2 Pedro 1:1-21
1 Jesucristopa serviqnin hinaspa apostolnin* ñuqa Simon Pedrom kay cartata apachimuykichik ancha valorniyuq chiqap yachachikuykunata ñuqayku hina chaskiqkunaman. Chay yachachikuykunataqa chaskirqankichik Diosninchik hinaspa salvaqninchik Jesucristo allin ruwaq kasqankuraykum.
2 Diospa ancha kuyakuyninwan* hawkayayyá qamkunapaq yapakuchun Diosmanta hinaspa señorninchik Jesusmanta imam kaqta yachasqaykichikwan,+
3 Diosmi atiyninwan tukuy ima necesitasqanchikta quwanchik payta tukuy sunquwan servispa kawsananchikpaq. Chaytaqa quwanchik paymanta imam kaqta yachasqanchikraykum, payqa qayawarqanchik+ ancha atiyniyuq kasqanraykum hinaspa sumaq sunqu kasqanraykum.
4 Chaykunawanmi ancha allin hinaspa suma-sumaq promesakunata quwarqanchik,+ chaynapi imayna kasqanchikpi Diosman rikchakunapaq,+ chay promesataqa quwarqanchik runakunapa mana allin ruwasqankuta manaña ruwasqanchikraykum, runakunaqa mana allintaqa ruwanku mana allinkunata munapayasqankuraykum.
5 Chayraykuyá Diospi iñichkaspapas anchata kallpanchakuychik+ allin ruwaq runa kanaykichikpaq,+ allin ruwaq runa kaspañataqyá kallpanchakuychik astawan yachayniyuq kanaykichikpaq,+
6 astawan yachayniyuq kaspañataqyá kallpanchakuychik controlakuq kanaykichikpaq, controlakuq kaspaykichikñataqyá+ kallpanchakuychik sasachakuykunapi allinta takyanaykichikpaq*, allin takyaq kaspaykichikñataqyá kallpanchakuychik tukuy sunquwan Diosta servinaykichikpaq,+
7 Diosta tukuy sunquwan servispañataqyá kallpanchakuychik wawqi-panintin hina kuyanakunaykichikpaq, wawqi-panintin hina kuyanakuspaykichikñataqyá kallpanchakuychik kuyakuq kanaykichikpaq.+
8 Tukuy chaykunata astawan ruwaspaykichikqa señorninchik Jesucristomanta imam kaqta yachasqaykichikta kasukuspaykichikmi ruruchkaq sacha hina kankichik,+ hinaspapas manam chiriyankichikchu.
9 Pipas mana chayna kaqmi ichaqa ñawsa hina kachkan, payqa achkitapas manam rikuyta munanchu*,+ payqa qunqarunmi ñawpaq huchankunamanta Dios mayllasqantapas.+
10 Chaynaqa wawqi-panillaykuna, astawanyá kallpanchakuychik qayasqa+ hinaspa akllasqa kasqaykichikman hina allinta takyanaykichikpaq. Tukuy chaykunata hinalla ruwaspaykichikqa imaña kaptinpas allintam takyankichik.+
11 Chaynapim salvaqninchik hinaspa señorninchik Jesucristopa+ wiña-wiñay gobiernonman+ kancharichkaqllaña yaykunkichik.
12 Chayraykum kallpanchakuchkani kay qillqamusqaykunata yachachkaptikichikpas hinaspa uyarisqaykichik chiqap yachachikuypi allin kachkaptikichikpas yuyarichinaypaq.
13 Piensasqayman hinaqa allinmi kay cuerpoypi* kachkaspayraq+ kaykunamanta huktawan yuyarichiyniyqa.+
14 Ñuqaqa yachanim kay cuerpoy manaña unaypaq kananta, chayna kananmantam señorninchik Jesucristoqa willawarqaña.+
15 Ñuqaqa atisqaytam tukuy tiempo ruwasaq wañukuptiypas* kay qillqamusqaykunata kikikichik yuyarinaykichikpaq*.
16 Señorninchik Jesucristopa atiyninmanta hinaspa chayaramuspa kaypi kanan* tiempomanta yachachispaykuqa manam creenapaq hina yanqa willakuykunawanchu yachachirqaykiku, willarqaykikuqa kikiykupuni ñawiykuwan señorpa kanchariyninta rikusqaykuraykum.+
17 Paymi tayta Diosmanta chaskirqa hatunchasqa kayta hinaspa kanchariyta, chaskirqaqa “paymi kuyasqay churiy, paytam chaskini” nispa kancharichkaq Dios nimuptinmi.+
18 Ñuqaykupunim uyarirqaniku hanaq pachamanta chayna rimarimusqantaqa, chaytaqa uyarirqaniku Diospa akllasqan urqupi señorwan kachkaspaykum.
19 Diosmanta willakuqkunapa yachachisqankumantaqa manam iskayrayanchikchu, imaynam kanchaq achkita+ tutayaypi sumaqta qawankichik, chaynam chay willakuykunata allinta qawaspaykichikqa allinta ruwachkankichik, chaynatam ruwankichik achikyamunankama hinaspa achikyaq lucero+ lluqsimunankama, achkiqa sunquykichikpim kanchachkan.
20 Puntataqa kaytayá yachaychik: Diospa qillqanpi willakuykunaqa manam runapa piensasqanman hinachu.
21 Diosmanta willakuykunaqa manam haykapipas runakunapa munasqanman hinachu karqa,+ aswanqa atiyninwan* Dios yanapaptinmi runakunaqa Diospa rantinpi rimarqaku.+
Willakuykuna
^ Utaq: “Kachasqan runa”.
^ Kaypiqa rimachkan mana kuyana kachkaspa kuyasqa kaymantam. Qaway “mana kuyana kachkaspa kuyasqa kay” niqpa ima ninan kasqanta.
^ Utaq: “Aguantanaykichikpaq”.
^ Ichapas kanman: “Payqa ñawsam kachkan”, niqpas.
^ Griego rimaypiqa nichkan: “Carpapi”, nispam.
^ Utaq: “Rimarinaykichikpaq”.
^ Griego rimaypiqa nichkan: “Ripukuptiypas”, nispam.
^ Qaway “chayaramuspa kaypi kasqan” niqpa ima ninan kasqanta.
