SHUJ punllapi sinchita trabajashca qꞌuipami Saraca caruta ricucun. Paita sirvijcuna ama maipish cachun rurachun cushicuihuan trabajachunmi ricucun. Paicuna causana carpa huasita siracushcamantami maquicuna nanaihuan can. Shinallataj achca ruraicunapi yuyashpami paipaj maquicunata subaricun. Paicunapaj racu carpa huasitaca chivo carahuanmi rurarcacuna. Carpaca intimanta, tamyamanta dañaricushcata ricushpami achca tiempota caita chaita purishpa causacushcata cuentata cun. Saraca paipaj cusa Abraham * tutamanta ladoman urcucunata rijtami ricurca. Inti huashicucujpi paipaj cusa maita rishcallatataj tigracujta ricushpami achcata cushicun.

Abrahamca 10 huatacuna ñaupamanmi Canaán llajtaman yaicungapaj paipaj familiahuan, paita sirvijcunahuan Éufrates yacuta chꞌimbarcacuna. Saraca chai llajtata mana rijsishpapish cushicushpami paipaj cusahuan rirca. Diosca Abrahampaj huahua huahuacunahuan paipaj munaita pajtachisha nishcatami Saraca yacharca. Shinapish, ¿Saraca ima shinashi ayudanga? Paica 75 huatacunatami charin, huahuacunatapish mana chari tucunchu. Chaimantami preocuparishpa, ¿ñucaca huahuacunata mana chari tucunichu, ima shinataj Diosca paipaj munaita pajtachinga? nishpa yuyashca canga.

Huaquinpica ñucanchijpish Dios cusha nishcacunaca, ima horashi pajtachinga nishpachari Sara shina yuyanchij. Ima pajtarina cashcata yachashpaca utca pajtarichunmi munanchij. ¿Sara huarmimantaca imatataj yachai tucunchij?

Abrahamca paipaj familiahuanmi Egiptomanta tigrarca (Génesis 13:1-4). Canaán llajtamanta cajcunaca Betel lado urcucunataca Luz nishpami rijsijcuna carca. Paicuna chaipi samacushpami Saraca chai urcumanta Dios cusha nishca llajtata ricui tucurca. Canaán llajtamanta shujtaj llajtacunaman ringapaj ñancuna tiyashcatami ricurca. Shinapish mana paipaj llajta layachu carca. Saraca Ur pueblopimi causarca. Chai puebloca Mesopotamia llajtapimi carca. Betel pueblomanta Ur pueblocamaca 1.900 kilometrocunami (1.200 millas) carca. Ur pueblopica achca mercadocuna, alhaja huasicunami tiyarca. Yacutapish huasicunapimi charishca cangacuna. Saraca paipaj familiatapish, alli causaitapish saquishpami rirca. ¿Paica Ur pueblopi alli causacushcata yuyarishpa llaquiricushcata yuyanguichu? Cai tapuita cutichingapajca paita ashtahuan rijsishunchij.

Apóstol Pabloca 2000 huatacuna qꞌuipamanmi Abrahammanta, Saramantaca: ‘Paicuna llujshimushca llajtaman tigranata yuyacushca cashpaca, chai tucui huatacunapica tigranmanmi carca’ nishpa quillcarca (Hebreos 11:8, 11, 15). Abrahampish Sarapish Ur llajtata saquishcamantaca mana llaquilla sintirircacunachu. Paicuna saquishcata yuyaricushpaca tigranmanmi carca. Paicuna tigrashpaca Dios  cusha nishca llajtatapish mana japinmanchu carca. Paicunapaj causaihuanpish shujtajcunaman mana yachachi tucunmanchu carca. Paicunamantaca ni pi mana yuyarinmanchu carca.

Saraca imata saquishcapi yuyanapaj randica Dios cusha nishcacunapimi yuyaj carca. Saraca carpa huasitapish shayachishpa, huagracunatapish cuidashpa, qꞌuipaca carpa huasita cutin tandachishpami paipaj cusata ayudaj carca. Shinapish paica shujtaj llaquicunatami chꞌimbapurarca. Diosca Abrahamman cusha nishcatami cutin yuyachirca. Pero Saramantaca mana imata nircachu (Génesis 13:14-17; 15:5-7).

Saraca imapi yuyacushcatami paipaj cusaman huillarca. Paica ashata sustarishpami llaquilla Abrahamtaca: “Mandaj Dios ñucata mana huachaj cachun rurashcataca canllataj yachanguimi” nishpami, ñucata sirvij Agar huarmihuan huahuata chari nirca. Sarapajca chaita ninaca sinchimi cashca canga. Cunan punllacunapi chaita ninaca mana allichu ricurin. Shinapish chai punllacunapi shuj cꞌari paipaj huahuacunaman herenciata saquingapajca shujtaj huarmihuan cazarashpami huahuacunata charij carca. * Saraca, ¿Abrahampaj huahua huahuapuramanta shuj llajta tiyana cashcapi yuyashpachu chaita rurashca canga? Mana yachanchijchu. Shinapish paica mana paillapi yuyashcatami ricuchirca. ¿Abrahamca imatashi yuyashca canga? Bibliapica: ‘Abrahamca paipaj huarmi Sara nishcatami uyarca’ ninmi (Génesis 16:1-3).

Sara chaita rurachunca Diosca mana yuyachircachu. Shinapish paipaj munaita pajtachingapajca imata mana rurai tucushcata yuyashpami, Saraca paipaj llaquicunamanta Diosta juchachirca. Paipaj cusaman Agarhuan huahuata chari nishcamantaca achca llaquicunatami charigrirca. Shinapish paica mana paillapi yuyarcachu, ashtahuanpish Diospaj munai pajtarichunmi munarca. Cunan punllacunapica gentecunaca paicunallapi yuyashpami causancuna. Ñucanchij munaicunata huashaman saquishpa Diospaj munaita puntapi churashpaca Sara shina tucui shunguhuan Diospi crishcatami ricuchishun.

Agar huarmica Abrahamhuan chayarishpami chichu saquirirca. Paica huahuayuj tucushpami Sarata yalli cashcata yuyashpa pꞌiñai callarirca. Sarapajca chaica sinchimi carca. Chaimantami Saraca Agarta llaquichichun saquihuai nishpa Abrahamta mañarca. Diospish llaquichichun saquircami. Shinapish Sara ima shina llaquichishcataca mana yachanchijchu. Qꞌuipamanca Agarca huahuatami ungurca. Chai huahuataca Ismael nishpami shutichirca (Génesis 16:4-9, 16). Saraca 89 huatacunata charijpi,  Abrahamca 99 huatacunata charijpimi Diosca cutin paicunaman cusha nishcata yuyachirca.

Jehová Diosca Abrahamtaca canmantami huahua huahuacunata mirachisha nishpami paipaj shutita cambiarca. Chaicamaca Abram shutitami charirca. Shinapish Diosca cunanmantaca Abraham shutitami charingui nircami. Abraham shutica ‘achcacunapaj yaya’ nisha ninmi. Diosca paipaj munai pajtarichun Sara ima shina ayudagrishcataca punta cutinmi parlarca. Paica Sarai shutitami charirca. Sarai shutica ‘caparishpa rimarijlla’ cashcatami nisha nishca canga. Diosca cunanca Sara shutitami charingui nircami. Sara shutica ‘jatun mandajcunapaj mama’ nisha ninmi. Diosca Abrahamtaca: “Paimantami canmanpish shuj cꞌari huahuata cusha. Paica achca llajtacunapaj mamami tucunga. Llajtacunata jatun mandajcunapish paimantami huacharinga” nircami (Génesis 17:5, 15, 16).

Chai shimicunaca Sarapaj churimantami pajtarina carca. Diosca Sarapaj huahuataca Isaac shutihuan shutichichunmi munarca. Isaac shutica “Asina” nisha ninmi. Abrahamca Dios bendiciajpi paipaj huarmi huahuata charigrishcata uyashpaca ‘pambacama cumurishpami asirca’ (Génesis 17:17, QC, 1989). Paica Sara chichu saquirigrishcamantami cushilla sintirirca (Romanos 4:19, 20). ¿Saraca imatataj yuyarca?

Qꞌuipaca achca inti rupacuj horaspimi mana rijsishca quimsa cꞌaricuna Abrahampaj carpa huasiman chayarca. Abrahampish Sarapish yuyajcuna cashpapish cushicushpami paicunata chasquirca. Abrahamca, carpa huasiman rishcahuanmi paipaj huarmitaca: ‘Chuscu chunga libra ashtahuan alli cutata japishpa, utca tandata rurashpa cusai’ nirca. Chai tiempopica visitajcunataca achca micunahuanmi chasquijcuna carca. Abrahamca paipaj huarmilla tucuita rurachunca mana saquircachu. Paipish ‘callpashpami, tucuimanta yalli huira bizita’ huañuchishpa aichata yanushpa ashtahuan micunata rurarca (Génesis 18:1-8). Chai runacunaca Dios cachashca angelcunami carca. Apóstol Pablopish chaita yuyarishca cashpami: “Cancunaca puzachinataca, amataj cungaringuichijchu. Chashna puzachijcuna cashcamantami maijancunaca pi cashcata mana yachashpapish angelcunata puzachircacuna” nirca (Hebreos 13:2). Tucuicunami Abraham, Sara laya shujtajcunata ñucanchij huasipi chasquina canchij.

Shuj angelca, Saraman Dios shuj huahuata cushpami canmanta huahua huahuacunata mirachinga nishpa Abrahamman cutin yuyachirca. Chaitami Saraca carpa huasi ucupi uyacurca. Paica ña yuyaj cashcamanta shuj huahuata charinata mana crishpa paipaj shungullapi asishpaca: “Ñucaca ñamari yallitaj yuyaj cani. Cꞌarihuan chayarina munaitapish mana charishachu. Ñuca amitopish ñamari yallitaj yuyaj” nishpa yuyacurca. Chaimantami angelca: “Taita Diospajca imapish mana sinchichu” nirca. Saraca pai ima shina cutichishcata cuentata cushpami manchaihuan “mana asircanichu” nirca. Shinapish angelca: “Mana chashnachu. Asircanguimi” nirca (Génesis 18:9-15). ¿Manachu ñucanchijpish Sara laya cutichinchijman carca?

Saraca Diospi mana crishcamantaca mana asircachu. Bibliapica paimantaca: ‘Crishcamantami Sara huarmica mana huachaj cashpapish chichungapaj fuerzata chasquirca. Diosca pai cusha nishcataca pajtachij cashcata Sara crishcamantami, shuj cꞌari huahuata huacharca’ ninmi (Hebreos 11:11). Paica Diostami alli rijsirca, tucui pai nishcacunatapish pajtachij cashcatami alli yacharca. Chaimantami Saraca Diospi shunguta churarca. Tucuicunami Sara shina Diospi tucui shunguhuan crinata minishtinchij. Chaipajca Diosta alli rijsingapajmi esforzarina canchij. Paita alli rijsishpaca Diosca tucuita pajtachij cashcatami ricungui.

Saraca 90 huatacunata charishpami shuj huahuata ungurca. Abrahamca 100 huatacunatami charirca. Chai huahuataca Dios mandashca shinami Isaac shutita churarca. Saraca asha shaicushca cashpapish huahuata ricushpami cushilla: “Taita Diosmari ñucataca asichin. Ñuca huahuayuj tucushcata pipish uyajcunaca cushicushpami ñucahuan asingacuna” nirca  (Génesis 21:6). Diosca shuj milagrota rurashpami Saraman shuj huahuata curca. Chai huahuaman alli yachachishpa huiñachina cashpapish cushillami causarca.

Isaac 5 huatacunata charishpa chuchumanta raquirijpimi paipaj familiaca shuj micunata rurarca. Shinapish Saraca Ismael paipaj churihuan mana alli apanacujta ricurca. Paica paipaj churi Isaacmanta burlarishpa pꞌiñachicujlla cashcatami ricurca. Agarpaj churi Ismaelca 19 huatacunatami charirca. Achca huatacuna qꞌuipaca Apóstol Pabloca Ismaelca ‘catirashpami llaquichij’ carca ninmi. Chaimantami Saraca paipaj churita Ismael huañuchinman nishpa sustarirca. Paica Isaacmanta huahua huahuacunata Dios cushpa bendiciana cashcamantami paipaj churita cuidarca. Chaimantami paica mana manchashpa Abrahamtaca Agartapish paipaj churitapish caimanta llujshichishpa cachai nirca (Génesis 21:8-10; Gálatas 4:22, 23, 29).

Sara chashna nijpica, ¿Abrahamca ima shinataj sintirirca? Bibliapica: ‘Ismaelpish paipaj churillataj cashcamantami paica jatunta llaquichirca’ ninmi. Paica paipaj churita cꞌuyashcamantami huasimanta mana llujshichishpa cachasha nirca. Diosca paicunahuan imata ruranata alli yachashpami Abrahamtaca: “Chai churimantapish, cambajta ruraj huarmimantapish ama yalli llaquirichu. Cambaj huarmi Sara imallata nishcata rurailla. Isaacmanta mirarishcacunallami, cambaj huahua huahuacuna canga” nircami. Jehová Diosca Agartapish, paipaj churitapish cuidashami nishpami animarca. Chaimantami Abrahamca paicunata llujshichishpa cacharca (Génesis 21:11-14).

Saraca alli huarmi, paipaj cusata ayudajmi carca. Paica paipaj cusa uyasha nishcallataca mana nircachu. Paica familiapi ima llaquicuna ricurijpica mana manchashpami pai imata yuyashcata nij carca. Shinapish paica siempremi respetohuan parlarca. Mana manchashpa parlanaca mana respetashcataca mana nisha ninchu. Apóstol Pedroca cazarashca cashcamantami Saraca paipaj cusata respetajmi carca nirca (1 Corintios 9:5; 1 Pedro 3:5, 6). Saraca llaquicunata ricushca jahua mana huillashpaca paipaj familiapi achca llaquicunatami charinman carca. Paica imata nina cashpapish alli yuyashpami respetohuan nirca.

Saraca paipaj cusata respetohuan parlaj cashcamantami achca huarmicunaca paica alli huarmimi can nincuna. Huaquinpica huaquin huarmicunaca Dios ima shina Sarata ayudashca shinami paicunatapish ayudachun munancuna. Shinapish Saramantaca Diospi tucui shunguhuan crij cashcata, cꞌuyaj cashcata, mana utca pꞌiñarij cashcatami yachai tucuncuna.

Jehová Diosca cꞌuyaihuan ‘jatun mandajcunapaj mama’ nijpipish Saraca mana chashna nichun munarcachu. Paica 127 huatacunata charishpami huañurca. * Paica humilde, alli huarmi cashcamantami paipaj cusaca yallitaj huacarca (Génesis 23:1, 2). Abrahamca paipaj huarmita yuyarishpami achcata huacaj carca. Yaya Diospish paipi tucui shunguhuan crij huarmi cashcamantami achcata llaquirirca. Dios cai Allpata shuj paraisota rurajpica huiñai huiñaita causachunmi Sarata cutin causachinga. Pai shina tucui shunguhuan Diospi crijcunapish paraíso Allpapimi huiñai huiñaita causangacuna (Hechos 24:15).