Manam. Bibliaqa achka kutikaman ñawpaqtaqa copiasqa karqa chaywanpas ñawpaq bibliawan kunan biblianchikta tupachiptinchikqa hina kaqllam, chayraykum nichwan bibliaqa mana cambiasqa kasqanta.

 Kunanqa achka copiasqanku bibliakunatam tarirunku, chayta qawaspam yacharunku wakin biblia copiaqkunaqa pantasqankuta, ichaqa manam llumpaychu hina chayllamantam rimachkan. Wakin bibliata copiaqkunam ichaqa bibliata copiasqankupi ima piensasqankutaña yaparurqaku, chaynapi yachachiy munasqankuwan tupananpaq. Chaykunamantayá yachaykusun.

1.   Wakin copiasqanku bibliakunapim 1 Juan 5:7 kaynata nichkan: “Hanaq pachapi Dios Tayta, Dios Churi, Dios Chuya Espiritu, kay kimsanmi huklla kanku”, nispa. Ichaqa kayqa manam ñawpaq bibliakunapiqa rikurinchu, chaytaqa wakin biblia copiaqkunañam yaparurqaku chaymi wakin bibliakunapiqa mana kanchu. a

2.   Ñawpaq bibliakunapiqa achka kutikamam Diospa sutinqa rikurichkan, wakin biblia copiaqkunam ichaqa Diospa sutinta churanankumantaqa “señor” utaq “Dios” nispallaña churarunku.

 Ñawpaq bibliakunaqa kunanqa achkam kachkan, chay bibliakunata qawaspankuqa ¿pantaykunata tarirunkuraqchu? Chaymantayá yachaykusun. b

•   Ñawpaq testamentomanta rimaspanmi William Henry Green sutiyuq runa nirqa: “Manam mayqan ñawpaq qillqatapas bibliata hinaqa imam kaqtaqa copiarqakuchu”, nispa.

•   Musuq Testamentomanta rimaspañataqmi chaymanta yachaq Frederick Bruce sutiyuq runa nirqa: “Musuq testamentopaqqa achkam kachkan ñawpaq copiankuna, wakin ñawpaq qillqakunapam ichaqa mana kanchu, chaywanpas chay qillqakuna chiqap kasqanmantaqa manam iskayrayankuchu”, nispa.

•   Ñawpaq bibliakunamanta yachaq Sir Frederic Kenyon, sutiyuq runapas nirqam: “Achka kutikama copiasqa kachkaspanpas bibliaqa mana pantayniyuqmi kachkan, makinchikpi bibliaqa Diospa palabranmi, kaynatam Diosqa ñawpaqpi serviqninkunata rimapayarqa”, nispa.

•   Wakin biblia copiaqkunaqa karqaku Israel runakunam, chaywanpas manam biblia copiasqankupiqa Israel llaqtapa pantasqankutaqa hurqururqakuchu (Numeros 20:12; 2 Samuel 11:2-4, Chuya Qellqa, CQ; Galatas 2:11-14). c Chaymantapas biblia copiaqkunaqa manam hurqururqakuchu Israel nacionpa mana kasukusqankutaqa nitaq pantay yachachikuyman wichisqankutaqa (Oseas 4:2; Malaquias 2:8, 9, CQ; Mateo 23:8, 9; 1 Juan 5:21). Chaywanmi yachanchik biblia copiaqkunaqa Diosta manchakusqankuta chaynataq bibliata Diospa palabranpaq hapisqankuta.

•   Bibliataqa kikin Diostaqmi palabran kasqanrayku imam kaqta kunankama waqaychachkan (Isaias 40:8, CQ; 1 Pedro 1:24, 25). d Jehova Diosqa munarqam palabranwan ñuqanchikpas yanapachikunanchikta (1 Corintios 10:11). Chaymi bibliapipas kaynata nin: “Ñawpaq tiempopi tukuy ima qillqasqa kaqkunaqa yachachiwananchikpaqmi qillqasqa kachkan. Chaynapi tukuy imata aguantaspanchik hinaspa Diospa qillqanwan sunqunchikta tiyaykachispanchik Diospa quwananchikta suyananchikpaq”, nispa (Romanos 15:4).

•   Jesuspas hinaspa qatiqninkunapas copiasqa bibliakunatam servichikurqaku yachachinankupaqqa, manamá chay copiasqa bibliakunamantaqa iskayrayarqakuchu (Lucas 4:16-21; Hechos 17:1-3).