QARANCHÖ YACHATSIKÏPITA | LLAPANTSIKMI ENTIENDITA PUËDINTSIK BIBLIATAQA
¿Bibliata leyi yanapakunku?
“Bibliaqa religionpaq parlaq alläpa reqishqa librum. Peru, China nacionchö costumbrikunapaqqa manam ni imata parlantsu.” (CHÏNAPITA, LIN)
“Hinduismu religionnïchö diospaq parlaq librukunatapis mana entiendïkarqa, ¿imanötaq entiendishaq Bibliataqa?” (INDIAPITA, AMIT)
“Unë libru kaptinmi Bibliataqa respetä y musyämi llapan librukunapitapis mas rantikushqa kanqanta. Peru manam imëpis rikashqätsuqa.” (JAPONPITA, YUMIKO)
Biblia ninqanta mana reqikar o ichikllata leyishqa karpis, entëru Patsachömi nunakunaqa respetayan. Masran Asiapa markankunachö millonyëpayan nunakunawan pasan, jina tsënöllam Bibliata reqiyanqan nacionkunachöpis.
“¿Imapaqraq Bibliata leyita munäman?” nir itsa tapukunki. Diospita shamushqa libru yachatsikunqanta musyanqëkiqa këkunachömi yanapashunki:
-
Kushishqa kawakïpaq
-
Familiachö problëmakunata altsanapaq
-
Yarpachakïkuna kaptin tsarakunapaq
-
Wakinkunawan shumaq kawakunapaq
-
Qellëta shumaq utilizänapaq
Tantiyarinapaq, Japonpita Yoshiku jutiyoq warmim, Biblia imata yachatsikunqanta musyëta munar, kikin leyita decidirirqan. ¿Imatataq yachakurqan? Pëmi nin: “Imarëkur kawanqäta musyanäpaq y shamoq tiempuchö alli kawakïta shuyaränäpaqmi yanapamashqa, y mananam japalläqa sientikünatsu”. Qallananchö parlanqantsik Amitpis leyitam decidirqan. Pëmi nin: “Leyinqäqa shonqümanmi chärirqan. Biblia willakunqanqa llapan nunatam yanapan”.
Bibliaqa millonyëpayan nunakunatam yanapashqa kawëninkunata altsayänampaq. ¿Imanirtaq qampis leyirinkitsu imanö yanapashunëkipaq kaqta musyarinëkipaq?
