Áicap ancha ashca paran o ashpa sinchít cuyucun o suj sinchi huaira amun y túcuy apisckancu chincacun, Jehóvap testigusnin yanapáypaj huauckesniycuta ima usushcancu ligerút túcuy precisasckancuta preparaycu. Chá esfuersus ima ’ruaycu ckaachin ima ashcata munanacuycu (Juan 13:34, 35; 1 Juan 3:17, 18). ¿Imaina huauckespura yanapacuycu?

Ckoshckean yanapaycu. Áicap Judeapi suj atun yárckay amora, cristianus Antioquiamanta ckoshcketa cacharancu, huauckesnincu espiritualesta yanapáypaj (Hechos 11:27-30). Cunan punchau quiquin ’ruacun, áicap yachaycu ima huauckesniycu huaquin laupi mundumanta usushcancu, congregaciunmanta cajcuna atisckaycuta churaycu y cachaycu yanapacúypaj (2 Corintios 8:13-15).

Precisacusckanpi yanapát ckoycu. Huauckes capacitasckas ima chá laupi causancu, mascancu túcuy huauckesnincuta ima congregaciunninmanta cancu y allít tianancuta aseguracuncu. Suj grupu huauckesmanta encargacun entregáypaj micuna, yacu, ropa, medicus atendecunánpaj y huasít apinancúpaj. Ashca testigus esperienciáyoj yanapáypaj ’rincu, huasista o Huasista tantacunasmanta allicháypaj y sapa suj gastusnincuta pagaracuncu. Cuscayascka tiaycu y esperiencia apiycu chayraycu cuscas llamcaycu y ligerút yanapáypaj ’riycu, chá sajra momentuspi. «Picunasta nockaycuan fepi tiancu» yanapacuycu, y picunastapas sujcuna religiunmanta cancu (Gálatas 6:10).

Yanapaycu usushcaptincu y Bibliaan consuelút ckoycu. Picunas mana alli imastis usushcancu, ashca consuelu y animu precisancu. Chá momentuspi, Jehová, «Yaya túcuy consuelumanta», fuersata ckocun (2 Corintios 1:3, 4). Chayraycu, picunasta llaquisckas tiancu, Biblia nisckanta yachachicuycu, yachanancúpaj ima Yáyap Reinun mana unas puchúcaj ’rin tucuyuan ima causayniycupi nanachiaycu y usuchiaycu (Revelación 21:4).

• ¿Imajchus Testigus ligerút yanapaycu áicap ancha ashca paran o ashpa sinchít cuyucun o suj sinchi huaira amun y túcuy apisckancu chincacun?

• ¿Ima consuelu ckoycu picunasta causascka cuterancu?