1-3. a) Estebanca ima llaquitataj charirca? b) ¿Chai llaquitaca ima shinataj chꞌimbapurarca? c) ¿Ima tapuicunatataj cutichishun?

 ESTEBANCA tribunalpaj ñaupajpimi shayarishca carca. Jerusalenpi Diospaj huasi cꞌuchullapimi chai jatun tribunalca cashcanga. Estebanpaj muyundijpica 71 mandaj juezcunami carca. Sacerdotecunata jatun mandaj Caifasmi chai juiciota rurangapaj mandaj juezcunata tandachirca. Paicunaca Estebantaca mana llaquij cashcatami ricuchircacuna. Caifasca huaquin quillacuna huashallami Jesuspaj juiciota pushashpa Jesusta huañuchichunmi mandarca. ¿Estebanca chaipi mancharishcangachu?

² Estebanca mandaj juezcunapaj ñaupajpi cashpapish manchaitaca mana charircachu. Mandaj juezcunapish chaitami cuentata curcacuna. “Estebanta ricushpaca paipaj ñahui shuj angelpaj ñahui shina cajtami ricurcacuna” (Hech. 6:15). Estebanca Jehová Diospaj angelcuna shina mana manchaj, tranquilo cashcatami ricuchirca. Paita pꞌiñajcunapish chaillatatajmi ricurcacuna. ¿Imamantataj Estebanca tranquilo carca?

³ Esteban imamanta mana manchaj cashcata ricushpami achcata yachai tucunchij. Puntapica imamanta Esteban juezcunapaj ñaupajpi shayacushcatami ricuna canchij. ¿Paica juezcunapaj ñaupajpi cashpaca ima shinataj paipaj crishcacunata difindirca? ¿Ima shinataj Estebanpaj ejemplota catij tucunchij?

4, 5. a) ¿Congregacionpi Esteban alli ayudaj cashcataca ima shinataj yachanchij? b) ¿Esteban ‘Diospaj ñaupajpi alli ricurij, paipaj poderta charij’ nishpaca imatataj nisha nin?

⁴ Yachai 5-pica congregacionpi Esteban achcata ayudaj cashcatami yacharcanchij. Paica micunata repartingapaj agllashca canchis runacunapurapishmi carca. Shinallataj apostolcunataca tucui shunguhuanmi  ayudarca. Paica alli cualidadcunata charishcamantami mana jatun tucurca. Hechos 6:8-pi nishca shinaca ‘jatun milagrocunata, mancharina ruraicunatapishmi’ rurarca. Shinallataj Bibliapica ‘Estebanca Diospaj ñaupajpi alli ricurij, Diospaj poderta charij’ runami carca ninmi. ¿Cai shimicunaca imatataj nisha nin?

⁵ Griego shimipi ‘Diospaj ñaupajpi alli ricurina’ nishpaca ‘alli cualidadcunata’ charishcatami ricuchin. Estebanca cꞌuyaihuan, respetohuanmi parlaj carca. Chashna cashcamantami uyajcunaca pai nishcata pajtachinata munarcacuna. Estebanca humilde cashcamantami Yaya Dios paipaj espíritu santohuan paita pushachun saquirca. Chaimi Jehová Diosta jatunyachirca. Pai yachashcacunahuan mana jatun tucushpami shujtaj gentecuna alli intindichunpish munaj carca. Alli yachaj cashcamantami contracunaca paita uyachunca mana munajcuna carca.

6-8. a) ¿Estebanpaj contra rimajcunaca paitaca ima nishpataj juchachircacuna? b) ¿Imamantataj chashna juchachircacuna? c) ¿Estebanpaj ejemplomantaca imatataj yachai tucunchij?

⁶ Huaquincunami “Estebanhuan pꞌiñanacushpa rimanacunaman chayarcacuna. Shinapish Estebanca alli yachaita charishcamanta, Diospaj espirituta charishcamantami alli parlarca. Chaimi paicunaca imata mana ni tucurcacuna”. a Mana imata rurai pudishcata ricushpaca “paicunaca huaquin runacunata pacalla cayashpa” paipaj contra nichunmi yachachircacuna. Shinallataj mandajcunata ‘quillcajcunatapish bullata rurachunmi jatarichircacuna’. ‘Mana nicujtami mandaj juezcunapajman pusharcacuna’ (Hech. 6:9-12). Estebanpaj contra parlachun agllashca runacunaca: Ñucanchijca Diospaj contra, Moisesman cushca leytapish “cꞌamicujtami uyarcanchij” nishpami llullarcacuna.

⁷ ¿Imamantataj Estebantaca Diostami cꞌamirca nishpa juchachircacuna? Paicunaca ‘Diospaj huasitami’ cꞌamirca nishpami juchachircacuna (Hech. 6:13). Shinallataj ¿imamantataj Moisesman cushca leyta cꞌamishcata nircacuna? Estebanca Moisesman cushca leytapish, costumbrecunatapish cambiacun nishpami juchachircacuna. Chai tiempopica Diospaj huasita, Moisesman cushca leyta cꞌamijcunaca sinchi juiciotami charina carca. Chashnallataj huañuchishcapishmi cana carca. Contracunaca Estebantaca shuj peligroso runata shina ricuchunmi munarcacuna.

⁸ Cunan punllacunapipish shujtaj religionmanta huaquin gentecunaca Diosta sirvijcuna problemacunata charichunmi juchachincuna. Por ejemplo, huaquin religioncunaca autoridadcuna testigo de Jehovacunata catirashpa llaquichichunca llullacunata nishpami juchachishcacuna. ¿Ñucanchijmanta llullacunata nijpica imatataj rurana canchij? Estebanpaj ejemplotami catina canchij.

9, 10. a) ¿Caifás tapushcamanta Esteban cutichishcataca, shujtajcunaca imatataj nincuna? b) ¿Estebanmanta yachashpaca imatataj yuyaipi charina canchij?

⁹ Cai callari capitulopi ricushca shinaca Estebanmanta llullacunata nijpipish paica shuj angelpaj ñahui shinami tranquilo ricurirca. Chaimi Caifasca: “¿Chai nishcacunaca chashnatajchu can?” nishpa tapurca (Hech. 7:1). Estebanpaj rimana horas chayajpica Diosmanta huillangapajmi alli aprovecharca.

¹⁰ Huaquincunaca Caifás rurashca tapuita Estebanca mana cutichishcatami nincuna. Chaipaj randica achcata parlashcallatami nincuna. Chaica ¿ciertochu carca? Mana, Estebanca chai tapuita cutichingapajca ‘alli allichirishcami’ carca (1 Ped. 3:15). Contracunaca Esteban Yaya Diospaj huasita, Moisesman cushca Leyta yangachishpa cꞌamishcatami nircacuna. Pero Caifás rurashca tapuita cutichingapajca Estebanca israelitacunapaj quimsa tiempocunamantami intindichirca. Chai tiempocunamanta ima shina intindichishcata ricushun.

11, 12. a) ¿Estebanca imamantataj Abrahanmanta parlashpa callarirca? b) ¿Estebanca imamantataj Josemantapish parlarca?

¹¹ Estebanca Abrahán, José causashca punllacunamantami parlashpa callarirca (Hech. 7:1-16). Judiocunapajca Abrahanca Diosta alli sirvij shuj alli ejemplomi carca. Chaimantami Abrahanmanta parlashpa callarinaca alli carca. Estebanca: ‘Jatun Diosca ñucanchij ñaupa yaya Abrahanmanmi Mesopotamia llajtapi ricurirca’ nircami. Abrahanca Dios cusha nishca allpapica shujtaj llajtamanta runa shinami causarca (Hech. 7:2). Diosta adorangapaj Abrahán Diospaj huasita, Moisesman cushca Leyta mana charijpipish Diosca paipaj adoraciontami chasquirca. Chaimi Estebanca Diosta adorangapaj chaicunata charinaca mana minishtishcata intindichirca.

¹² Estebanca Abrahanpaj familiamanta shamuj Josemantapishmi parlarca. Estebanca Josepaj huauquicunallataj paita maltratashpa, esclavo shina cꞌatushcatami yuyachirca. Paicunaca Israelmanta ñaupa doce yayacunami carca. Shinapish Jehová Diosca Israel llajta yaricaimanta ama chingarichun Joseta utilizashcatami Estebanca parlarca. Paica Jacobpaj churitapish, Diospaj Churitapish gentecunata quishpichingapaj  Dios agllashcata yachashpapish mana chaimanta parlarcachu. Chashnami gentecunaca paita uyashpa saquirircacuna.

13. a) ¿Moisesmanta yuyachinaca ima shinataj paita pꞌiñajcunamanta difindirichun ayudarca? b) ¿Estebanca Moisesmantaca imacunallatataj yuyachirca?

¹³ Estebanca Moisés causashca punllacunamantami parlarca (Hech. 7:17-43). Moisesmanta parlanaca allimi carca. ¿Imamanta? Mandaj juezcunapurapica huaquincunaca saduceocunami carca. Paicunaca Moisés quillcashca librocunallapimi crijcuna carca. Ashtahuanpish Estebanta pꞌiñajcunaca Moisesman cushca Leytami cꞌamishca nishpami juchachircacuna. Pero Esteban, Moisesmanta parlashpaca Moisestapish, Dios cushca Leytapish respetota charishcatami ricuchirca (Hech. 7:38). Shinallataj Moisés israelitacunata quishpichisha nijpipish paipaj ayudata mana chasquishcatami Estebanca paicunata yuyachirca. Chai tiempopi Moisesca cuarenta huatacunatami charirca. Cuarenta huatacuna qꞌuipapish israelitacunaca Moisespaj autoridadta mana chasquircacunachu. b Estebanca israelitacuna Jehová churashca pushajcunata mana chasquishcatapishmi asha asha yuyachishpa intindichirca.

14. ¿Estebanca Moisesmantaca imallatataj yuyachirca?

¹⁴ Estebanca Moisesllatajmi israelitacunapaj pai shina shuj profeta tiyana cashcata yuyachirca. ¿Chaica pitaj carca?, ¿paitaca ima shinataj chasquina carca? Estebanca paipaj discursota tucuchicushpami chai tapuicunata cutichirca. Shinapish cutichingapajca Estebanca rupacushca zarza yurapi Jehová Dios Moisesman ima nishcatami ricuchirca. Moisestaca: Canca jucha illaj pambapi shayacungui nircami. Chashna nishpaca Estebanca Jehová Dios paita adorachunca maijan allpapish alli cashcatami intindichirca. Shinapish ¿Jerusalenpi tiyaj Diospaj huasillapichu adorana carcacuna? Ricushun.

15, 16. a) ¿Imamantataj Estebanca Diospaj carpa huasimanta parlarca? b) ¿Salomón rurashca templomantaca Estebanca imatataj nirca?

¹⁵ Estebanca Diospaj carpa huasimanta, Diospaj huasimantapishmi parlarca (Hech. 7:44-50). Estebanca mandaj juezcunataca Jerusalenpi Diospaj huasi manaraj tiyajpimi Jehová Diosca Moisesta shuj carpa huasita shayachichun mandashcata yuyachirca. Chai carpa huasica Diosta adorangapaj, maimanpish apanallami carca. Moisespish chaipimi adorarca nircami. Chaimanta Jerusalenpi Diospaj templomi, Diospaj carpa huasita yalli nishpa pi mana ni tucurcachu.

¹⁶ Salomón Jerusalenpi Diospaj huasita tucuchishca huasha ima shina mañashcamantami Estebanca parlarca. Paica: “Jatun Diosca runacuna rurashca huasicunapica mana causanchu” nircami (Hech. 7:48; 2 Cron. 6:18). Jehová Diosca paipaj munaita pajtachingapajca shuj huasitami utilizai tucun. Chaica mana nisha ninchu chaillapi adorai tucushcata. Chaimantami Diosta sirvijcunaca paipaj huasillapi adorai tucushcataca mana yuyancuna. Estebanca paipaj discursota tucuchingapajca Isaías nishcatami parlarca. Paica: “Jahua pachaca ñuca mandashpa tiyanami, cai pachaca ñuca chaqui sarunami. ¿Maipitaj  ñucapajca huasita shayachi tucunguichigari? ¿Maipitaj ñuca samarinataca rurai tucunguichigari?”. ‘Tucui caicunataca ñuca maquimi rurarca’ ninmi. (Hech. 7:49, 50; Isa. 66:1, 2).

17. a) ¿Estebanca paipaj contracuna pandarishca cashcataca ima shinataj ricuchirca? b) ¿Paita juchachishcamantaca ima shinataj intindichirca?

¹⁷ Esteban mandaj juezcunapaj ñaupajpi ima shina yachachishcamantaca ¿imatataj yachanchij? Estebanta juchachijcuna mana alli yuyajcuna cashcatami yachanchij. Ashtahuanpish Jehová Diosca costumbrecunata aceptanapaj randica, paipaj munaita pajtachingapaj imatapish rurana cashcatapishmi intindichirca. Paicunaca Diospaj templota imapaj rurashcata, Moisesman cushca Leytapish imapaj cushcata cungarishpami paicunapaj costumbrecunata catishpa, templollapi adorajcuna carca. Chaimantami Estebanca cashna tapurca: Moisesman cushca Leytapish, Diospaj templotapish valichingapajca ¿manachu Jehová Diosta cazuna canchij? Estebanca Diosta cazungapajca tucuita rurashcamantami paipaj discursohuanca alli difindirirca.

18. ¿Ima shinataj Estebanpaj ejemplota catij tucunchij?

¹⁸ Esteban cushca discursomantaca ¿imatataj yachai tucunchij? Puntapica Esteban Dios quillcashcacunata alli estudiaj cashcatami yachanchij. Cunan punllacunapipish Diosta sirvijcunaca Bibliata alli estudiajcunami cana canchij. Chashnami Diospaj shimita ‘alli yachachijcuna’ cashun (2 Tim. 2:15). Ishquipica Estebanca shujtajcunata cꞌuyaihuan parlashcatami ricuchirca. Chaipi uyajcuna dimastij millai runacuna cajpipish paicuna imata rijsishcata, imata respetashcamantami parlarca. Ashtahuanpish mayorllacunataca “yayacuna” nishpami tratarca (Hech. 7:2) Chashnallatajmi ñucanchijpish Diospaj shimimanta huillacushpaca ‘manso shunguhuan, achca respetohuanmi’ gentecunataca tratana canchij (1 Ped. 3:15).

19. ¿Estebanca mandaj juezcunataca imatataj mana manchashpa huillarca?

¹⁹ Estebanca paipaj discurso mandaj juezcunapaj shunguman mana chayashcatami ricurca. Diospaj espíritu ayudajpimi discursota tucuchingapajca mana manchashpa: cancunaca “ñaupa yayacuna shinallatajmi” Joseta, Moisesta, caishuj profetacunatapish mana chasquijcuna canguichij nircami (Hech. 7:51-53). Moisespish shujtaj profetacunapish Mesías shamuna cashcatami huillarcacuna. Shinapish mandaj juezcunami Moisesman cushca Leyta mana cazushpa Mesiasta huañuchircacuna. Estebanca shuj alli ejemplotami saquirca. Ñucanchijpish gentecunaman Diospaj juicio punllamanta huillajpi, paicuna pꞌiñaringami nishpaca mana upalla saquirinachu canchij.

20, 21. a) ¿Esteban discursota tucuchishca huashaca, mandaj juezcunaca imatataj rurarcacuna? b) ¿Estebanca ima shinataj Jehovapaj animota chasquirca?

²⁰ Esteban nishcata uyashpami mandaj juezcunaca quirucunapish canirishpa shungupica yallitaj pꞌiñarircacuna. Chaita ricushpami Estebanca Jesusta llaquinaita maltratashca shina, paitapish llaquinaita maltratanataca allimi yacharca.

 ²¹ Chaita yachashcamantami achca valorta minishtirca. Chaimi Jehová Diosca valorta charichun ayudarca. Estebanca muscuipi shina Jehová Dios paipaj tiyarinapi, Jesustapish Paipaj alli ladopi shayacujtami ricurca. Chaita nijpimi mandaj juezcunaca paicunapaj rinrincunata taparircacuna. ¿Imamanta? Yuyarishunchij, Jesús paicunapaj ñaupajpi cashpa Mesías cashcata, paipaj Yayapaj ladopi tiyarigrishcata huillajpica paicunaca mana crircacunachu (Mar. 14:62). Chashnami Estebanca verdadta huillashcata ricuchirca. Jesustaca Mesías cashcata mana crishpami huañuchircacuna. Chaimi tucui contracuna Estebanta japishpa rumicunahuan shitashpa huañuchingapaj aparcacuna. c

22, 23. a) ¿Imamantataj Estebanca Jesús shina huañushcata ninchij? b) ¿Ñucanchijpish imamantataj Jesuspi confiana canchij?

²² Estebanca Jesús shinami paipaj shungupi tranquilo Jehová Diospi confiashpa paita llaquichijcunata perdonashpa huañurca. Manaraj huañushpaca: “Amito Jesús, ñuca causaitaca cambaj maquipimi mingani” nishpa rogarirca. Paica Jesús ima nishcatami yuyarishcanga. Jesusca: “Ñucami causaita cujpish, causachijpish cani” nircami (Juan 11:25). Chai qꞌuipaca cungurishpa sinchita caparishpa: “Jehová Dioslla paicunataca cai juchamantaca ama llaquichichu” nishca qꞌuipaca huañurcallami (Hech. 7:59, 60).

²³ Jesusta catijcunamantaca Estebantaraj huañuchingacama sinchita llaquichishcatami ricuchin (“ ¿Imamantataj Estebanca sufrishpa huañurca?” nishca recuadrota ricui). Cunan punllacunapish Estebanta huañuchishca shinallatajmi panda religionta catijcunapish, gobiernocunapish, Diosta sirvijcunataca llaquichishpami huañuchishcacuna. Esteban shinami Jesús ña rey cashcata paipaj yaya ña paiman poderta cushcataca seguros canchij. Paita catijcunata causachinataca pi mana jarcai tucungachu (Juan 5:28, 29).

24. a) ¿Sauloca Estebanta huañuchichun ima shinataj de acuerdo cashcata ricuchirca? b) ¿Estebanpaj ejemploca shujtajcunata ima shinataj ayudarca?

²⁴ Estebanta rumicunata shitashpa huañuchicujpica Saulo shuti jovenmi chaipi carca. Paica Estebanta huañuchichun de acuerdo cashpami, huañuchijcunapaj jahua churanacunatapish cuidacurca. Qꞌuipacarin Jesusta catijcunata catirashpami llaquichirca. Ashtahuanpish Estebanpaj ejemploca Jesusta catijcunatami sinchiyachirca. Paicunata catirashpa llaquichijpipish Esteban shinami Diosta tucuipi cazurcacuna. Huaquin huatacuna qꞌuipa Sauloca Jesusta catijcunata llaquichishcamantami arrepintirirca. Cunanca Saulotaca Pablo nishpami rijsinchij (Hech. 22:20). Paica Estebanta contracuna huañuchichun apoyashpapish qꞌuipaca “Diosta cꞌamij, catirashpa llaquichij, maipishcachun rimaj” cashcatami intindirca (1 Tim. 1:13). Shinallataj Esteban mandaj juezcunapaj ñaupajpi ima shina difindirishcataca Pabloca mana cungarishcangachu. Chaimantami pai cushca discursocunapi, quillcashca cartacunapipish huaquinpica Esteban ima nishcamanta parlarca (Hech. 7:48; 17:24; Heb. 9:24). Tiempohuanca Pablopish ‘Diospaj ñaupajpi alli ricurij’, paipaj poderta charij Estebanpaj ejemplotami catirca. ¿Ñucanchijpish Estebanpaj ejemplota caticunchijchu?