2 Timoteo 3:1-17
3 Shinapish caitami yachana cangui. Tucuri punllacunapica mana ahuantaipaj sinchi, llaqui punllacunami shamunga.
2 Chai punllacunapica gentecunaca paicunallataj cꞌuyarijcuna, cullquita yallitaj munajcuna, jatun tucushcacuna, valishca tucushcacuna, Diostapish gentecunatapish cꞌamijcuna, yaya mamata mana cazujcuna, mana pagui nijcuna, shujtajcunamanta caruyajcuna,*
3 familia ucupi cꞌuyaita mana ricuchijcuna, alli tucunata mana munajcuna, yangamanta juchachijcuna, mana jarcarijcuna, pꞌiña millaicuna, ima allitapish pꞌiñajcuna,
4 amigocunahuan contra tucujcuna, mana uyasha nijcuna, shujtajcunata yalli casha nijcuna, Diosta cꞌuyanapaj randica paicunapaj quiquin munaillata ruranata munajcuna,
5 ricuipica tucui shunguhuan Diosta adoracuj shinami cangacuna. Shinapish paicunapaj ruraicunahuanca mana chashna cashcatami ricuchingacuna. Paicunamanta caruyai.
6 Chashna shina gentecunapuramantami pandachij runacuna llujshin. Chai runacunaca yuyai illaj, juchasapa huarmicunapaj huasicunaman yaicushpami llullacunata nishpa pandachin. Chai huarmicunaca paicunapaj shungu munashcata rurajcunami can.
7 Paicunaca siempre yachacushpapish mana llullataca manataj alli intindi tucuncunachu.
8 Ima shinami Janes, Jambres nishca runacunaca Moisespaj contra tucurcacuna chashnallatajmi cai runacunaca mana llullapaj contra tucushpa catincuna. Paicunaca millai yuyaicunahuan jundami can. Crinatapish saquishcamantami Diosca paicunataca mana chasquin.
9 Chashnapish mana ñaupajman catingacunachu. Janes, Jambres nishca runacunahuan ima tucushca shinallatajmi paicunapish yuyai illajcuna cashcata tucuicuna cuentata cungacuna.
10 Ashtahuanpish canca ñuca yachachishcata, ñuca ima shina causashcata, ñuca causaipi imata munashcata, ñuca feta, ñuca pacienciata, ñuca cꞌuyaita, ñuca ahuantashcatami alli ricurashpa catishcangui.
11 Shinallataj Antioquía, Iconio, Listra llajtacunapi ñucata catirashpa llaquichishcata, llaquicunata ñuca ima shina apashcatapish yachanguimi. Shinapish cai tucui llaquicunamantaca* Amitomi quishpichirca.
12 Cristo Jesusta catijcuna shina Diosta tucui shunguhuan adorashpa causasha nijcunataca tucuicunatami catirashpa llaquichingacuna.
13 Shinapish millai, pandachij gentecunaca ashtahuan ashtahuanmi millai tucushpa catingacuna. Paicunaca gentecunatami pandachingacuna. Shujtajcunapishmi paicunataca pandachingacuna.
14 Ashtahuanpish canca, canman imata yachachishcapi catirai. Chaicunapi crichunmi cantaca ayudarcacuna. Picunalla canman yachachishcataca allimi yachangui.
15 Canca huacharishcamantapachami Dios quillcachishcacunataca yachangui. Cai quillcachishcacunami cantaca alli yachajta ruranga, Cristo Jesuspi feta charishcamantapish quishpichinga.
16 Dios quillcachishca shimica tucuimi Diosllataj yuyaita cushpa quillcachishca can. Chaimantami yachachingapaj, sinchita cunangapaj,* imatapish allichingapaj, allita rurana cashcata yachachingapajpish alli can.
17 Chashnami Diosta sirvij runaca tucuipaj allichirishca canga. Shinallataj tucui laya alli ruraicunata rurangapajmi alli prepararishca canga.
Notacuna
^ O “Diosmanta caruyajcuna”.
^ Griego rimaipica: “catirashpa llaquichishcamantaca” ninmi.
^ O “sinchita rimangapaj”.
