Marcos 6:1-56
6 Chaimanta rishpaca Jesusca paipaj llajtamanmi chayarca. Paita catijcunapishmi paihuan rirca.
2 Sábado punlla cajpimi Jesusca sinagogapi* yachachi callarirca. Chaita uyashpami achcacunaca mancharinacushpa cashna nircacuna: “¿Cai runaca maipitaj cai tucuitaca yacharcari? ¿Alli yachaitaca pitaj paimanca cushcari? ¿Milagrocunata rurangapaj podertapish pitaj cushcari?
3 ¿Paica manachu carpinterolla? ¿Manachu paipaj mamaca María can? ¿Paipaj huauquicunapish manachu Santiago, José, Judas, Simón shuticuna can? ¿Paipaj panicunapish manachu ñucanchij llajtapi causancuna?” nircacunami. Chaimantami Jesuspica mana crircacuna.
4 Chaimi Jesusca: “Shuj profetataca tucui ladocunapimi alli nincuna. Shinapish quiquin llajtapi, quiquin familiapi, quiquin huasipica mana alli nincunachu” nirca.
5 Chaimantami huaquin ungushcacunallata paicunapaj jahuapi maquita churashpa Jesusca jambirca. Shujtaj milagrocunataca chaipica mana rurarcachu.
6 Paicuna feta mana charishcata ricushpami Jesusca mancharishca saquirirca. Shinallataj cꞌuchulla llajtacunata rishpami paica yachachishpa purirca.
7 Jesusca 12 apostolcunata tandachishpami ishqui ishqui huillanaman cacharca. Millai espiritucunata llujshichichunpishmi paicunamanca poderta curca.
8 Paicunata cachashpaca: “Viajepajca ama imata apanguichij, tauna caspillata apanguichij. Tandatapish, micunata apana bolsatapish,* chumbillirinapi cullquitapish* ama apanguichij” nishpami mandarca.
9 Shinallataj Jesusca: “Churashca pargatellahuan ringuichij, shujtaj churanatapish ama apanguichijchu” nircami.
10 Jesusca cashnapishmi nirca: “Maijan huasiman yaicushpaca, chai llajtamanta rina horascama chaipi saquiringuichij.
11 Ashtahuanpish maijan ladopi cancunata mana chasquishun nijpi, mana uyashun nijpica cancunapaj chaquicunamanta ñutu allpata chaspirishpa chaimanta llujshishpa ringuichijlla. Chashnami paicunaca mana allita rurashcata yachangacuna” nircami.
12 Paicuna chaimanta rishpaca arrepintirinami canguichij nishpami gentecunaman huillarcacuna.
13 Achca demoniocunatapishmi* llujshichircacuna. Ungüihuan caj achca gentecunatapishmi aceitehuan llihuishpa alliyachircacuna.
14 Jesús imalla rurashcataca tucui gentecunami yachaj chayarcacuna. Rey Herodespishmi* chaitaca yachaj chayarca. Gentecunaca: “Bautizaj Juanmi huañushcacunapaj chaupimanta causarishca. Chaimantami paica chashna milagrocunataca ruracun” nircacunami.
15 Ashtahuanpish maijancunaca: “Eliasmi can” nircacunami. Cutin shujtajcunaca: “Paica ñaupa profetacuna shinallataj shuj profetami can” nircacunami.
16 Jesusmanta chashna parlashcata uyashpami Herodesca: “Juantaca ñuca mandajpimi paipaj umata pꞌitircacuna. Paimari causarishca” nirca.
17 Herodías huarmi mandajpimi Herodesca Juanta japishpa, cadenahuan huatashpa carcelpi churashca carca. Herodiasca, Herodespaj huauqui Filipopaj huarmimi carca.
18 Juanca cutin cutinmi Herodestaca: “Leypi nishca shinaca cambaj huauquipaj huarmita, cambaj huarmita shina charinaca mana allichu” nicushca carca.
19 Chaimantami Herodiasca Juanta pꞌiñashpa huañuchisha nirca. Shinapish chaitaca mana rurai tucurcachu.
20 Juanca cashcata ruraj, Diospaj munaillata rurashpa causajmi carca. Chaimantami Juanta llaquichinata manchashpa Herodesca paita cuidaj carca. Juan huillashcata uyashpaca cushillami sintirij carca. Shinapish paihuan imata ruranataca mana yacharcachu.
21 Herodías shuyacushca punllaca chayarcatajmi. Herodesca paipaj cumpleaños punlla cashcamantami shuj jatun micuita rurarca. Chai micuimanca autoridadcunata, 1.000 soldadocunata mandajcunata, Galileamanta importante gentecunatapishmi invitarca.
22 Chaipimi Herodiaspaj ushushica tucuicuna micucun ñaupajpi bailarca. Chashna bailajta ricushpami Herodespish, paihuan cajcunapish achcata cushicurcacuna. Chaimi Herodesca chai solterataca: “Can ima munashcata mañailla. Ñucaca cushallami” nirca.
23 Shinallataj: “Imata mañajpipish cushallami. Ñuca mandacushcamanta chaupita mañajpipish canmanca cushallami” nishpami jurarca.
24 Chashna nijpimi chai solteraca chaimanta llujshishpa paipaj mamataca: “¿Imatataj mañasha?” nishpa tapurca. Chaimi paipaj mamaca: “Bautizaj Juanpaj umata mañai” nirca.
25 Shina nijta uyashcahuanmi chai solteraca Herodespajman callpashpa rishpaca: “Bautizaj Juanpaj umata shuj bandejapi ñucaman cai rato cuhuai” nishpa mañarca.
26 Chaita uyashpami Herodesca achcata llaquirirca. Shinapish invitashcacunapaj* ñaupajpi jurashcamantami soltera mañashcataca cushatajmi nirca.
27 Chaimi Herodesca chai rato Juanpaj umata pꞌitimuchun shuj soldadota cacharca. Shina mandajpimi chai soldadoca cárcel ucullapitaj Juanpaj umata pꞌitimurca.
28 Chashnami shuj bandejapi Juanpaj umata apamushpa chai solteraman curca. Cutin chai solteraca paipaj mamamanmi curca.
29 Juanta catijcuna chaita yachaj chayashpami paipaj cuerpota apanaman shamurcacuna. Chashna apashpami pambarcacuna.
30 Apostolcuna tigramushpaca imallata rurashcata, imallata yachachishcatapishmi Jesusman tucuita huillarcacuna.
31 Achca gentecuna shamucujpi, tigracujpimi paicunaca micungapajllapish tiempota mana charircacuna. Chaimi Jesusca paicunataca: “Ñucahuan jacuchij. Pi mana causan chulunlla ladopi ashata samaringuichij” nirca.
32 Chaimantami paicunalla cangapaj chulunlla ladoman barcopi rircacuna.
33 Paicuna rijtaca achca gentecunami ricurca. Shinallataj shujtajcunapishmi chaitaca yachaj chayarcacuna. Chaimi tucui llajtacunamanta gentecunaca chaquillahuan utca rishpa, paicunata ñaupashpa chayarcacuna.
34 Jesús barcomanta uriyashpaca michij illajlla ovejacuna shina achca gentecuna chaipi cajta ricushpami paicunamantaca yallitaj llaquirirca. Chaimantami paicunamanca achca yachanacunata yachachi callarirca.
35 Ña chishiyajpimi Jesusta catijcuna paipajman cꞌuchuyashpaca: “Caipica shitashcamari. Ñami chishiyashca.
36 Chaimanta gentecunataca campocunapi, cꞌuchulla uchilla pueblocunapi micunata randigrichun cachai” nircacuna.
37 Chashna nijpimi Jesusca: “Cancuna imallatapish caraichij” nirca. Chaimi paicunaca: “¿Paicunaman carangapajca 200 denario* cullquihuanchu tandata randigrichun ningui?” nishpa tapurcacuna.
38 Chaimi Jesusca: “¿Mashna tandatataj charinguichij? Ricunaman richij” nirca. Mashna tiyashcata ricushpaca: “Pichca tandata, ishqui pescadollatamari charinchij” nircacunami.
39 Chai qꞌuipaca chaipi cajcunataca verdijlla qꞌuihua jahuapi asha asha tandanacushpa tiyarichunmi mandarca.
40 Shina mandajpimi 100 gentecunapura, 50 gentecunapura tandanacushpa tiyarircacuna.
41 Chai qꞌuipami Jesusca pichca tandata, ishqui pescadota japishpa jahua pachata ricushpa Diosta mañarca. Chai huashaca tandata chaupishpami paita catijcunaman curca. Paicunami chaipi cajcunamanca cararcacuna. Ishqui pescadotapish chashnallatajmi tucuicunaman cararca.
42 Chashnami tucuicuna huijsa pajtata micushpa cushilla sintirircacuna.
43 Chai qꞌuipaca Jesusta catijcunaca sobrashca tandataca 12 canastacuna jundatami tandarcacuna. Sobrashca pescadocunatapishmi tandarcacuna.
44 Chai tandacunata tucui micujcunaca 5.000 cꞌaricunami carca.
45 Jesusca chai qꞌuipallami paita catijcunataca barcoman huichiyashpa, mama cucha caishuj lado Betsaida llajtaman ñaupashpa richun mandarca. Ashtahuanpish paica chaipi caj gentecunata minchacama ningapajmi saquirirca.
46 Gentecunata minchacama nishca huashaca Jesusca urcupimi Diosta mañanaman rirca.
47 Ña tutayajpica barcoca mama cucha chaupipimi carca. Cutin Jesusca paillami urcupi carca.
48 Sinchi huaira jatarijpimi Jesusta catijcunaca barcota mana purichi valicurcacuna. Chaita ricushpami Jesusca ña pacarimugrijpica* mama cucha yacu jahuata purishpa paicunapajman cꞌuchuyarca. Ashtahuanpish paicunapaj ladota pasashpa rinatami Jesusca yuyarca.
49 Mama cucha yacu jahuata puricujta ricushpami paita catijcunaca: “¡Chaitaca imataj shamucunyari!”* nishpa caparirircacuna.
50 Chaita ricushpaca tucuicunami mancharircacuna. Chashna mancharinacujpimi Jesusca chai rato paicunataca: “Ñucami cani. Ama manchaichijchu” nirca.
51 Shina nishca qꞌuipami Jesusca barcoman huichiyarca. Pai barcoman huichiyajpica huairaca casijllami tucurca. Chaita ricushpami paicunaca achcata mancharircacuna.
52 Tandacunahuan Jesús imata rurajta ricushpapish paicunaca chai milagro ima nisha nishcataca mana intindircacunachu. Paicunapaj shungu rumiyashca shina cashcamantami mana tucuita intindircacuna.
53 Mama cucha caishuj ladoman rishpaca Genesaret llajtamanmi chayarcacuna. Chaipimi barcotaca shayachircacuna.
54 Paicuna barcomanta uriyancami gentecunaca Jesús cashcata cuentata curcacuna.
55 Chaimi gentecunaca chai muyundij llajtacunapi utca huillanaman rircacuna. Jesús maipi cashcata huillajpimi ungushcacunata camillacunapi huandushpa paipajman aparcacuna.
56 Mai uchilla puebloman, mai llajtaman, mai campoman Jesús yaicujpica plazacunapimi ungushcacunata churajcuna carca. Paicunaca, cambaj jahua churana puntallapipish tuparichun saquihuai nishpami Jesustaca rogarcacuna. Jesuspaj jahua churana puntapi tuparijcunaca tucuicunami alliyarcacuna.
Notacuna
^ O “tandanacuna huasipi”.
^ Ñaupa punllacunapica viajangapajca carahuan rurashca bolsacunapimi micunata, churanata, shujtaj minishtirishca cosascunatapish apajcuna carca.
^ Griego rimaipica: “cobre” ninmi.
^ O “supaicunatapishmi”.
^ Paica Herodes Antipas nishcami can. “Herodes” shimita huasha diccionariopi ricui.
^ O “mesapi tiyacujcunapaj”.
^ “Denario” shimita huasha diccionariopi ricui.
^ Griego rimaipica: “cuarta vigilia” ninmi. Jesuspaj tiempopica cai cuarta vigilia nishcaca más o menos tres de la mañanamanta seis de la mañanacamami carca.
^ O “Shuj muscui shinamari”.
