Bibliaca ungüicunata ima shina jambinataca mana yachachinchu. Pero chaipi tiyaj consejocunami yallitaj sustarishca cajcunata o dimastij llaquilla cajcunata ayudan. Catij consejocunata ricupai.

“Sano gentecunaca jambijtaca mana minishtincunachu. Ungushcacunami jambijtaca minishtincuna” (MATEO 9:12).

Bibliapica doctorpajman rinaca minishtirishca cashcatami intindichin. Yallitaj sustarishca cajcuna o dimastij llaquilla sintirijcunaca paicuna charishca ungüimanta ashtahuan yachashpa, doctorpajman rishpami ashtahuan alli sintirishcacuna.

‘Ejerciciota ruranaca cuerpota sinchiyachingapajmi ayudan’ (1 TIMOTEO 4:8).

Ejerciciota rurangapaj esforzarishpa, sano micunata micushpa, suficienteta dormishpaca shungupi, yuyaipimi tranquilos sintirishun.

“Cushijlla shunguhuan causanaca, aichapajpish alli jambimi. Ashtahuanpish llaqui shungullahuan causajpica, tullucamami chaquichin” (PROVERBIOS 17:22).

Bibliapaj cushichij yuyaicunata liyishpa, can rurai pudishcata pajtachingapaj esforzarishpaca cushillami sintiringui. Allicunallapi yuyashpa, qꞌuipa punllacunapish alli canata yuyashpaca yuyaipipish, shungupipish tranquilomi sintiringui.

 “Alli yachaica mana jatun tucushcacunahuanmi tiyan” (PROVERBIOS 11:2).

Imapi canta ayudachun minishtishpaca pi ayudachunmi saquinalla cangui. Cambaj familia o amigocunaca canta ima shina ayudanataca manachari yachancuna. Chaipica can imapi ayudachun minishtishcatami huillana cangui. Pero paicuna rurai tucushcallatami mañana cangui. Paicuna ña ayudajpica pagui ninataca manataj cungarinachu cangui.

“Ñucaca mana alli sintirishcamantami doctorapajman rircani. Doctoraca ñuca imamanta chashna sintirishcatami intindichirca. Chaimi shuj ungüita charishcata intindircani. Ñuca ungüipaj imalla tratamientocuna tiyashcatapishmi doctoraca huillarca” (Nicole a huarmica trastorno bipolar nishca ungüitami charin).

“Ñuca huarmihuan punllanta Bibliata liyishcamantami cada punlla alli yuyaicunata charini. Chashnami ñaupajman cati tucuni. Ñuca ashtahuan llaquilla caj punllacunapica siempremi shuj cushichij versota tarini” (Pedroca depresión ungüitami charin).

“Callaripica ñuca ungüimanta shujtajcunahuan parlanatami pingarcani. Pero shuj cꞌuyaj amigami ñuca ima shina sintirishcata parlajpica alli uyarca. Ñucata intindingapajpishmi esforzarirca. Paimi ñucataca alli sintirichun ayudarca. Ñuca mana sololla cashcatapishmi intindichirca” (Ji-yoo huarmica trastorno alimenticio nishca ungüitami charin).

“Bibliata estudiashpami mana achcata trabajana cashcata, samaringapajpish tiempota llujchina cashcata intindircani. Bibliapi tiyaj consejocunami ñuca charishca llaquicunata chꞌimbapurangapaj ayudashca” (Timothyca trastorno obsesivo compulsivo nishca ungüitami charin).