Jueces 9:1-57
9 Tiempo qꞌuipaca Jerubaalpaj churi Abimelecca Siquem llajtapimi paipaj mamapaj turicunata ricunaman rirca. Chaiman chayashpaca paicunaman, paipaj mamapaj yayapaj tucui familiamanca cashnami nirca:
2 “Siquem llajtamanta tucui pushajcunamanca: ‘¿Imataj cancunapajca ashtahuan alli can: Jerubaalpaj 70 churicuna mandachun o shuj runalla cancunata mandachun? Yuyarichij, ñucaca cancunapaj familiallatajmi* cani’ nishpa huillapaichij” nircami.
3 Abimelecpaj mamapaj turicunaca Siquem llajtapi tiyaj tucui pushajcunamanmi chaita huillanaman rircacuna. Chai llajtapi pushajcunaca: “Paica ñucanchij huauquimi can” nishpami paicunapaj shungupica Abimelecta catinata yuyarircacuna.
4 Shinallataj Baal-Beritpaj templomantapish* 70 siclo cullquitami curcacuna. Chai cullquihuanca Abimelecca trabajo illaj saquirijcunata, pingai illaj runacunatami paita compañachun contratarca.
5 Chai qꞌuipaca paica Ofrá llajtapi paipaj yayapaj huasimanmi rirca. Chaipica paipaj 70 huauquicunatami shuj rumi jahuallapitaj huañuchirca. Jerubaalpaj último churi Jotanllami miticushcamanta causashpa catirca.
6 Qꞌuipaca Siquem llajtamanta tucui pushajcunapish, Bet-Milopi tucui causajcunapishmi jatun yura cꞌuchupi, Siquem llajtapi tiyaj pilar cꞌuchupi tandanacurcacuna. Chaipimi Abimelecta reyta rurarcacuna.
7 Chaita Jotanman huillajpimi paica chai rato Guerizim urcu jahua puntaman huichiyarca. Chaimantaca cashnami caparirca: “¡Siquem llajtamanta pushajcuna, ñucata uyaichij, Diospish cancunata uyangami!
8 Shuj cutinca yuracunami paicunata mandachun shuj reyta agllanaman rircacuna. Chai yuracunaca olivo yuramanca: ‘Can ñucanchijta mandachunmi munanchij’ nircacunami.
9 Pero olivo yuraca: ‘Shujtaj yuracunapaj jahuapi ñuca ramacunata cuyuchinaman ringapajca maitataj ñuca aceitetaca pꞌucunata saquishayari. Chai aceiteca Diostapish, gentecunatapish jatunyachingapajmari can’ nishpami cutichirca.
10 Chaimi yuracunaca higo yurataca: ‘Can shamushpa ñucanchijta mandai’ nircacuna.
11 Pero higo yuraca: ‘Shujtaj yuracunapaj jahuapi ñuca ramacunata cuyuchinaman ringapajca maitataj ñuca mishqui, alli frutota pꞌucunataca saquishayari’ nishpami cutichirca.
12 Qꞌuipaca chai yuracunaca uva yurataca: ‘Can shamushpa ñucanchijta mandai’ nishpami mañarcacuna.
13 Pero uva yuraca: ‘Shujtaj yuracunapaj jahuapi ñuca ramacunata cuyuchingapajca maitataj ñuca mushuj vinota pꞌucunata saquishayari. Chai vinoca Diostapish, runacunatapish cushichingapajmi can’ nishpami cutichirca.
14 Ultimopica tucui caishuj yuracunaca zarza* yurataca: ‘Can shamushpa ñucanchijta mandai’ nircacunami.
15 Chaimi zarza yuraca chai yuracunamanca: ‘Cancunata mandachun ñucata agllagrishpaca ñuca rama ucupi miticunaman shamuichij. Mana chashna cajpica ñucallamantataj nina llujshishpa Libanomanta cedro yuracunata tucuchichun’ nishpa cutichirca.
16 Cunanca caipi yuyaichij: cancunaca Abimelecta reyta rurashpaca, ¿shungumanta allita rurashcatachu yuyanguichij? ¿Jerubaalmanpish, paipaj familiamanpish cꞌuyaita ricuchishcatachu yuyanguichij? ¿Pai imallata rurashcamantaca respetashcatachu yuyanguichij?
17 Ñuca yayaca cancunamanta macanacushpaca paipaj causaita* chingachina cashpapish madianitacunapaj maquimantami cancunataca quishpichirca.
18 Pero cunanca ñuca yayapaj familiapaj contrami cancunaca jatarishcanguichij. Chashnami paipaj 70 churicunata shuj rumi jahuallapitaj huañuchishcanguichij. Shinallataj paipaj esclavapaj churi Abimelectaca cancunapaj huauqui cashcallamantami Siquem llajtapaj reyta rurashcanguichij.
19 Cunan Jerubaalpajpish, paipaj familiapajpish shungumanta allita ruracushpaca Abimelecmanta cushicuichij, paipish cancunamanta cushicuchun.
20 Mana chashna cajpica Abimelecmanta nina llujshishpa Siquem llajtamanta pushajcunatapish, Bet-Milopi causajcunatapish tucuchichun. Shinallataj Siquem llajtamanta pushajcunamantapish, Bet-Milopi causajcunamantapish nina llujshishpa Abimelecta tucuchichun” nircami.
21 Chaimantaca Jotanca miticushpami Beer lugarman rirca. Paipaj huauqui Abimelecta manchashcamantami chaipi causangapaj saquirirca.
22 Abimelecca israelitacunataca quimsa huatacunatami mandarca.
23 Chaimi Diosca Abimelectapish, Siquem llajtamanta pushajcunatapish paicunapura pꞌiñanacuchun saquirca.* Paicunaca Abimelectaca traicionarcacunami.
24 Jerubaalpaj 70 churicunata llaquinaita huañuchishcamantami Diosca chashna tucuchun saquirca. Chaica yahuarta jichashcamanta culpata charijcuna pagachunmi chashna tucurca. Abimélec paipaj huauquicunata huañuchishcamanta, Siquem llajtamanta pushajcunapish huañuchishpa ayudashcamantami paicunaca culpayuj tucurcacuna.
25 Chaimantami Siquem llajtamanta pushajcunaca Abimelecta llaquichingapaj urcu punta jahuapi cꞌaricunata pacalla chapachun churarcacuna. Cai cꞌaricunaca paicunamanta cꞌuchulla ñanta tucui pasajcunatami shuhuajcuna carca. Qꞌuipaca ima tucucushcataca Abimelecmanmi huillarcacuna.
26 Chai punllacunapica Ebedpaj churi Gaalpish, paipaj huauquicunapishmi Siquem llajtaman chayashpa chai llajtaman yaicurcacuna. Siquem llajtata pushajcunaca paipimi confiarcacuna.
27 Siquem llajtamanta runacunaca uva chagrapi uvacunata tandashpami sarurcacuna. Shinallataj shuj fiestatami rurarcacuna. Qꞌuipaca paicunapaj diospaj temploman yaicushpami chaipi micushpa, ubyashpa, Abimelectapish maldicircacuna.
28 Ébed runapaj churi Gaalca cashnami nirca: “¿Abimelecca pitaj can? ¿Siquempish* pitaj can paita sirvingapaj? ¿Manachu Abimelecca Jerubaalpaj churi can? ¿Manachu Zebulca paipaj randi parlaj can? ¡Chaipaj randica Hamor runapaj churicunata sirvishunchij! Hamor runaca Siquempaj yayami can. Pero ¿imamantataj Abimelectaca sirvishunyari?
29 Ñuca cai pueblota mandacushpaca Abimelectaca mandanamantami llujshichiman” nircami. Chashnami Abimelectaca: “¡Cambaj soldadocunata ashtahuan mirachishpa macanacunaman llujshi!” nishpa burlarirca.
30 Ebedpaj churi Gaal ima nishcata uyashpami chai llajtata mandaj Zebulca yallitaj pꞌiñarirca.
31 Chaimantami Abimelecpajman pacalla huillajcunata cachashpaca cashna nirca: “Ricui, Ébed runapaj churi Gaalpish, paipaj huauquicunapish Siquem llajtapimi can. Paicunaca chai llajtapi caj tucui gentecunatami cambaj contra jatarichun churacuncuna.
32 Chaimanta canpish, cambaj cꞌaricunapish tutata shamuichij. Shinallataj campopi chapashpa saquirichij.
33 Cayandij tutamanta inti llujshijpica utca rishpa chai llajtata llaquichinguichij. Gaal runa paipaj cꞌaricunahuan cambaj contra macanacunaman llujshijpica paicunata mishangapaj tucui can pudishcata rurai” nircami.
34 Chaimi Abimelecpish, paihuan caj tucui gentecunapish tutata llujshircacuna. Shinallataj paicunaca chuscu grupocunapi chaupinacushpami Siquem llajta canlla ladopi chapai callarircacuna.
35 Ebedpaj churi Gaal llujshishpaca chai llajtapaj pungu yaicunpimi shayarirca. Chaimi Abimelecpish, paihuan caj gentecunapish llaquichingapaj pacalla miticushcamanta llujshircacuna.
36 Gaal runa chaita ricushpaca Zebul runamanca: “¡Ricui! Urcu puntamantaca gentecunami uriyamucun” nircami. Pero Zebulca: “Canca urcucunapaj llandutami ricucungui. Canca chai urcupaj llandutami, gentecunami can yuyashpa pandaricungui” nircami.
37 Qꞌuipamanca Gaal runaca: “¡Ricui! Chai llajta chaupipi tiyaj urcumantami gentecunaca uriyamucun. Cutin shujtaj grupo gentecunaca Meonenim lugarpi tiyaj jatun yura tiyan ñantami cꞌuchuyamucuncuna” nircami.
38 Chaimi Zebulca: “¿Can jatun tucusha nishcaca maipitaj canyari? Canca ‘¿Ñucanchij paita sirvingapajca Abimelecca pitaj canyari?’ nircanguimi. ¿Manachu cai gentecunaca can yangapi churashcacuna can? Cunanca llujshishpa paicunapaj contra macanacui” nishpa cutichirca.
39 Chashna nijpimi Gaal runaca Siquem llajtamanta pushajcunapaj ñaupajpi Abimelecpaj contra macanacunaman llujshirca.
40 Abimelecca Gaal runatami catishpa rirca. Chaimi paica miticushpa rirca. Chaipica achca gentecunatami huañuchircacuna. Huañushcacunapaj cuerpoca chai llajtapaj pungu yaicunacamami carca.
41 Abimelecca Arumá llajtapimi causashpa catirca. Pero Zebulca Siquem llajtamantami Gaal runata, paipaj huauquicunatapish llujshichishpa cacharca.
42 Cayandij punllaca gentecunaca campomanmi llujshirca. Chaitami Abimelecca yachaj chayarca.
43 Chaimi Abimelecca paipaj cꞌaricunataca quimsa grupocunapi chaupishpa chai llajtapaj canlla ladopi chapashpa saquirirca. Chai llajtapi causaj gentecuna llujshijta ricushpaca Abimelecca paicunahuan macanacushpami huañuchirca.
44 Abimelecpish, paihuan caj grupocunapish chai llajtapi caj gentecunahuan macanacungapajmi chai llajtapaj pungu yaicunapi shayarircacuna. Cutin caishuj ishqui grupocunaca campopi caj gentecunatami llaquichishpa huañuchircacuna.
45 Abimelecca tucui punlla chai llajtapaj contra macanacushpami chai llajtata mishashpa japirca. Chai llajtapi causaj gentecunataca huañuchishpami qꞌuipaca chai llajtata tucuchirca. Shinallataj cachitami chai llajtapi tsiraparca.*
46 Siquem llajta torrepi caj tucui pushajcuna chaita yachaj chayashpaca utcami El-Beritpaj* templopi tiyaj cuartopi miticunaman rircacuna.
47 Siquem llajta torrepi caj tucui pushajcuna miticuna cuartopi tandanacushca cashcata Abimelecman huillajpica
48 paipish, tucui paihuan caj runacunapish Zalmón urcumanmi huichiyarcacuna. Abimelecca shuj hachata japishpami shuj ramata pꞌitirca. Chaita pꞌitishpami paipaj rigra jahuapi churashpa paihuan cajcunataca: “¡Rato! ¡Ñuca imatami rurarcani, chashnallataj cancunapish ruraichij!” nirca.
49 Chashnami paihuan caj runacunaca ramacunata pꞌitishpa Abimelecta catircacuna. Ramacunataca miticuna cuarto muyundijpi churashpami ninata japichircacuna. Siquem llajta torrepi caj tucui gentecunami huañurcacuna. Paicunamantaca casi 1.000 cꞌaricuna, huarmicunapishmi carcacuna.
50 Chai qꞌuipaca Abimelecca Tebez llajtamanmi rirca. Chai llajtapaj contra macanacushpami chai llajtata mishashpa japirca.
51 Tebez llajta chaupipica shuj sinchi torremi tiyarca. Chaipimi tucui cꞌaricunapish, huarmicunapish, chai llajtapaj tucui pushajcunapish miticunaman rircacuna. Paicunaca chai ucupi huichcarishpami chai torre jahua puntaman huichiyarcacuna.
52 Abimelecca chai torreta tucuchingapajmi chaiman cꞌuchuyarca. Chai torre yaicunman cꞌuchuyashpa ninata japichigrijpica
53 jahuamantami shuj huarmi cutana rumita* Abimelecpaj umapi urmachirca. Chai rumica Abimelecpaj umatami chaupirca.
54 Chaimi paica chai rato paipaj macanacunacunata apashpa ayudaj runataca: “Ñucataca shuj huarmimi huañuchishca nishpa ni pi ama nichunca cambaj espadata surcushpa ñucata huañuchi” nirca. Chashna nijpimi paita ayudaj runaca espadata llujshichishpa Abimelecta huañuchirca.
55 Israelmanta runacunaca Abimélec huañushcata ricushpaca paicunapaj huasicunamanmi tigrarcacuna.
56 Chashnami Diosca Abimelectaca paipaj juchamanta pagachirca. Paipaj 70 huauquicunata huañuchishpa paipaj yayapaj contra mana allita rurashcamantami chashna rurarca.
57 Siquem llajtamanta cꞌaricuna tucui mana allicunata rurashcamantami Diosca paicunapish llaquicunata charichun saquirca. Chashnami Jerubaalpaj churi Jotán maldicishcaca paicunapi pajtarirca.
Notacuna
^ Hebreo rimaipica: “cancunapaj tullu, cancunapaj aichallatajmi” ninmi.
^ O “adorana huasimantapish”.
^ O “casha”.
^ O “almata”.
^ Hebreo rimaipica: “shuj mana alli espirituta cacharca” ninmi.
^ Siquem nishpaca Zebulmantami parlacuj yuyachin. Paica Siquem llajtapaj mandajmi carca.
^ O “chiraparca”. Hebreo rimaipica: “tarpurca” ninmi.
^ “El-Berit” shutitaca Baal-Berit nishpapishmi rijsincuna.
^ Caica maquihuan cutana molinopaj jahua lado rumimi can.
