Shu yachachij nin: “Chara mana yachanchi Dios shu shuti charishcara shinallara mana yachanchi maican ashcara” (David Cunningham Theological Studies nishca paihua libroi).

Diosllara nica: “Ñuca Jehovami ani. Chimi ñuca shuti” (Isaías 42:8). Diospa shuti Jehová hebreo shimii an, nisha nin: “paillarami ruran imaras tucuchu” (Génesis 2:4, nota).

Jehová munan ñucanchi paihua shutira utilizanuchu. Biblia nin: “Paihua shutira rimasha mañaichi, pai rurashcaunara llactaunais ricsichichi! Paihua shutimanda sumajyachishcara rimaichi” (Isaías 12:4).

Jesús Diospa shutira utilizaca shinallara paita catijcunara yachachica. Shu punzha paihua Yayara mañaushcai nica: “Ñuca camba shutira paigunama ricsichishcani”. ¿Imarasha caita rurarca? Paillara huasha nica: “Can ñucara llaquishca sami llaquina paigunajpi tiachu, ñucas paigunajpi” (Juan 17:26).

Religionmanda yachachij Walter Lowrie quillcaca: “Diospa shutira mana ricsij runa mana yachana ushan pai imasna ashcara [...] pai imasna ashcara mana yachasha paita mana llaquina ushan”.

Victor shutiyuj runa tucui semanaguna iglesiama rij aca, shinajpi Diosmanda mana imas yachaca. Pai nica: “Diospa shuti Jehová ashcara yachashcai paita ricsingaj callarishcara sinticani, ashca cuti paimanda uyacani shinajpi cunalla ricsicani. Dios ñucaj ricsishca tucuca, chi hurasmanda pai ñuca amigo an”.

Jehová ‘paihua shutira iyarijcunama’ mayanllan, chimanda nin: “Paigunara ali shunguyuj ashcara ricuchishami, imasna shu runa llaquij shungura ricuchin paita sirvij churira” (Malaquías 3:16,17). Yaya Dios paihua shutira rimajcunaras bendicianmi. Biblia nin: “Tucui Jehová shutira cayaj quishpichishca anga” (Romanos 10:13, TNM).