Alli trabajajcunaca imapi trabajanataca mana manchancunachu. Ashtahuanpish paicunaca achcatami trabajanata munancuna. Shinallataj paicunapajca shujtajcunata ayudanami ashtahuan importante can.

Tucuicunami trabajana canchij. Cunan punllacunaca achca gentecunaca trabajanata mana munancunachu. Pero ñucanchijca alli trabajador cashpallami alli causashun (Eclesiastés 3:13).

Shuj jovenca: “Alli trabajador cashcamantami cushilla sintirini. Trabajanatapish achcatami munani. Chaimantami shujtajcunaca ñucataca alli ricun” ninmi.

BIBLIAPICA: “Tucui yuyaihuan imatapish rurajpica, japinapish tiyanmi” ninmi (Proverbios 14:23).

Trabajana munaita charingapajca caita rurai.

Imatapish allita ruranata yachai. Huasipi, escuelapi o trabajopi imata ruracushpapish allita rurangapajmi achcata esforzarina cangui. Shuj trabajota ña ruranata yachashpapish ashtahuan alli trabajador cangapaj o mana cashpaca imatapish rato rurangapajmi esforzarina cangui. Alli trabajashpaca canllatajmi cushilla sintiringui.

BIBLIAPICA: “¿Imata ruranatapish alli yachaj runa maipi cajta ricushcanguichu? Paica yanga runacunapajtaca mana ruranchu, ashtahuanpish jatun mandajpajmari imatapish ruran” ninmi (Proverbios 22:29).

Shujtajcunata ayudai. Can imata ruranata alli pajtachishpaca shujtajcunatami ayudangui. Por ejemplo, huasipi mandadocunata rurashpaca cambaj familiatami alli ayudangui.

BIBLIAPICA: “Imatapish cujmi, cushcata japijta yalli cushicun” ninmi (Hechos 20:35).

Ama jahua jahualla trabajaichu. Shujtajcuna ‘caita rurai’ nichunca mana shuyanachu cangui. Paicuna imata rurachun mana mañajpipish ayudadormi cana cangui. Chashnami cambaj causaitaca canllataj alli mandai tucungui. Mana shujtajcuna obligashcallamantachu trabajana cangui. Ashtahuanpish can munashcamantami alli trabajana cangui (Mateo 5:41).

BIBLIAPICA: “Can allita rurasha nishpaca, ama ñuca nishcallamanta, ashtahuanpish cambaj quiquin munaimanta rurangui” ninmi (Filemón 14).

Trabajollapi ama yuyaichu. Alli trabajador canaca mana nisha ninchu burro laya trabajana. Trabajanata munashpapish samarinami cangui.

BIBLIAPICA: “Ishqui maqui jundata trabajashcapish, yuyaita shaicuchinallami. Chaipaj randica, shuj maqui jundallata trabajashpa, ashata samarinaca ashtahuan allimari” ninmi (Eclesiastés 4:6).