Punta kaq yachatsikïchö rikanqantsiknömi, Jesusqa llapan tiempunwan Diospa Gobiernumpita “alli willaquicunata” yachatsikoq (Lücas 8:1). Alläpa kallpachakurmi Israelpa llapan käru markankunapa, Diospa Gobiernumpita nunakunata yachatsirnin ëwarqan. Y Mateu, Marcus, Lücas y Juan librukunam willakun yachatsikunqankunapita, y tsëchömi Diospa Gobiernumpita willakun pachak kutipitapis mas. Tsë librukunachöqa Diospa Gobiernumpaq Jesus parlanqampitaqa wakinllam qellqarëkan (Juan 21:25).

¿Imanirtaq pëpaqqa alläpa precisarqan? Porqui tsë Gobiernupa mandakoqnin kanampaq Dios pëta akrashqa kaptinmi (Isaïas 9:6; Lücas 22:28-30). Peru Jesuspaqqa manam poderyoq y alabashqa këtsu mas precisarqan (Mateu 11:29; Marcus 10:17, 18). Juk mas precisaqrëkurmi Diospa Gobiernumpitaqa yachatsikurqan. Pëqa musyarqanmi y musyanmi Teytampaq y qateqninkunapaq tsë gobiernu allikunata ruramunampaq kaqta. *

Jesusqa llapan shonqunwanmi Teytanta kuyan (Proverbius 8:30; Juan 14:31). Teytan kuyakoq, llakipäkoq y alli ruraq kënintam alläpa kuyan (Deuteronomiu 32:4; Isaïas 49:15; 1 Juan 4:8). Tsëmi, Teytampaq ulikïkunata (llullakuykunata) niyanqanta alläpa chikin. Tantiyarinapaq, mëtsikaqmi niyan nunakunapa sufrimientukunata Dios cuentaman mana churanqanta o mas llakikïpaqqa pë culpayoq kanqanta. Tsëmi, Jesusqa alläpa kallpachakurqan Diospa Gobiernumpita “alli willaquicunata” yachatsikïchö, porqui tsë Gobiernun Teytampa jutinta limpiuyätsinqa (Mateu 4:23; 6:9, 10). ¿Imanöraq tsëta ruranqa?

Nunakunapaq allikunata apamurmi. Tsë Gobiernuwanmi Jehoväqa, ‘nawikunapita llapan weqikunata pitsarinqa’. Waqatsikïman chätsikoq llapan cösaskunatam ushakätsinqa, ‘mananam wanï, llakikï, qaparikï, ni nanatsikïpis kanqanatsu’ (Apocalipsis 21:3, 4, NM). Diospa Gobiernunchöqa nunakuna mananam sufriyanqanatsu. *

 Tsëmi, Jesusqa tsë Gobiernupita musyatsikïta munarqan, porqui tsë gobiernullam rikätsikunqa Teytan alläpa llakipäkoq y puëdeq kanqanta (Santiägu 5:11). Peru tsë Gobiernuqa manam Diosrëkurllatsu allita ruranqa, sinöqa Jesus kuyanqan qateqninkunapaqpis alläpa shumaq bendicionkunatam apamunqa.

Manaraq Patsaman shamurmi Jesusqa mëtsika watakunapa Teytanwan ciëluchö kawarqan. Y mana yupëtapis puëdipaq ciëluchö qoyllurkunata, galaxiakunata, hasta täranqantsik Patsata y tsëchö kawaqkunata kamarmi yanaparqan (Colosensis 1:15, 16). Peru tsë llapan kamayanqampitaqa, nunakunatam Jesusqa mas kuyarqan (Proverbius 8:31).

Nunakunata tsënö kuyanqanmi yanaparqan yachatsikunampaq. Qallanampita patsëmi nirqan Diospa Gobiernumpita “alli willaquita” wanaqkunata yachatsinampaq Patsaman shamunqanta (Lücas 4:18). Peru Jesusqa manam shimillapatsu yachatsikoq, sinöqa rurëninwanmi. Tantiyarinapaq, yachatsikunqanta wiyayänampaq nunakuna juntakäriyaptinmi, “allapa ancuparnin, cachacätserqan tsecho llapan qeshyaqcunata” (Mateu 14:14). Juk kutinam, alläpa feyu qeshyawan nuna kënö nirqan: “Munarnenqa, cachaquecatsillämë”. Jesusqa kuyakoq y llakipäkoq karninmi “munämi, cachacänequita” nir kachakäratsirqan (Lücas 5:12, 13). Amïgun Läzarupa panin Marïata waqaqta rikarninmi, Jesusqa ‘allapa llaquicur shonquncho nanatsicur waqarirqan’ (Juan 11:32-36). Tsëpitanam, chusku junaq wanushqa këkaptimpis Läzaruta kawariratsimurqan (Juan 11:38-44).

Jesusqa musyarqanmi tsë milagrukunaqa pasareqlla kanqanta. Tiempuwanqa tsë kachakätsinqan y kawaritsinqan nunakunaqa yapëmi qeshyayarqan y wanuyarqan. Jina musyarqanmi Diospa Gobiernun ruramunampaq kaqkunaqa mana ushakaq kanqanta. Tsëmi milagrukunallatatsu rurarqan, sinöqa Diospa Gobiernumpita “alli willaquicunata[m]” mas yachatsikurqan (Mateu 9:35). Tsë milagrukunaqa rikätsikurqan ichikllachöna Diospa Gobiernun ruramunampaq kaqtam. ¿Imataq pasakunqa? Respuestanqa Bibliachömi këkan.

•  Qeshyakunam ushakärinqa.

  “Tsë witsanqa wiskukunapa nawinkunapis kichakärinqam, y mana wiyëta puëdeqkunapa rinrinkunapis kichakärinqam. Luychunöran cöjukunapis eqikachäyanqa, y mana parlaqkunapis kushishqam qayëkachäyanqa shiminkuna pashtaptin”. Jina “manam ni pï ninqanatsu: ‘Qeshyämi’” (Isaïas 33:24; 35:5, 6).

• Wanïqa ushakärinqam.

  “Patsachöqa alli nunakunallam täräyanqa, y tsëchömi imëkamayaqpis kawayanqa.” (Salmu 37:29.)

  “[Diosqa] rasumpam wanïta chipyëpa ushakäratsinqa, y Llapan Autoridäyoq Señornintsik Jehovämi weqinkunata nawinkunapita pitsarapunqa.” (Isaïas 25:8.)

• Wanushqakunam kawariyämunqa.

  “Diospa yarpëninchö këkaq llapan wanushqakunam pëta wiyar yarqarayämunqa.” (Juan 5:28, 29, NM.)

  ‘Cawaritsimunqam.’ (Hëchus 24:15.)

• Llapankunapam wayinkuna y trabäjunkuna kayäpunqa.

  “Wayikunatam rurayanqa y tsëchömi yachayanqa; üvastam muruyanqa, y wayunqantam mikuyanqa. Manam juk yachanampaqtsu wayita rurayanqa; ni juk mikunampaqtsu muruyanqa. [...] Akrashqäkunaqa makinkunawan llapan rurayanqantam kikinkuna paqwë utilisäyanqa.” (Isaïas 65:21, 22.)

•  Mananam guërrakuna kanqanatsu.

  “[Diosqa] Patsapa juk kuchumpita hasta juknin kuchunyaqmi ushakätsimunqa guërrakunata.” (Salmu 46:9.)

  “Nacionpura mananam pelyayanqanatsu, ni wanutsinakïta mananam yachakuyanqanatsu.” (Isaïas 2:4.)

• Llapampaqmi mikï kanqa.

  “Patsaqa imëkatapis wayïkatsimunqam; Dios, Diosnintsikqa bendicimäshunmi.” (Salmu 67:6.)

  “Patsachöqa alläpa atska gränum kanqa, jirkakunapa puntanchöpis sobrakonqam.” (Salmu 72:16.)

• Waktsayëpis manam kanqanatsu.

  “Waktsaqa manam [...] qonqashqatsu kanqa.” (Salmu 9:18.)

  “Yanapananta ashir mañakoq waktsata, llakinashqata y yanapaqninnaqtapis pëqa salvanqam. Alläpam ankupanqa waktsata y humildi nunata, y waktsa nunakunapa almantam salvanqa.” (Salmu 72:12, 13.)

Kë änikïkunata yachakurirninqa, ¿entiendinkiku Diospa Gobiernumpita yachatsikï Jesuspaq imanir alläpa precisanqanta? Pëqa tsë Gobiernupitam llapan wiyëta munaqkunata yachatsirqan, porqui musyarqanmi problëmantsikkunata tsëlla ushakätsinampaq kaqta.

¿Gustashunkiku Diospa änikïninkuna? Tsënö kaptinqa, ¿imanötaq Diospa Gobiernumpita maslla yachakurita puëdinki? ¿Imatataq rurankiman tsë bendicionkunata chaskinëkipaq? Qateqnin kaq yachatsikïchömi respuestankunata tarinki.