Ñucanchij amigocuna yallitaj sustarishca cana ungüita o dimastij llaquilla sintirina ungüita charijpica paicunata ima shina ayudanataca manachari yachanchij. Pero paicunata cꞌuyashcamantami chai ungüihuan chꞌimbapurachun ayudana canchij. ¿Ima shina?

‘Alli uyajcuna caichij’ (SANTIAGO 1:19).

Cambaj amigohuan parlacui horas imata ninata yuyanapaj randica paitami alli uyanaraj cangui. Paimanta preocuparishcatapishmi ricuchina cangui. Quizás cambaj amigoca mana alli yuyashpami parlanga. Chaimantami qꞌuipaca llaquilla sintiringa (Job 6:2, 3). Pero pai chashna parlacujpica juzganapaj randica pai imamanta chashna sintirishcata intindingapaj esforzari.

‘Llaquilla cajcunata cushichichij’ (1 TESALONICENSES 5:14).

Tal vez cambaj amigoca yallitaj sustarishca, imapaj mana valij shinachari sintirin. Chaimantami paimanta preocuparishcata ricuchina cangui. Chashnami paitaca achcata animangui.

“Alli apanacuj runaca paihuan apanacujtaca, tucui causaipimi cꞌuyan” (PROVERBIOS 17:17).

Cambaj amigotaca ima shina ayudai tucushcatami tapuna cangui. Huaquinpica pai imapi ayudachun munashcataca manachari huillanga. Chashna cajpipish can ima shina ayudasha nishcatami huillai tucungui. Por ejemplo, paseanaman ringapaj o  comprasta ruranaman ringapajmi paihuan llujshi tucungui. Shinallataj huasita limpiashpa o shujtaj ruraicunata rurashpami ayudai tucungui (Gálatas 6:2).

‘Pacienciata ricuchichij’ (1 TESALONICENSES 5:14).

Cambaj amigoca huaquinpica parlanataca mana munangachu. Pero pai parlasha nijpica can uyangapaj listo cashcatami yuyachina cangui. Cambaj amigoca ungushca cashcamantami huaquinpica canhuan imatapish ña mana rurasha ninga o rato pꞌiñaringalla. O tal vez mana alli yuyashpami parlanga. Chaimantami paitaca achca pacienciata charishpa ayudana cangui (Proverbios 18:24).

“Ñucaca alli amiga cangapajmi esforzarini. Huaquinpica paipaj tucui problemacunataca mana allichi tucunichu. Pero paita siempre uyangapajmi lista cani. Maipica pai alli sintiringapajca uyachunllami minishtin” (Fabiola, a paipaj amigaca trastorno alimenticio, ansiedad, depresión clínica ungüicunatami charin).

“Ñucaca shuj cꞌuyaj, cushichij amigatami charini. Shuj punllaca paipaj huasipi micungapajmi ñucata invitarca. Chaipica allimi sintirircani. Chaimantami ñuca ima shina sintirishcataca paimanca jahualla parlai tucurcani, tranquilami sintirircani” (Ha-eun huarmica depresión clínica ungüitami charin).

“Ñuca huarmica ungushca cashcamantami maipica ñuca mana munashca cosascunata ruranlla. Pero paihuan pꞌiñarinapaj randica pacienciata charingapaj, paita intindingapajmi esforzarini” (Jacob, paipaj huarmica depresión clínica ungüitami charin).

“Ñuca huarmisitaca ñucataca achcatami ayudashca. Maipica ñuca yallitaj sustarishca cashpaca pai munashca cosascunataca mana rurasha ninichu. Pero paica ñucataca chaita rurachun obliganapaj randica ñucata intindingapajmi esforzarin. Paica ñucataca achcatami cꞌuyan. Paica ñucapajca dimastij valishcami can” (Enriqueca ansiedad ungüitami charin).