Pïmëmi niyan ima color karpis o mëpita karpis igualpa tratanakur kawakuyqa ni imëpis mana kanampaq kaqta.

•   “Juk color kayanqampita y juk marka kayanqampita chikinakuyqa mëtsëchö, pïmëchö y imëkachömi rikakun. Tsërëkurmi mëtsëchöpis alli tratanakuyqa kantsu” (Antoniu Guterres, Naciönes Unïdaschö secretariu general).

 ¿Imëllapis manana chikinakur kawakushuntsuraq? ¿Ima nintan Bibliachö?

 Bibliachömi nin imëka color nunakunata Diosnintsik igualpa rikanqanta. Kënömi nin:

•   “Pëqa entëru patsachö kawayänampaqmi, juk nunallapita mëtsë nacionchö nunakunata rurashqa” (Hëchus 17:26).

•   “Kananmi rasumpa entiendï, Teyta Diosqa llapan nunatapis igualpa rikanqanta, më nacionpita kayaptimpis pëta respetaqkunata y allita ruraqkunataqa shumaq chaskinqanta” (Hëchus 10:34, 35).

 Bibliachöqa clärum nin llapantsikpis juk familialla kanqantsikta, y Diosnintsikqa ima color kashqapis y mëpita kashqapis igualpa rikämanqantsikta.

 Diospa Gobiernun gobernamuptinmi llapantsik igualpa rikänakur shumaq kawakushun. Tsë Gobiernuqa ciëlupitam gobernamunqa, y llapan nunakunatam yachatsinqa shumaq tratanakur kawakuyänampaq y chikikoq këta dejayänampaq. Bibliachömi kënö nin:

•   “Patsachö kawaqkunata qam juzgaptikiqa, tsëchö llapan kawaqkunam alli kaq rurëta yachakuyan” (Isaïas 26:9).

•   “Alli kaqta rurarmi yamëna kawakuyanqa. Awmi, alli kaqta rurayanqampitam imëpis tranquïlu y següruna kawayanqa” (Isaïas 32:17).

 Kanan tiempupis, Bibliata leyirmi mëtsika millon nunakunana yachakuyashqa nuna mayinkunata kuyëpa y shumaq respëtuwan tratëta.

•   Masllata yachakuyta munarqa, ¡Despertad! revistachö “¿Tiene cura el prejuicio?” neqta leyi.

•   Pïmëtapis igualpa rikäyänampaq wamrëkikunata yachatsita munarqa, “¿Cómo hablar con sus hijos sobre el racismo?” neqta leyi.