tantiyarinapaq, tsë grüpupita wakin nunakunam niyan leykunata churarqa, tsë religionkunata mana piñatsiyänanrëkur alleq pensëkur-raq rurayanqanta. Tsëtaqa rurayarqan Dios palabrata churayanqanwan wakin kaqkuna mana acuerdu kayaptinmi. Tsëmi mana piñatsinakuyänampaq Dios palabrataqa tsë documentukunaman churayarqannatsu.

Peru Diospita mana parlëkäyaptinqa, ¿imapaqraq sirwinman religionyoq kayanqan? Tsëqa, ¿imachötaq jukläya kayan religionkunata juntëta munaq kaqwan yanapakoq kaq grüpu? Religionta juntëta munaq kaq grüpuqa manam religiontsu, sinöqa nunakunata juntakätsita munaq grüpullam.

Dalai Lama jutiyoq reqishqa nunam kënö nin: “Llapan religionkunam llakipäkïpita, perdonakïpita yachatsikuyan”. Jina kënömi nin: “Masqa precisan kawënintsikchö yanapamänantsik kaqta rurayanqanmi”.

Musyanqantsiknöpis, kuyakoq, llakipäkoq y perdonakoq këqa alläpam precisan. Tsëtam Jesuspis nirqan: “Imanomi munayanqui qamcunapaq  nuna mayiquicuna allita rurayänanta, tsenolla qamcunapis pecunapaq rurayë” (Mateu 7:12). ¿Peru tsëllataku rasumpa kaq religionqa ruranman? ¿Imataq allita rurayänampaq yanapakun?

Apostul Pablum nirqan pë kawanqan witsanchö mëtsikaq nunakuna Diosta alläpa sirwita munëkarpis, ‘Dios Yaya munanganta’ mana musyayanqanta, tsënöpa ‘quiquincunapa munayllancunata imaycatapis rurayta munayanqanta’ (Romänus 10:2, 3, NTCN). Dios pëkunapita imata shuyaranqanta mana musyayaptinmi, Diosta sirwita munayanqam ni markäkïninkunapis ni imapaq välirqantsu (Mateu 7:21-23).

Jesusmi kënö nirqan: “Cushicuyay runamajiquicunawan alli päsacuychö cawayta ashigcuna” (Mateu 5:9, NTCN). Jesusqa yachatsikunqannömi kawarqan, wanutsinakï mana kanampaq y alli pasakïchö llapan religionkuna kawakuyänampaqmi yachatsirqan (Mateu 26:52). Yachatsikunqanta wiyakoq kaqkunaqa kuyanakurninmi rasumpa cristiänu këman chäyarqan (Colosensis 3:14). Tsënö nirqa, ¿Jesusqa conformakurqan nunakuna shumaq pasakïchö kawayanqanllawanku? ¿Juk religionyoq nunakunamanku juntakarqan?

Fariseukunapa y Saduceukunapa pushaqninkunam Jesusta chikiyarqan y hasta wanutsita munayarqan. ¿Imatataq Jesus rurarqan? Discïpulunkunatam kënö nirqan: “¡Ama pecunata cäsuyëtsu! Fariseucunaqa wiscu cuentam cayan” (Mateu 15:14). Awmi, Jesusqa manam pëkunapa religionninkunaman juntakëta munarqantsu.

Tsëpita tiempuwannam Greciapa Corintu markanchö juk congregacion patsakärirqan, tsë markachöqa imëka costumbriyoq y imëka religionyoqmi kayarqan. ¿Cristiänukuna pëkunawan juntakäyarqanku? Manam. Tsëmi apostul Pabluqa tsë cristiänukunata nirqan: “Ama juc shonqunolla cayanquitsu Teyta Jesusman mana creyicoqcunawanqa. [. . .] Manam Teyta Jesucristuwan diablupis cäyinacuyantsu; tsenollam jina Diosman creyicoqcunapis mana creyicoqcunawan cäyinacuyantsu”. Tsëpitanam nirqan: “Tse mana alli rurenincunapita raquicacuriyë, ni llutancunata yatayëtsu” (2 Corintius 6:14, 15, 17).

Rikanqantsiknömi Bibliaqa consejamantsik wakin religionkunawan mana juntakänapaq. Tsëqa itsa tapukunki, “¿imanötaq rasumpa juknölla kawakïta tarishwan?” nir.

15 nacionkunam yanapanakurnin La Estación Espacial Internacional nishqanta rurëkur ciëluman mandayarqan. Tsëtaqa rurayarqan imanöpis rurayänampaq kaqchö llapankuna acuerdu karninmi, sinöqa manam puëdiyanmantsu karqan.

Peru kanan witsan religionkunata juntakätseq grüpukunaqa manam acuerdutsu kayan. Yanapanakïpaq, respëtupaq parlarnimpis manam mëqankunapis nunakunata rasumpa kaqtaqa yachatsiyantsu. Tsëmi portakïninkunachö ni creenciankunachöpis igualtsu kayan.

Bibliachömi këkan Diospa rasumpa kaq leyninkuna, tsëmi rasumpa kaq kawakïta tarinapaq yanapakun. Yachatsikunqanta cäsukoqkunaqa, yanapanakur jukllëllanö trabajëtam yachakuyashqa y manam juk religionkunata ni juk kasta nunakunata chikiyantsu. Tsënö kanampaq kaqtam Diosnintsikqa puntallapita kënö nir willakurqan: “Llapan markakunata[m] yachatsishaq juk alli kaq idiömallata parlayänampaq, llapankuna Jehoväpa jutinchö qayakuyänampaq, juknölla yanapanakur sirwiyänampaq”. Dios mandakunqanta cäsukuyanqanrëkurmi llapankuna juknölla kawëta puëdiyan (Sofonïas 3:9; Isaïas 2:2-4).

Jehoväpa testïgunkunam kushishqa invitariyäshunki reunionninkunaman y rasumpa y kushishqa juknölla kawakuyanqanta kikiki rikärinëkipaq (Salmu 133:1).