Ari, Yaya Dios paihua Shimihua llaquirijcunara animachina ushan (2 Corintios 7:6). Biblia ambimanda libro mana ashas ashca huañungaj munaj runaunara yanapashca. Biblia valishca camachishcauna candas yanapana ushanmi.

•  ¿Ima valij camachishcaunara Biblia cun?

•  ¿Causasha catingaj mana munaj runaunamanda Biblia rimanzhu?

•  ¿Ima Bibliamanda textoguna yanapana ushan causasha catingaj mana munajpi?

•  ¿Imara rurana ushanchi shu amigo ña mana causasha catingaj munani nijpi?

•  ¿Imara tucunma ñaupa huras huañuna iyaira ña charishca asha?

• ● Camba sintishcaunamanda rimai.

   Biblia ninmi: “Ali amigo tucui huras llaquinmi shinallara turmindus tiashcai shu huauqui an” (Proverbios 17:17).

   Intindichishca: Llaquirishca, turbarishca sintirishcai yanapaira ministinchi.

   Can llaqui sintishcara pihuas mana cuintajpi, cai sintishca mirarisha catinga. Randi, can sintishcaunara rimajpi cai llaqui sintishcauna pishiyasha ringa, shinallara mana yapa turbaringaraungui can charishca llaquiunamanda.

   Caita rurai: Cunalla shu ailluhua, ali amigohua cuintari. a Shinallara can sintishcaunara quillcana ushangui.

• ● Doctormanda yanapaira mascai.

   Biblia ninmi: “Aliuna doctorda mana ministinaun, astaun ungushcauna ministinaunmi” (Mateo 9:12).

   Intindichishca: Ungushca ashcai doctorma rina anchi.

   Huañuna iyaigunara charishaga umamanda shu tunu ungüi ana ushan. Cai tunu ungüi charisha mana pingarinachu anchi. Shuj ungüiguna cuinta an, yanapai tianmi.

   Caita rurai: Cai tunu ungüimanda yachaj doctor yanapaira uctalla mascai.

• ● Iyari Yaya Dios canda llaquinmi.

   Biblia ninmi: “¿Manzhu pichca ichilla pishcu ishqui reallla valin catungaj? Shina ajllaira chi pishcuunamanda Dios mana shujllas cungarinzhu. [...] Ama manzhaichichu, ashca pishcuunamanda yali valij anguichi” (Lucas 12:6, 7).

   Intindichishca: Yaya Dioshuaj yapa valishcami angui.

   Can sapalla sintiringuichari, shinajpi mana shinachu. Dios yachanmi can imasna sintishcara. Causasha catingaj mana munajpis Dios canda yanapana munanmi. Salmo 51:17 nin, Yaya Dios shu “pitirishca, nanarishca shungura” chasquinmi. Cai intindichin, Dios can causasha catichu munanmi canda llaquishcamanda.

   Caita rurai: Dios canda sirtu llaquishcara yachangaj Bibliara ricui, Acerquémonos a Jehová nishca libro capítulo 24 ricuchin imarasha quirina ushanchi Yaya Dios ñucanchira llaquishcara.

• ● Diosta mañai.

   Biblia ninmi: “Canguna tucui turbarishcara paihua ahuai churaichi, pai cangunara cuiranmi” (1 Pedro 5:7).

   Intindichishca: Dios munan can tucui sintishcaunara, turbarishcaunara paita cuintachu.

   Dios ganaslla sintinara ursaras canda cuna ushanmi ñaupajma catichu (Filipenses 4:6, 7, 13). Shina yanapan paita ali shunguhua mañajcunara (Salmo 55:22).

   Caita rurai: Cunalla Diosta mañai. Paihua shuti Jehovara rimasha can sintirishcara cuintai (Salmo 83:18). Ñaupajma catingaj yanapaira mañai.

• ● Shamuj punzhaunaj Dios cushca chapanara iyari.

   Biblia ninmi: Causangaj “cai ali chapanara charinchi, shu almara huatana cuinta” (Hebreos 6:19).

   Intindichishca: Imasna shu shinzhi huaira tamia shamujpi barcura shinzhira cuyuchin, shinallara ali ashas cungaimanda llaqui sintirina ushangui. Shinajpi, imasna iru apichina garabatu barcura apichin, shinallara Dios cushca chapana ahuantasha catingaj yanapan.

   Cai chapana mana shu muscuilla an, Dioslla paihua Shimii quillcachishca imasna tucui ñucanchi turmindusgunara tucuchinga (Apocalipsis 21:4).

   Caita rurai: Cai Dios chapanamanda mas yachangaj Yaya Dios partimanda ali gustu cuintashcauna quillcai punto 5 ricui.

• ● Can gustashca ruranara rurai.

   Biblia ninmi: “Cushi shungura charisha ali ambi cuinta an” (Proverbios 17:22).

   Intindichishca: Ñucanchi gustashca ruranara rurasha ali angaj, cushi angaj yanapan.

   Caita rurai: Can gustashca ruranara rurai. Cushiyachij musicara uyai, animachij quillcaunara leai. Shinallara shujcunara yanapasha cushi sintirina ushangui (Hechos 20:35).

• ● Mana unguringaj cuirari.

   Biblia ninmi: “Aichara shinzhiyachina ansalla valin” (1 Timoteo 4:8).

   Intindichishca: Ejercicio rurana, ali puñuna, ali micuna mana unguringaj yanapan.

   Caita rurai: Ansa minutuguna pujllangaj llucshi.

• ● Iyari sintishcaunara, shuj cosasgunara turcarina ushan.

   Biblia ninmi: “Caya tucunara mana yachanguichi” (Santiago 4:14).

   Intindichishca: Charishca llaquiuna, mana alichingajlla ashas timpu pasashcai alichina ushanmi.

   Cuna shinzhi llaquiunara charishas huasha alichina ushanmi. Chimanda ñaupajma cati (2 Corintios 4:8). Imasna ña ricushcanchi can charishca llaquiuna alichina usharin, shinajpi can huañujpi imaras mana rurana ushangui.

   Caita rurai: Yapa llaqui sintirisha, huañungaj munaj runaunamanda Biblia cuintashcaunara leai. Yachai imasna paiguna causai turcarica mas ali angaj, paiguna mana iyashca tunuunahua. Huaquin ejemplogunara ricui.

 Ari. Biblia riman huañuna munani nij runaunamanda. Yaya Dios paigunahua piñana randimanda paigunara yanapaca. Shinallara canda yanapana ushanmi.

Elías

•  ● Elías ¿pita aca? Pai mana manzhaj profeta ashallara maicambi yapa llaquirishca sintirica. Santiago 5:17 nin, Elías “ñucanchisna sintij runa” aca.

•  ● ¿Imarasha huañungaj munaca? Shu punzha, Elías sapalla sintirica, manzhaira charisha iyangaj callarica imajpas mana valinichu nisha. Chimanda Diosta rugaca: “Ayailla Jehová ñuca causaira quichuhuai” (1 Reyes 19:4).

•  ● ¿Imara paita yanapaca? Paihua shungura pascasha, pai sintishcaunamanda Jehovara rimaca. ¿Imasnara Jehová paita animachica? Jehová Eliasta yanapangaj munashcara ushashcaras intindichingaj paihua atun ushaira ricuchica. Shinallara ñucaj valishca runa angui nica, astaumbas shu ali yanapaj cuca paita cuirasha catichu.

•  ▸ Eliasmanda leai: 1 Reyes 19:2-18.

Job

•  ● Job ¿pita aca? Shu Diosta chuyaj sirvij, cullquiyuj runa aca, shinallara atun aillura charica.

•  ● ¿Imarasha huañungaj munaca? Cungaimanda, paihua causai yapa shinzhi tucuca. Tucui pai charishcaunara pirdica, pai churiuna llaquinaita huañunuca, shinallara pai shu milli ungüira apica. Astaumbas pai pasaushcara quiquin culpamanda an nisha taripanuca. Yapa desanimarishca sintirishcamanda nica: Ña “mana causasha catina munani” (Job 7:16).

•  ● ¿Imara paita yanapaca? Job Jehovara mañaca, shinallara shuj runaunahua cuintarica (Job 10:1-3). Shu llaquij amigo Elihú shuti paita animachica, pai charishca turmindusgunara ali ricungaj yanapaca. Astaun Dios camachishcara, paihua yanapaira ali shunguhua chasquica.

•  ▸ Jobmanda leai: Job 1:1-3, 13-22; 2:7; 3:1-13; 36:1-7; 38:1-3; 42:1, 2, 10-13.

Moisés

•  ● Moisés ¿pita aca? Ñaupa Israel llactamanda pushaj aca, shinallara chuyaj shungu profeta aca.

•  ● ¿Imarasha huañungaj munaca? Moisés ashca tarbanara charica, israelita runaunara paita camisha rimajcuna aca, yapa sambayashca sintirica. Chimanda Diosta rugaca casna nisha: “Cunashituallara huanchihuai” (Números 11:11, 15).

•  ● ¿Imara paita yanapaca? Moisés pai imasna sintishcara Diosta cuintaca, Dios shuj yanapajcunara cuca pai mana ashca tarbanara charichu.

•  ▸ Moisesmanda leai: Números 11:4-6, 10-17.