¿Imanasqataq Jesustaqa ninku: “Diospa churin”, nispanku?

QALLARINMANMI

¿Imatam bibliaqa yachachin?

Bibliapim achka kutita nin Jesusqa Diospa churin kasqanta (Juan 1:49). Diosmi tukuy imata unancharqa, pay “munaptinmi tukuy imapas kachkan”. Diosmi Jesustapas unancharqa (Salmos 36:9; a Apocalipsis 4:11). Unanchasqanraykum Jesusqa Diospa churin.

Bibliapitaqmi nin angelkunapas Diospa churin kasqankuta (Job 1:6). Adanwan Evapas ‘Diospa churinmi’ karqaku (Lucas 3:38). Ichaqa Jesusllatam kikin Diosqa unancharqa, paytam pimantapas puntataqa unancharqa.

¿Jesusqa hanaq pachapichu yacharqa manaraq kay pachaman hamuchkaspan?

Awriki. Manaraq kay pachaman hamuchkaspanmi Jesusqa hanaq pachapi angel karqa. Chaymi Jesus nirqa ‘hanaq pachamanta uraykamusqanta’ (Juan 6:38; 8:23).

Jesusmi Diospa punta unanchasqan karqa. Chaymi bibliapi nin:

Jesusqa “tukuy ima unanchasqa kaqkunamantapas punta kaqmi”, nispa (Colosenses 1:15).
Jesusqa “Diospa unanchasqankunamanta punta kaqmi” (Apocalipsis 3:14).

Bibliapim Jesusmanta willakurqaña ñawpaqmantaraq ña kasqanta (Miqueas 5:2; Mateo 2:4-6).

¿Imatam Jesusqa ruwarqa hanaq pachapi kachkaspan?

Jehova Diospa yanapaqninmi karqa. Chaymi Jesus nirqa: “Taytalláy, hatunchaykuway manaraq runakuna kachkaptin ladoykipi hatunchawasqaykiman hina”, nispa (Juan 17:5).

Diostam yanaparqa tukuy ima unanchaypi. Jesusqa Diostam tukuy imata unanchaypi yanaparqa (Proverbios 8:30). Jesusmanta rimaspanmi biblia nin: “Tukuy imakunapas paynintakamam unanchasqa karqa hanaq pachapipas chaynataq kay pachapipas”, nispa (Colosenses 1:16).

Diosmi Jesuspa yanapakuyninwan tukuy imata unancharqa. Angelkunata, hanaq pachata chaynataq kay pachatapas (Apocalipsis 5:11). Ingenieropa kamachisqan runaqa, ingenieropa kamachisqallantam kasukun. Chaynam Jesuspas Diospa kamachisqallanta ruwarqa.

Diospa sutinpi rimaqmi karqa. Jesusmi ‘palabrawan sutichasqa’ karqa manaraq kay pachaman hamuchkaspa (Juan 1:1). Diosqa Jesuswanmi angelkunamanpas imapas munasqanta willachiq.

Jesuswantaqmi runakunamanpas willachiq. Yaqapaschá Diosqa Jesuswan kamachisqankunata willachirqa Adanman hinaspa Evamanpas (Genesis 2:16, 17). Yaqachusmi Israel runakunata chunniq urqunta pusaq angelqa Jesus karqa, chay angeltam Israel runakunaqa sumaqta kasukunanku karqa (Exodo 23:20-23). b

a Kay qillqapi ñawpaq testamentoqa Chuya Qellqa sutiyuq bibliamantam kachkan.

b Manam Jesusllawanchu Diosqa runakunamanqa imakunatapas willachirqa. Huk angelkunawanpas Israel llaqtayuqkunamanqa kamachikuyninkunataqa willachirqam (Hechos 7:53; Galatas 3:19; Hebreos 2:2, 3).