Hechos 12:1-25
12 Chai punllacunallapitajmi rey Herodesca* congregacionpi tandanacushca huauqui panicunamanta maijancunataca llaquichi callarirca.
2 Paica Juanpaj huauqui Santiagotami espadahuan huañuchirca.
3 Chaita ricushpami judiocunaca cushicurcacuna. Chaimantami Herodesca Pedrotapish japirca. (Levadura illaj tandata micuna fiesta punllacunapimi chashna tucurca).
4 Chashna japishpami paitaca carcelpi churarca. Pedrota turnashpa ricuchunca chuscu grupo soldadocunatami churarca. Cada grupopimi chuscu soldadocuna carca. Pascua fiesta pasashca huasha gentecunapaj ñaupajpi ricuchinata* yuyashpami chashna rurarca.
5 Pedro carcelpi huichcashca cajpica congregacionpi tandanacushca huauqui panicunaca paimantami tucui shunguhuan Diosta mañacurcacuna.
6 Cayandij punllami rey Herodesca gentecunapaj ñaupajpi Pedrotaca ricuchigrirca. Chai tutami Pedroca ishqui soldadocunapaj chaupipi, ishqui cadenacunahuan huatashca dormicurca. Cutin caishuj soldadocunaca cárcel pungupimi cuidashpa shayacurcacuna.
7 Chashna cajpipish Jehová* Diospaj angelmi ñapish ricurirca. Pedro maipi cashca ucutapish shuj luzmi achijyachirca. Chai angelca costillapi tuparishpami Pedrota rijchachishpaca: “¡Utca jatari!” nirca. Chashna nijpimi cadenacunaca Pedropaj maquicunamanta pascarishpa urmarca.
8 Shinallataj chai angelca: “Allichirishpa, cambaj pargateta churari” nircami. Chaimi Pedroca ángel nishcata rurarca. Chai qꞌuipami angelca: “Cambaj jahua churanata churarishpa ñucata cati” nirca.
9 Chashna nijpimi Pedroca angelta catishpa llujshirca. Chai ángel chashna ruracushcata ricushpapish mana cuentata curcachu. Ashtahuanpish muscuipi shina ricucushcallatami paica yuyarca.
10 Punta grupo soldadocunata, qꞌuipa grupo soldadocunatapish pasashpaca llajtaman apaj fierro pungumanmi chayarcacuna. Chai pungupish paicashca pascarijpimi paicunaca llujshishpa shuj ñanta catishpa rircacuna. Chashna ricushpami angelca Pedrota ñapish chaipi saquishpa chingarircalla.
11 Chaimi Pedroca ima tucucushcata cuentata cushpaca: “Cunanmi Herodespaj maquimantapish, judiocuna ñucata imata ruranamantapish quishpichingapaj Jehová* Dios paipaj angelta cachashcata alli yachani” nirca.
12 Chashna cuentata cushca qꞌuipami Pedroca Juanpaj mama Mariapaj huasiman rirca. Juantaca Marcos nishpapishmi rijsijcuna carca. Chai huasipimi Jesusta catijcunaca achcacuna tandanacushpa Diosta mañacurcacuna.
13 Calle punguta Pedro huajtajpimi Rode shuti sirvij huambraca pi cashcata ricunaman llujshirca.
14 Chai huambraca Pedropaj rimashcata rijsishpami achcata cushicurca. Chaimi punguta pascanapaj randica huasi ucuman callpashpa rishpaca Pedro canlla pungupi cashcata huillarca.
15 Chashna nijpimi paicunaca: “Locamari tucucungui” nircacuna. Shinapish paica cutin cutinmi mana llullacunichu, Pedromi shamushca nirca. Chaimi paicunaca shinashpaca: “Paipaj angelmi canga” nircacuna.
16 Chaicamaca Pedroca punguta huajtashpami canllapi shayacurca. Paicunaca punguta pascashpa, Pedrota ricushpaca mancharishcami saquirircacuna.
17 Paica maquihuan señasta rurashpa paicunata upallachishpami, Jehová* Dios carcelmanta paita ima shina llujshichishcata tucuita huillarca. Chai qꞌuipaca: “Caitaca Santiagomanpish, caishuj huauquicunamanpish huillanguichij” nircami. Chaita nishpaca chaimanta llujshishpami shujtaj ladoman rirca.
18 Ña pacarijpica Pedrohuan ima tucushcata mana yachashcamantami soldadocunaca paicunapura bullata rurai callarircacuna.
19 Chaimi Herodesca tucui ladocunapi Pedrotaca mashcarca. Shinapish paita mana japishpami carcelta cuidaj soldadocunata tapurca. Chashna tapushca qꞌuipami paicunata castigachun mandarca. Chai huashami Herodesca Judeamanta Cesarea llajtaman uriyashpa asha tiempota chaipi saquirirca.
20 Rey Herodesca Tiro, Sidón llajtacunapi causaj gentecunahuanmi pꞌiñarishca carca. Chai llajtapi causaj gentecunaca Herodes mandacuj llajtacunamantami micunataca randijcuna carca. Chaimantami shuj yuyailla tucushpa Herodeshuan alli tucushun nishpa paipajman rircacuna. Paicunata ayudachunca Herodespaj huasita cuidaj Blasto nishca runatami rogarcacuna. Chashnami paicunaca Herodeshuan alli tucungapaj parlanacurcacuna.
21 Shuj punllaca gentecuna tandanacushca cajpimi Herodesca mandangapaj sumaj churanata churarishpa, juzgana asientopi tiyarishpa chai gentecunapaj ñaupajpi rimai callarirca.
22 Chaimi chaipi caj tandanacushca gentecunaca: “¡Caica dios rimashcamari, mana runa rimashcachu!” nishpa caparircacuna.
23 Chai ratomi Jehová* Diospaj angelca Diosta mana jatunyachishcamanta Herodesmanca shuj ungüita cacharca. Chaimi paica cꞌurucuna micushca huañurca.
24 Shinapish Jehová* Diospaj shimitaca shujtaj ladocunapipishmi huillashpa catircacuna. Chaimantami Jesusta catijcunapish ashtahuan mirarircacuna.
25 Jerusalenpi causaj huauqui panicunata ayudangapaj cachashcata tucui cushca qꞌuipami Bernabepish, Saulopish Antioquía llajtaman tigrarcacuna. Paicunahuanca Juantapishmi pushashpa rircacuna. Juantaca Marcos nishpapishmi rijsijcuna carca.
Notacuna
^ Paica Herodes Agripa I nishcami can. “Herodes” shimita huasha diccionariopi ricui.
^ O “juzganata”.
^ “Jehová” shutita huasha diccionariopi ricui.
^ “Jehová” shutita huasha diccionariopi ricui.
^ “Jehová” shutita huasha diccionariopi ricui.
^ “Jehová” shutita huasha diccionariopi ricui.
^ “Jehová” shutita huasha diccionariopi ricui.
