UCHILLAMANTAMI LUCIATACA SHUJ MILLAI UNGÜI JAPIRCA. Chaimantami paipaj cuerpoca mana fácil cuyuri tucun. Luciaca 16 huatacunata charishpami shuj huarmipaj trabajaj carca. Chaipimi chai huarmica: “Canca Diosta, yaya mamata mana cazushcamantami Yaya Diosca coja cachun castigashca” nirca. Cai nishcacunaca paitaca achcatami llaquichirca. Chaitaca cunancamami manataj cungari valin.

DÁMARIS HUARMICA UMAPIMI SHUJ TUMORTA CHARIRCA. Chaita yachaj chayashpami, paipaj yayaca: “Diospaj ñaupajpi mana allita rurashcamantami cantaca shina castigacun” nirca. Chaita uyashpami Damarisca dimastij shungupi llaquirirca.

Ñaupa tiempomantami gentecunaca Diosmi ungüicunata cachashpa castigan nijcuna carca. Shuj libropi nishca shinaca Jesuspaj tiempopipish, “ungüita charijmi ima juchata rurashca canga. O mana cashpaca paipaj familiami ima juchata rurashca canga. Chaimantami Diosca cashna ungüihuan paitaca castigacun” nijcunami carca (Usos y costumbres de las tierras bíblicas). Cutin shujtaj libropica cashnami nin: “Europa llajtapica casi quinientos huatacuna huashamanmi la mayoría gentecunaca shuj ungüihuan huañurcacuna. Chaimi huaquincunaca, ‘Diosmi cai ungüita cachashpa castigacun’ nircacuna” (Medieval Medicine and the Plague). Pero qꞌuipatami doctorcunaca, shuj bacteria mirajpimi achca gentecunaca huañurcacuna nircacuna. Shinaca, ¿Diosca ungüicunata cachashpachu castigan? *

CAIPI YUYAI: Jesús cai Allpapi cashpaca ¿Yaya Dios castigashcata mana valichishpachu ungushcacunata jambirca? Mana (Mateo 4:23, 24). Chai gentecunata Jehová Dios ungüicunahuan castigashca cajpica Jesusca mana jambinmanchu carca. Jesusca Yaya Diospaj contraca mana tucurcachu. Ashtahuanpish paica, ‘Dios munashcallatami rurani. Pai mandashca shinami tucuita rurani’ nircami (Juan 8:29; 14:31).

Diosca, ‘cashcatami ruran, imapi mana pandarinchu’ (Deuteronomio 32:4). Por ejemplo, shuj millai runa avionpi ricujpica paita castigangapajlla avionta urmachishpa, caishuj inocente gentecunadij mana huañuchinmanchu ¿nachu? Diosta sirvij Abraham runaca: “Canca tucui cai pachapi causajcunapaj Juezmi cangui. Canta mana manchajcunata Ilaquichicushpaca, cashcata rurajcunandijca mana chingachinguimanchu” nircami (Génesis 18:25, QC, 1989). Shinallataj Bibliapica: “Millaita ruranapish, Tucuita Rurai Tucuj Diosmantaca carupimi can” ninmi (Job 34:10-12).

Llaquicuna tiyajpica Diosmi ñuca juchamanta castigacun nishpaca mana yuyanachu canchij. Jesusta catijcunaca shuj ciego runata ricushpami: “Yachachij, cai runa chashna huacharichunca ¿paillatajchu, mana cashpaca paipaj yaya mamachu juchallishca canga?” nishpa tapurcacuna. Shina tapujpimi Jesusca: “Paipish, paipaj yaya mamapish mana juchallircachu” nirca (Juan 9:1-3). Shinami Jesusca Dios ungüicunata cushpa mana castigaj cashcata intindichirca.

Jesús chai nishcata uyashpami paita catijcunaca mancharircacuna. Chai tiempopica Diosmi  ungüita cushpa castigan nijcunami carca. Pero Jesusca chai runata jambishpami gentecuna panda yuyaicunata charishcata ricuchirca (Juan 9:6, 7). Tal vez shuj grave ungüitachari charinchij. Pero Yaya Dios ungüicunahuan mana castigaj cashcata yachashpaca ¿manachu tranquilo sintirinchij?

Bibliapica cashnami nin:

• ‘Diosca llaquicunataca mana cunchu’ (SANTIAGO 1:13, QC, 1989). Chaipaj randica paica ñallami ungüicunata, nanaicunata, llaquicunata libre tucuchinga.

• Jesusca: “Tucui ungushcacunatapish alliyachircami” (MATEO 8:16). Ungushcacunata Jesús alliyachishpaca, shamuj punllacunapi paillataj cai Allpapi ungushcacunata alliyachinatami ricuchirca.

• “Diosca paicunapaj ñahuicunamantaca, tucui huiquitami pꞌichanga. Ñaupa tucui imalla tiyajcunaca, ña mana tiyashcamanta huañuipish, huacaipish, llaquipish, nanaipish ña mana ashtahuan tiyangachu” (APOCALIPSIS 21:3-5).

Caipi yachashca shinaca Diosca mana llaquicunata cachanchu. Chashna jahuapish tauca gentecunami “¿imamantataj mundo enteropica llaquicuna tiyan?, ¿pitaj culpata charin?” nishpami tapurincuna. Chaitaca catij temapimi yachashun.