“Huambraraj cashpa cazarashca quiquin huarmillahuan cushicungui” ninmi Jehová Diosca (Proverbios 5:​18). Quiquin huarmillahuan, quiquin cusallahuan cushilla causashpaca, ashtahuanmi cꞌuyanacunguichij.

Cunan punllacunapica gentecunaca ña mana quiquin huarmillapi, quiquin cusallapi yuyanchu. Chaimantami cusa huarmica cai catij ishqui consejocunata pajtachina can.

BIBLIACA CAITAMI YACHACHIN: ‘Imapish alli cajllata agllaichij’ (Filipenses 1:10). Cusandij huarmindij tandalla causanami alli can. Chaimantami cusa o huarmi valishca cashcata ricuchina canguichij.

Jehová Diosca quiquin huarmillapi, quiquin cusallapi yuyachunmi munan. Ishquindij sumajta causachunmi munan (Eclesiastés 9:​9). Huarmitapish, cusatapish ama maipishcachun charichunmi mandan. Ashtahuanpish imata rurashpapish huarmita, cusata cushichichunmi mandan (1 Corintios 10:24). Ishquindijmantami minishtirishcata, cꞌuyanacushcata ricuchina can.

CAITA RURAI:

• Huarmillahuan, cusallahuan cangapaj tiempota surcui

• Imata ruragricushpaca quiquinllapi yuyanapaj randica ishquindijpi yuyai

BIBLIACA CAITAMI YACHACHIN: “Maijanpish shujtaj huarmita ricushpa munajca, paipaj shungupi ñami chai huarmihuan huainayan” (Mateo 5:28). Shujtajhuan chayarinata yuyanapish cusata o huarmita saquicuj shinami can.

Jehová Diosca shunguta cuidachunmi mandan (Proverbios 4:​23; Jeremías 17:​9). Chaimantami ima ricunata alli agllana cangui (Mateo 5:​29, 30). Job runa shinami canpish shujtaj huarmita ama munashpa ricungapaj cambaj ñahuihuan ari ninacuna cangui (Job 31:​1). Shinallataj ima mapata ruracuj lluchullacunatapish mana ricunachu cangui. Shujtaj huarmita, shujtaj cꞌarita mana cꞌuyai callarinachu cangui.

CAITA RURAI:

• Cambaj huarmi, cambaj cusa valishca cashcata shujtajcunaman ricuchi

• Shujtaj huarmihuan o cꞌarihuan yalli tandanacushcamanta cambaj huarmi o cusa mana alli sintirijpica paicunamanta caruyanami cangui