MILLAI UNGÜITA CHARISHPA O DISCAPACITADO SAQUIRISHPACA LLAQUILLAMI CAUSAI TUCUSHUN. Ulf runaca cushilla, sano causaitami charirca. Pero paipaj huashata operashca horasmantami purinata ña mana valirca. Cai runaca: “Chai llaquita charishcamantami llaquilla causai callarircani, imata rurangapajpish animota mana charircanichu” nircami.

Ulf runa layallatajmi ñucanchijpish ima ungüita o llaquita chari tucunchij. Ñucanchij saludta cuidashpaca huaquin ungüicunataca mana charishunchu. Pero chashna cuidaricushpapish shuj millai ungüi japijpica ¿imatataj rurashun? ¿Cai ungüimantachu siempre llaquilla causana canchij? Mana. Cai temapimi chashna ungüita charishpapish cushilla causangapaj imata rurana cashcata yachashun. Cunanca alli saludta charingapaj ima shina cuidarina cashcata ricushun.

IMAPIPISH CONTROLARIJ CAI (1 Timoteo 3:2, 11, NM). Dimastij micushpa, ubyashpaca ñucanchij saludtami dañai tucushun. Ashtahuancarin cullqui valimi saquirishun. Chaimantami Bibliapica: “Vinollata ubyajcunahuanpish, aichallata micujcunahuanpish pajta tandanacunguiman. Machajcunapish, yalli micujcunapish huajchayanllami” nin (Proverbios 23:20, 21).

CAMBAJ CUERPOTA IMAHUANPISH AMA MAPAYACHICHU. Bibliapica: “Ñucanchij aichatapish, yuyaitapish mapayachicujtaca tucui anchuchishunchij” ninmi (2 Corintios 7:1). Gentecunaca yallitaj tragota ubyashpa, tabacota chupashpa, drogarishpami paicunapaj cuerpota mapayachincuna. Por ejemplo, Centros para el Control y la Prevención de Enfermedades de Estados Unidos nishcaca: “Yallitaj tabacota chupashcamantami gentecunaca achca ungüicunata charincuna. Tabacoca casi tucui cuerpotami dañai tucun” ninmi.

CAMBAJ CAUSAITAPISH, CUERPOTAPISH VALORAI. Bibliapica: “Taita Dios causaita cujpimi causanchij, purinchij” ninmi (Hechos 17:28). Ñucanchij causaita valichishpaca huañunalla trabajocunapi mana trabajashunchu. Carrotapish mana loco laya manejashunchu. Shinallataj huañunalla pugllaicunapi participashpaca cojocuna, suchucuna o lisiadomi saquiri tucushun. Chaimantami chai pugllaicunapi mana participana canchij.

AMA YALLITAJ CULIRAICHU, SUSTARICHU. Ñucanchij yuyaicuna alli cajpica ñucanchij cuerpoca allimi sintiringa. Chaimantami mana dimastij sustarina canchij,  imamantapish mana rato culiranachu canchij. Shinallataj shujtajcunata envidiashpa mana alli yuyaicunataca mana charinachu canchij. Salmo 37:8-pica: “Pꞌiñarinata saqui. Pꞌiñarinata cungari” ninmi. Shinallataj, Mateo 6:34-pica: “Caya punllaca imashi tucushun nishpa, ama huañuricuichijchu. Punllantami ima llaqui cashpapish tiyan” ninmi.

ALLI YUYAICUNATA CHARI. Proverbios 14:30-pica: “Cushijlla shunguca, aichamanpish causaita cunmi” ninmi. Shinallataj, Proverbios 17:22-pica: “Cushijlla shunguhuan causanaca, aichapajpish alli jambimi” ninmi. Cientificocunaca alli saludta charingapajca cushillami causana canchij nincunami. Por ejemplo, Ministerio de Salud de Escociapi trabajaj, doctor Derek Coxca: “Shungupi llaquilla causajcunaca achca ungüicunatami chari tucun. Cutin, cushilla causajcunaca mana tanto ungüicunata charincunachu” nircami.

LLAQUICUNATA CHARISHPAPISH CUSHILLA CAUSAI. Ulf runa layallatajmi millai ungüicunata charishpaca llaquilla sintiri tucunchij. Pero, chai ungüihuan ima shina causanatami yachana canchij. Huaquin gentecunaca millai ungüita charishcamantami llaquilla sintirishpa ashtahuan llaquicunata chari tucuncuna. Chaimantami Bibliapica: “Imata ruranapipish mana cꞌari cꞌari cajpica, imapish ashtahuan ashtahuan sinchimi ricuringa” nin (Proverbios 24:10).

Achca gentecunami chashna llaquicunahuan cashpapish ima shina cushilla causanata ashtahuan mashcashcacuna. Ulf runaca paipaj llaquicunallapi ama yuyangapajmi Yaya Diosta mañarca, chai llaquihuan ima shina causanatami Bibliapi mashcarca. Chashnami llaquilla causanapaj randica cushilla causai callarirca. Shinallataj shujtajcunapish pai shinallataj llaquita charijta ricushpami ima shina llaquij, cꞌuyaj canata ashtahuan yacharca. Ulf runaca llaquij canata yachashcamantami cunanca Diospaj Shimita shujtajcunaman yachachicun.

Steve shuti runapish 15 huatata charishpami shuj llaquita charirca. Paica yuramanta urmashcamantami paipaj cuerpoca cungamanta uriman mana cuyuri tucushpa saquirirca. 18 huatacunata charishpami recién paipaj rigrata cuyuchi tucurca. Qꞌuipaca universidadmanmi yaicurca. Chaipimi huainayanapi, machanapi, drogarina viciopi urmarca. Chashna causaita charishcamantami causaica imapajpish mana valij shinata ricurca. Pero Bibliata yachai callarishpami paipaj causaica valishca cashcata intindirca. Chaimantami Steveca mapa viciocunata saquirca. Paica: “Achca huatacunatami causaica ñucapajca mana valij shinata ricurcani. Pero cunanca, Bibliata yachashcamantami cushilla, sumajta causani” nircami.

Steve, Ulf runacunapaj causaica Salmo 19:7, 8-pi ima nishcatami yuyachin. Chaipica: “Mandaj Dios mandashcaca ima mana pandachu. Ashtahuanpish almata mushujyachijmi. Mandaj Dios mandashcacunaca mana pandachu. Ashtahuanpish shunguta cushichijmi. Mandaj Dios ima shina causachun nishcacunaca chuyami, ñahuicunatapish achijyachijmi” ninmi.