Franciapi causaj huauqui Nicolas y pani Celinetaca sucursalmanta huauquicunami shujtaj congregacionpi sirvinaman richun mañarcacuna. Paicunaca: “Chaiman chayashpaca cushillami carcanchij. Pero qꞌuipaca ñucanchij amigocunata yuyarishpami llaquilla sintirircanchij. Mushuj congregacionpi sirvicuj huauqui panicunahuan amigarinaca sinchimi carca” nircacunami. a Shinaca ¿shujtaj congregacionpi amañaringapajca imatataj rurana cangui? ¿Ñucanchij congregacionman mushuj huauqui panicuna shamujpica paicunataca ima shinataj ayudai tucunchij? ¿Caishuj chaishuj ayudanacushcamantaca ima shinataj beneficiarishun?

SHUJTAJ CONGREGACIONPI AMAÑARINGAPAJCA CAITA RURAI

1. Jehová Diospi confiai (Salmo 37:5). Japón llajtapi causaj pani Kazumica 20 huatacunatami chai congregacionllapitaj sirvirca. Pero paipaj cusata shujtaj ladopi trabajanaman cachajpimi paica shujtaj congregacionman pasana carca. ¿Cai panica ‘paipaj purinata Jehová Diosman mingangapajca’ imatataj rurarca? Paica: “Yayitu Diosmanmi ñucalla cashcata, llaquilla sintirishcatapish huillarcani. Paimi ama chashna sintirichun fuerzasta cushpa ayudarca” nircami.

Caipi yuyashun. Shuj plantita alli huiñashpa catichunca yacuta churana, abonota churanami minishtirin. Chashnallatajmi ñucanchij fe sinchiyashpa catichunca esforzarishpa catina canchij. Por ejemplo huauqui Nicolasca Abrahanpi, Jesuspi Pablopimi yuyarca.  Paicunaca Jehová Diosta cazungapajca achca sacrificiocunatami rurarcacuna. Chai ejemplocunapi yuyashcamantami Nicolasca Jehová Dios paitapish ayudanata seguro carca. Canpish Diospaj Shimita, publicacioncunatapish estudiashpami cambiocunata chꞌimbapurai tucungui. Congregacionpipishmi shujtajcunata ayudai tucungui.

2. Mushuj congregaciontaca ñaupa congregacionhuan ama chꞌimbapuraichu (Eclesiastés 7:10). Benín llajtamanta caj huauqui Julesca Estados Unidospi causanaman rishpaca chaipi causajcuna shujtaj culturata charishcatami cuentata curca. Paica: “Paicunaman ñuca causaimanta cutin cutin parlana cashcamantami mana alli sintirircani. Chaimantami huauqui panicunamanta caruyai callarircani” nircami. Pero qꞌuipaca paica: “Gentecunaca maimanta cashpapish tucuicunami igual canchij. Pero tucuicuna igual cashpapish chꞌican chꞌican yuyaicunatami charinchij. Chaimantami cada uno ima shina cashcata aceptana canchij” nircami. Pani Anne-Liseca: “Ñucaca mushuj congregacionpi caj turi ñañacuna ñaupa congregacionpi caj turi ñañacuna layallataj cachunca mana shuyarcanichu. Ashtahuanpish shujtaj laya turi ñañacunamanta yachangapajmi mushuj congregacionman pasarcani” nircami.

Ancianocunapish shujtaj congregacionman pasashpaca chai congregaciontaca ñaupa congregacionhuanca mana chꞌimbapuranachu can. Mushuj congregacionpica huaquin cosascunataca shujtaj layachari rurangacuna. Pero huauqui panicuna mana allita ruracushcataca mana yuyanachu can. Ashtahuanpish congregacionpi huaquin cambiocunata rurana cashcata ningapajca puntapica chai congregación ima shina cashcatami alli rijsinaraj can (Eclesiastés 3:​1, 7b). Shinallataj shimillahuan imatapish yachachinapaj randica pairaj ejemplota churashpami yachachina can (2 Corintios 1:24).

3. Congregacionpi ayudai (Filipenses 1:27). Shujtaj ladopi causanaman rishpaca achca cosascunata rurashpami ocupado pasangui. Pero ocupado cashcamanta tandanacuicunaman mana rijpi o huaquinllapi rijpica huauqui panicunaca canta rijsina oportunidadtaca mana charingacunachu. Chaimi can imata minishtijpica tal vez mana ayudangacuna. Chaimantami tandanacuicunaman ringapaj esforzarina cangui. Pudishpaca presencialmentemi rina cangui. Pani Lucindaca Sudafricapi saquirij jatun ciudadpimi paipaj ishqui ushushicunahuan causanaman rirca. Paica: “Congregacionpi ayudangapaj esforzarichunmi ñucataca animarcacuna. Chaimi chꞌican chꞌican turi ñañacunahuan predicangapaj, tandanacuicunapipish comentariocunata cungapaj esforzarircani. Ashtahuanpish ñucanchij huasimanta predicana grupo llujshichunmi ofricircanchij” nircami.

Huauqui panicunahuan sinchiyanacungapajca tandallami Diospajta rurana cangui. Anciano huauquicunaca pani Anne-Lisetaca tucuicunahuan predicacionman llujshichunmi animarcacuna. Paica: “Chai consejota catishpami tucuicunahuan amigari tucurcani” nircami. Shinallataj Tandanacuna Huasita pꞌichashpa, allichishpa ayudajpimi huauqui panicunaca mushuj congregacionpi cushilla sintirishcata cuentata cungacuna. Tucui huauqui panicunahuan alli apanacungapaj esforzarishpaca ratomi mushuj congregacionpica cushilla sintiringui.

 4. Huauqui panicunahuan amigari (2 Corintios 6:​11-13). Chaipajca paicunamantami sustarina cangui. Shinallataj tandanacuicuna manaraj callarijpi, tucurishca qꞌuipapish tucuicunata rijsingapaj, paicunahuan parlanacungapaj, cada unopaj shutitapish yachangapajmi esforzarina cangui. Chaita rurajpimi canhuan apanacunata munangacuna.

Shujtajcunapaj ñaupajpi alli ricuringapajlla imatapish ninapaj o ruranapaj randica can shungu ucupi ima shina cashcatami ricuchina cangui. Shinallataj pani Lucindapaj ejemplotami catina cangui. Paica: “Ñucanchijrajmi turi ñañacunata ñucanchij huasiman invitarcanchij. Chashnami paicunahuan alli apanacui tucurcanchij” nircami.

“CAISHUJ CHAISHUJ ALLI CHASQUINACUICHIJ”

Maijan huauqui panicunapajca mana rijsishca huauqui panicunahuan amigarinaca sinchimi can. Chaimanta mushuj huauqui panicuna ñucanchij congregacionman shamujpica, ¿imatataj rurana canchij? Apóstol Pabloca: “Cristo cancunata alli chasquishca shinallataj cancunapish caishuj chaishuj alli chasquinacuichij” nircami (Romanos 15:7). Shinallataj anciano huauquicunaca Jesuspaj ejemplota catishpami mushuj huauqui panicuna congregacionpi alli sintirichun ayudana can (“ Shujtaj congregacionpi sirvigrijcunapaj consejocuna” nishca recuadrota ricui). Pero mana ancianocunallachu ayudai tucuncuna. Ashtahuanpish tucuicunami, hasta huahuacunapish ayudai tucuncuna.

Mushuj huauqui panicuna alli sintirichunca ñucanchij huasimanmi invitana canchij. Shinallataj paicuna ima minishtishcapimi ayudana canchij. Por ejemplo, shuj panica paipaj ciudadpi causanaman recienlla shamushca panita ayudangapajmi tiempota surcurca. Paica chai panimanmi ciudadta rijsichirca, buscunata ima shina japinatapishmi yachachirca. Chaita rurashcamantami mushuj panica cushilla sintirirca. Chai llajtapi causanatapishmi utca amañarirca.

SHUJTAJ CONGREGACIONMAN RINACA ESPIRITUALMENTE SINCHI TUCUCHUNMI AYUDAN

Mushuj congregacionpi cashpaca manchaihuan, preocupadochari sintiringui. ¿Ama chashna sintiringapajca imatataj rurana cangui? Caipi yuyai. Huaquin  insectocunaca huiñashpa catingapajca paicunapaj charishca caratami saquina can. Chashnami qꞌuipaca volai tucuncuna. Ñucanchijcunapish espiritualmente huiñashpa catingapajca tucui preocupacioncunatami saquina canchij. Chashnami Jehová Diosta alli sirvi tucushun. Nicolas y Celineca chaitami rurarcacuna. Paicunaca cashnami nin: “Shujtaj ladoman rishpaca achca cosascunatami yachangui. Por ejemplo, shujtaj gentecunata, shujtaj lugarcunata rijsinami alli cualidadcunata charichun ayudarca”. Shinallataj huauqui Jean-Charlesca: “Shujtaj congregacionman cambianaca ñucanchij huahuacuna espiritualmente sinchiyachunmi ayudarca. Huaquin quillacuna qꞌuipallami ñuca ushushica tandanacuicunapica asignacioncunata cui callarirca. Shinallataj ñuca churica publicadormi tucurca” nircami.

Pero shujtaj congregacionman mana ri tucushpapish cai yachaipi imalla yachashcatami pajtachi tucungui. Chashnami can sirvicushca congregacionpi saquirishpapish mushuj congregacionpi sirvinaman rishca laya sintiringui. Por ejemplo, congregacionpi ayudangapajca tucui huauqui panicunahuanmi predicacionman llujshi tucungui. Shinallataj tucuicunahuan alli apanacushpa catingapajmi esforzari tucungui. Cutin cambaj congregacionman recién pasashcacunata, ayudata minishtijcunataca ima shina ayudanatami yuyana cangui. Caicunata rurashpami espiritualmente sinchi tucucushcata ricuchingui. Ashtahuanpish cꞌuyaita ricuchishcamantami Jesusta alli catij cashcata ricuchingui (Juan 13:35). Jehová Diospish cambaj esfuerzocunata ricushpami cushilla sintiringa (Hebreos 13:16).

Mushuj congregacionpi amañarina sinchi cajpipish maijan huauqui panicunaca cushillami sirvicuncuna. Canpish paicuna shinami sintiri tucungui. Pani Anne-Liseca: “Shujtaj congregacionpi sirvinaman rishcamantami turi ñañacunaman cꞌuyaita ima shina ricuchina cashcata yachashcani” nircami. Pani Kazumipish shujtaj congregacionman rishcamantami Jehová Dios paita ima shina ayudashcata ricurca. Huauqui Julespish: “Mushuj congregacionpi achca mushuj amigocunata charishcamantami cushilla sintirini. Chaimi shujtaj congregacionman pasashpaca llaquilla sintirisha” nircami.