TUCUICUNAMI CꞌUYAITA RICUCHINA CANCHIJ. Tucui shunguhuan cꞌuyashpaca ñucanchij familiahuanpish, amigocunahuanpish, rijsishcacunahuanpish allimi apanacushun. Shinallataj cꞌuyaita charishpallami ñucanchijcunaca cushilla, tranquilo causaita charishun. Chaimantami cꞌuyaita charinaca minishtirishca can. Pero ¿ima laya cꞌuyaitataj ricuchina canchij?

Enamorarishpa cꞌuyaita ricuchinallamantaca mana parlacunchijchu. Chashna cꞌuyanapish allimi can. Pero cunanca, shujtajcunamanta preocuparishpa cꞌuyaita ricuchinamantami parlagrinchij. Diospaj Shimita yachashpami shujtajcunata shungumanta cꞌuyanata yachashun.

Bibliapica: “Cꞌuyaita charijca llaquita apajmi, alli shunguyujmi, cꞌuyaita charijca mana shujtajpajta munanchu, cꞌuyaita charijca mana jatun tucunchu, mana yanga atirinchu. Maipish cachun mana imata ruranchu, mana paipajlla mashcanchu, mana yallitaj pꞌiñarijchu, llaquichijpipish mana yuyaipi charicunllachu. Cashcata mana rurajpica mana cushicunchu, chaipaj randica imapish mana llulla cajpimi cushicun. Tucui llaquita apanllami, tucuita crinllami, tucuita shuyanllami, tucuita ahuantanllami. Cꞌuyaica manataj tucuringachu” ninmi (1 Corintios 13:4-8).

“Cꞌuyaica manataj tucuringachu”. Chaimantami shujtajcunata punllanta cꞌuyashpa catina canchij. Shinallataj llaquijcuna, perdonajcunami cana canchij. Bibliapica: ‘Cꞌuyaica tucuicunata shujllata rurajmi, tucui imatapish pajtachijmi’ ninmi (Colosenses 3:14, QC, 1989). Shujtajcunamanta sustarishpa cꞌuyaita ricuchishpaca cushillami causashun. Cunanca, cazarashcacuna cꞌuyaita ricuchinamanta yachashun.

Jesusca cazarashcacuna ima shina causanatami mandarca. Paica: “Cꞌarica, yaya mamata saquishpa, paipaj huarmihuan tandanacushpa, ishquindijmanta shuj aichallami tucunga. Dios tandachishcataca, ni pi amataj chꞌicanyachichun” nircami (Mateo 19:5, 6). ¿Cai versocunamantaca imatataj yachai tucunchij?

‘CUSA HUARMIPISH ISHQUINDIJMANTACA SHUJLLA AICHAMI TUCUNGA’ nishpaca Jesusca cusandij huarmindij tucui shunguhuan cꞌuyanacunamantami parlacurca. Ñucanchij cusata o huarmita tucui shunguhuan cꞌuyashpaca mana shujtaj cꞌarita o huarmita munashunchu (1 Corintios 6:16; Hebreos 13:4). Shujtajhuan juchata rurajpica ñucanchij cusa o huarmica ñucanchijpi confianzata ña mana ashtahuan charingachu. Maipicarin divorciarinamanmi chayai tucushun. Ñucanchij huahuacunapish paicunata ña mana cꞌuyashcata yuyashpami llaquilla sintiringacuna.

CAZARANACA DIOSPAJ ÑAUPAJPICA MANA SHUJ PUGLLAICHU CAN. Chaimantami Jesusca: “Dios tandachishcataca, ni pi amataj chꞌicanyachichun” nirca. Cazarana mana shuj pugllai cashcata yachashpaca cusa huarmica ama separaringapajmi achcata esforzarina can. Shinallataj cꞌuyanacunata yachajcuna cashcamantami ima llaqui ricurijpipish chai llaquitaca ahuantai tucungacuna. Ashtahuancarin casilla, sumaj causaita charingapajmi sinchita esforzaringacuna.

Huahuacunaca paicunapaj yaya mama cꞌuyarishpa causajta ricushpaca cushillami sintiringacuna. Shuj soltera huarmica: “Ñuca yaya mamaca paicunapuraca achca cꞌuyaita, respetotami ricuchincuna. Ñuca yaya caitami o chaitami rurana canguichij nijpica ñuca mamaca pai nishcatami apoyan. Ñuca mama layami ñucapish casha nini” ninmi.

Bibliapica: “Diosca cꞌuyajmari” ninmi (1 Juan 4:8). Shinallataj paica cushi Diosmi can (1 Timoteo 1:11, NM). Efesios 5: 1, 2 pica: “Diosta ricushpa catijcuna caichij. Cristo ñucanchijta cꞌuyashca shina, cꞌuyanacushpa purichij” ninmi. Chaimantami ñucanchijpish Yaya Dios shina cꞌuyaj, llaquij, perdonaj cashpaca cushilla causashun.