Paddington llactai pagaricani, Londres (Inglaterra) partii. Ñuca causacani ñuca mamahua, quinsa ñañaunahuas. Ñuca yaya shamuca, rica ñucanchi causaimanda pai ashca tragura upij ashcamanda.

Huahua ashcai, ñuca mama yachachihuaca tutai Diosta mañangaj. Shu ichilla Biblia charicani Salmos librollara chiraigu musicara rurarcani cai Salmogunara cantangahua. Shu punzha leacani cai shimiunara shu libroi: “Shu punzha, mana caya punzha tiangami”. Cai shimiunai iyarishcamanda tutai mana puñuna ushacani shamuj punzhaunai iyarisha. Iyacani: “Ima mas charishun. ¿Imara caibi rurauni?”. ¡Ñuca mana huañuna munacani!

Mas yachana munacani supaigunamanda. Chiraigu, huañushcaunahua cuintaringaj munacani, huañushcauna pambashca puistuma escuelamanda amigogunahua rij acanchi. Pariju manzhaisiqui videogunara ricungaj llutaricanchi. Cai ñucanchira manzhachishas, cushi sintichica.

10 huata charishcai, ña manalira causangaj callaricani. Tabacura chupangaj callarisha tucui huras caita ruraj acani. Huasha marihuana tsungangaj callaricani. 11 huatauna charishcai tragura upingaj callaricani, mana gustashallara machashca anara gustahuaca. Musicara gustasha, bailasha tucui huras istaunama discotecagunama rij acani. Huasimanda miticusha tutai rij acani mana pis ñucara ricushcai huasima icuj acani. Cayandi punzhai, ashca sambayashca ashcamanda escuelama mana ricani. Escuelai ashcai, yapa tragura upij acani.

Tucuri huata escuela ashcai, ñuca notaguna yapa pishi anuca. Ñuca mama mana yachaca imasna ñuca manalira ruraj ashcara chiraigu llaquirisha piñarica ñucahua. Piñanusha huasimanda ricani. Ansa timpu Tony, ñuca noviohua causacani pai rastafari nishca aca. Pai shuhuaj, drogagunara catuj, macaisiqui ashcamanda ricsishca aca. Chi huasha icsayacani 16 huata charishcai. Ñucanchi punda huahuara charicani.

Jehovahuaj testigogunara ricsicani, ñuca shu huasii mana casarashca mamaunama paihua churiunama cushcai. Chibi causangaj ushacani ñuca llactai apuuna yanapaihua. Ishqui Testigo huarmiuna caran ratu shamunuca malta mamaunama pasiangaj. Shu punzha paigunahua pariju cuintaringaj callaricani Testigoguna pandarishca ashcara ricuchingaj. Shinajpi paiguna tucui ñuca tapuigunara alinlla, intindinalla shimiunahua Bibliamanda cutipanuca. Ashcara gustahuaca paiguna llaquishcara ricuchishcamanda. Chiraigu paigunahua Bibliara estudiangaj callaricani.

Cuna yachangaj callaricani Biblia ñuca causaira turcachica. Huahuamandapacha manzhai charicani mana huañungaj shinajpi intindicani Jesús ima nishcara huañushcauna causarinamanda (Juan 5:​28, 29). Shinallara yachacani Dios ñucara llaquishcara (1 Pedro 5:​7). Jeremías 29:11 rimashcara ñuca shunguma pactaca chibi nin: “Ñucallara alimi ricsini ima iyaigunahua cangunamanda iyauni -caimi Jehová rimashcauna-, ganaslla, mana llaqui iyaigunas, suni causaira shu chapanaras cungaj”. Quiringaj callaricani ñuca huiñaigama cai Allpai shu paraíso tucushcai causangaj ushangaraushcara (Salmo 37:29).

Jehovahuaj testigoguna llaquishcara ricuchinuca. Punda paiguna tandarinaunama rishcai, ricucani parijumanda llaquinushcara. Ali anuca (Juan 13:​34, 35). ¡Shuj tunu aca imasna iglesiai ñucara tratanushca cuinta! Testigoguna mana rimanuca ñuca pasaushcamanda. Paihua timpu, llaquishcara yanapaira cunuca. Sinticani shu aillu cuinta.

Bibliara estudiashcai, intindicani ñuca causaibi turcarina ashcara Jehová Dios munashca cuinta causangaj. Shinzhi aca tabacura chupana saquingaj. Astaumbas, riparacani maican musicaguna animachihuaca marihuana tsungangaj chiraigu shuj tunu musicagunara uyangaj callaricani. Istaunama discotecagunamas ña mana ricani, chibi tragura upingaj tintana tiana ashcara. Mushuj amigogunara mascacani, ñuca ali causangaj yanapaj amigogunara (Proverbios 13:20).

Chi timpui, Tony shinallara Bibliara estudiaj aca Jehovahuaj testigogunahua. Paihua tapuigunara cutipasha, Bibliai pai mas quirica pai yachaushca sirtu shimi ashcara. Ashca turcaigunara rurarca paihua causaibi: paihua macaisiqui amigogunamanda caruyaca, ña mana shuhuaca, ña marihuana mana tsungaca. Shinajpi Jehová Diosta sirvingaj pai munashca cuinta, ñucanchi casarana acanchi ñucanchi churi ali causachu. Chiraigu 1982 casaracanchi.

Iyarini ñuca La Atalaya, ¡Despertad! a revistagunai cuintashcauna mascacani, ñuca turcarina munashcara rurashca cuinta cuintashcauna. Paiguna pasashca animachihuaca, ursara cucami ñaupajma catisha mana sambayangahua. Tucui huras Jehová Diosta mañacani mana ñucara saquihuachu nisha. Tony ñucahuas Jehovahuaj testigoguna cuinta julio 1982 huatai bautisaricanchi.

Jehovahuaj amiga tucuna ñuca causaira quishpichica. Tony ñucahuas ricucanchi imasna Jehová Dios yanapaun shinzhi timpuunai pasaushcai. Yachaushcanchi paihuajpi confiangaj turmindusgunara charisha, pai imasna ñucanchi aillura cuirashcara sinticanchi (Salmo 55:22).

Ali ashca ñucanchi churira ushushiras Jehovahuaj amigoguna tucunuchu yanapangaj. Shinallara cuna ashca cushi sintirini ñuca churimanda huahuaunara Jehová Diosta ricsisha catiushcara ricusha.

Ña tutaunai mana lliccharisha saquirini shamuj punzhaunai, huañunai iyarisha. Tony ñucas caran semana Jehovahuaj testigoguna congregaciongunara pasiasha ñucanchi turi ñañaunara. Paigunahua huangurinchi runaunara yachachinchi paiguna Jesuspi quirisha, huiñai huiñaigama causana ushanunga nisha.