Röma nacionpa lädunchö këkaq waktsa markachömi yurikurqä y winarqä. Kawënïqa manam fäciltsu karqan. Manam mamänïta reqirqätsu y teytäwampis manam allitsu pasayaq kayä. Cällikunachö lluta kawakuyanqannömi kawakurqä.

Chunka watayoq këkarmi suwakur qallarqä, y 12 watayoq këkarnam wayïpita ëwakurqä. Teytäqa juk kutipitapis masmi puestuchö llawiranqäpita jorqamarqan. Imëpis nunakunawan plëtukïkaqllam kä y alläpa feyum geniüpis kaq. 14 watayoq këkarnam wayïpita ëwakurqä mana imëpis kutinäpaq. Cällikunachömi kawakoq kä y drögakunatam utilisaq kä. Paqasyäriptinnam cärrukunata kichëkur tsëchö punoq kä, y Patsa manaraq waraptinmi ëwakoq kä; tsëpitanam yakuta ashirirnin paqapäkureq kä.

Alläpa yachaq suwakoq këmanmi charqä. Imëkanöpam suwakoq kä, cällikunachö hasta jatun wayikunachöpis. Tsëkunata rurarmi reqishqa karqä, tsëmi mana allita ruraq grüpuchö kanäpaq invitayämarqan. Tsënöpam bancukunata suwëta yachakurqä. Alläpa mana alli geniuyoq kaptïmi, grüpöchöqa respetayämaq. Mëtapis ëwaq kä illapäwanmi, punoqpis kä jauna rurinman churarkurmi. Maqanakïta, suwakïta, jukwan jukwan pununakïta y mana allikunata parlëtam yachakurqä. Policïakunaqa ima ruranqäpitapis altantullam këkäyaq, tsëmi atska kuti tsariyämarqan. Atska watakunam cällichö kawarqä y carcelchö karqä.

Juk kutichö carcelpita yarqunqä witsanmi tiyä watukaq ëwarqä. Noqaqa manam musyarqätsu tiyäwan ishkan prïmükunaqa Jehoväpa testïgun kayanqanta. Pëkunam invitayämarqan reunionninkunaman y musyëta munarllam ëwarqa. Diospita Yachatsikuyänan wayiman chärirninqa,  qepallaman jamakïtam munarqä pï yëkamunqanta y yarqunqanta musyanäpaq. Tsëchöpis illapäwanmi këkarqä.

Tsë reunionqa kawënïtam chipyëpa cambiarirqan. Yarpämi kënö pensanqäta: “¡Juk munduchötsunchi këkä!”. Tsëchö llapan këkaqkunam yachanëpaq kayaq y asi asilla këkäyaq. Kanankamayaqmi yarpä Testïgukuna yachanëllapaq y rasumpa kuyakoq kayanqanta. ¡Kawënï imanö kanqampitaqa alläpa jukläyam karqan!

Testïgukunawan Bibliata estudianäpaqmi churakarqä. Estudiar avansanqämannömi cuentata qokurirqä kawënïta chipyëpa cambianäpaq kaqta. Precisaqpaqmi churarqä Proverbius 13:20 textu ninqanta: “Yachaqkunawan pureqqa yachaqmi tikranqa, peru upakunawan takukaqqa mana allimanmi ishkinqa”. Entiendirirqämi mana allita ruraq grüpöpita chipyëpa rakikänäpaq kaqta. Manam fäciltsu karqan, peru Jehoväpa yanapakïninwanqa lograrqämi.

Jina cuerpötapis limpiarqämi. Alli kallpachakur-ran cigärru shoqïta y drögatapis jaqirqä. Jatun aqtsätapis rutukurirqämi, arëtita utilisëtapis y mana alli parlëkunatapis jaqirirqämi. Tsëraqmi cuentata qokurirqä mana alli rurënïkunata dominëta puëdinqäta.

Manam imëpis gustamarqantsu leyi ni estudië, tsëmi fäciltsu karqan Bibliata estudianäpaqqa. Tsënö kaptimpis, ichikllapa ichikllapam Jehoväta kuyar qallëkurqä. Tsënö këkarmi cambiar qallëkurqä: mana alli ruranqäkunapitam shonqöchö nanatsikoq kä. Mana allim sientikoq kä y mana allikunata ruranqäpita Jehovä mana perdonamänapaq kaqtam pensaq kä. Tsënö sientikunqä höram, rey Davidta jatusaq jutsankunapita Jehovä perdonanqan willakïta leyeq kä, y tsëmi shoqamaq (2 Samuel 11:1–12:13).

Y manam fäciltsu karqan nunakunata wayinchö yachatsinäpaqqa (Mateu 28:19, 20). ¡Alläpam mantsakoq kä mana allita ruranqä nunakunawan tarinakïtaqa! Tsënö kaptimpis, ichikllapa ichikllapam mantsakïnïta vencirqä, y ciëluchö Teytantsik perdonakoq kanqampita nunakunata kushishqa yachatsir qallëkurqä.

Jehoväta reqinqäqa kawënïtam salvashqa. Unë amïgukunaqa cäsi llapanmi wanuyashqa o carcelchö këkäyan. Peru noqaqa kushishqam këkä y shamoq tiempuchö alläpa shumaq kawakïtam shuyarä. Yachakurqömi humildi y wiyakoq këta, jina mana alli geniuyoq kënïtapis dominarqömi. Kananqa kushishqam këkä juk shumaqllam Carmen jutiyoq warmiwan casakushqa kar. Ishkäkunam vecïnökunata yanapëkäyä Bibliapita yachakuyänampaq.

Kananqa manam suwakötsu qellëyoq kanäpaq. Höraqa bankukunachömi trabajä, peru manam suwakurtsu, sinöqa limpiapakurmi.