Bibliaqa manam ninchu taytacha-mamachata mañakunapaqqa. Aswanqa ninmi Diosllata mañakunanchikpaq. Jesuspas qatiqninkuna pita mañakunankupaq yachachispanmi kaynata nirqa: “Qamkunaqa kaynatam mañakunaykichik: ‘Hanaq pachapi taytayku sutiki chuyanchasqa kachun’”, nispa (Mateo 6:9). Jesuspa nisqanman hinaqa manamá taytacha-mamachakunataqa mañakunanchikchu nitaq angelkunatapas, aswanqa taytanchik Jehova Diosllatam.

 Jesusqa nirqataqmi: “Ñuqam kani ñan, chiqap kaq chaynataq kawsay quqpas. Ñuqantakamallam pipas taytaymanqa asuykun”, nispa (Juan 14:6). Chaynaqa, Jesusnintakamallam Jehova Diosmanqa asuykuyta atichwan (Hebreos 7:25).

¿Diosta mañakuchkaspapas mañakuchwanchu taytacha-mamachakunata?

 Yupaychaqninkunaman 10 kamachikuykunata qusqanpim Dios kaynata nirqa: ‘Ñuqaqa kani yupaychasqayki tayta Diosmi. Ñuqaqa manam munanichu sapaq diosta adoranaykichiktaqa’, nispa (Exodo 20:5, Chuya Qellqa, CQ). Jehova Diosninchikqa payllata yupaychananchiktam munan. Chaymi payllata mañakunanchik (Isaias 48:11, CQ).

 Angelkunata utaq taytacha-mamachakunata mañakuspaqa taytanchik Jehovatam llakichichwan. Apocalipsis qillqapipas willawanchikmi huk angelta yupaychananpaq apostol Juan qunqurakuykusqanmanta. Ichaqa angelmi kaynata nirqa: “¡Ama chaytaqa ruwaychu! Ñuqaqa Jesusmanta willakuq iñiqmasikikunapa serviqmasillanmi kani chaynataq qampa serviqmasillayki, Diosllatayá yupaychayqa”, nispa (Apocalipsis 19:10).