Bibliapita tapukïkuna
¿Ushakanqatsuraq waktsa kë?
¿Imanöraq entëru Patsachö waktsayëta Dios ushakätsinqa? (Mateu 6:9, 10)
Cada watam waktsayërëkur millonyëpayan nunakuna mallaqëwan y qeshyawan wanuyan. Kapoqyoq nacionkuna kaptimpis, mëtsikaq nunakunapam imankunapis kantsu. Waktsa kë imëpis kanqantam Bibliaqa willamantsik. (Leyi Juan 12:8.)
Waktsayë ushakänampaqqa entëru Patsachö juk alli gobiernutam wanantsik, imëkatapis llapan nunakunata igualpa qonampaq. Jina tsë gobiernum waktsayë apamoq guërrakunata ushakätsinan. ¡Y tsënö gobiernutam Diosqa änikun! (Leyi Daniel 2:44.)
¿Piraq waktsayëta ushakätsita puëdinqa?
Entëru Patsachö nunakunata gobernanampaqmi, Diosqa Tsurin Jesucristuta akrashqa (Salmu 2:4-8). Jesusqa waktsakunatam yanapanqa, y wanutsinakïta y imëka mana allikunatam ushakätsinqa. (Leyi Salmu 72:8, 12-14.)
Jesucristuqa ‘Alli Pasakïchö Kawakïta Apamoq Principim’, pëqa yamë këta y següru kawakïtam patsätsimunqa. Tsënöpam llapan nunakuna Patsachö kushishqa kawakuyanqa, alli trabäjuyoqmi kayanqa y mikïninkunapis mëtsikam kanqa. (Leyi Isaïas 9:6, 7; 65:21-23.)
