Colosenses 1:1-29
1 Diospa munayninman hina Jesucristopa* apostolnin* ñuqa Pablom, iñiqmasinchik Timoteopiwan+
2 qillqamuykiku Colosas llaqtapi Cristota* tukuy sunquykichikwan qatikuqkunaman, qamkunaqa kankichik Diospa runankunam:
Qamkunapaqyá kachun taytanchik Diospa ancha kuyakuynin* chaynataq hawkayaynin.
3 Señorninchik Jesucristopa taytan Diosta qamkunapaq mañakuspaykum tukuy tiempo agradecekuniku,
4 ñuqaykuqa uyarinikum Cristopi iñisqaykichikta hinaspa Diospa llapallan runankunata kuyasqaykichikta,
5 chaynaqa kankichik hanaq pachapi imam chaskinaykichikta suyasqaykichikraykum,+ chaytaqa uyarirqankichik chiqap sumaq willakuy willasqa kaptinmi.
6 Chay uyarisqaykichik sumaq willakuyqa ruruchkaq hinam enteron kay pachapi astawanraq yapakuchkan,+ chaynallataqmi qamkuna ukupipas yapakuchkan, chayqa kachkan Diospa ancha kuyakuyninmanta* imam kaqta yachasqaykichik hinaspa uyarisqaykichik punchawmantapacham.
7 Chaytam yacharqankichik kuyasqa sirvientemasinchik Epafrasmanta,+ payqa allinninchikpaq tukuy imapi Cristota serviqmi.
8 Paymi willawarqaku Diospa atiyninta chaskisqaykichikrayku kuyakuq kasqaykichikmanta.
9 Chayna kasqaykichikta uyarisqayku punchawmantapacham ñuqaykuqa qamkunapaq Dios mañakuyta mana saqirqanikuchu,+ tukuy tiempotaqmi mañakurqaniku Diospa munayninmanta imam kaqta llapallanta yachanaykichikpaqpas, chayqa yanapasunkichikmi yachayniyuq kanaykichikpaq+ hinaspa Diospa atiyninpa yanapakuyninwan imakunatapas entiendenaykichikpaq.+
10 Chaynapi Jehova* Diospa munasqanman hina kawsakuspa tukuy ima ruwasqaykichikwan payta kusichinaykichikpaq, chaytaqa ruwankichik ruruchkaq hina tukuy allinkunata ruwaspaykichikmi hinaspa Diosmanta imam kaqta aswan-aswan yachaspaykichikmi.+
11 Mañakuchkanikutaqmi hatu-hatun atiyninwan necesitasqaykichikman hina Diosninchik kallpanchasunaykichikpaqpas,+ chaynapi pacienciakuspa hinaspa kusikuspa tukuy imata aguantanaykichikpaq.
12 Chaynallataqmi mañakuchkaniku hanaq pacha taytanchikta agradecekunaykichikpaqpas, payqa achkiypi kaq runankunapa+ herencia chaskiqmasin kanaykichikpaqmi yachachisunkichik.
13 Diosmi libraykuwarqanchik tutayaypi munaychakuqmanta,+ hinaspam kuyasqan churin kamachiqña kaptin chaypi* kananchikpaq churaykuwarqanchik.
14 Churinpa precio pagasqanwanmi librasqa karqanchik. Arí, huchanchikmantam pampachasqa karqanchik.+
15 Churinqa mana rikuy atina Diospa rikchayninmi,+ tukuy ima unanchasqa kaqkunamantapas punta kaqmi.+
16 Tukuy imakunatapas Diosqa churinwanmi unancharqa hanaq pachapipas chaynataq kay pachapipas. Rikusqanchik kaqkunatapas, mana rikusqanchik kaqkunatapas,+ kamachiqkunatapas, munayniyuqkunatapas, gobiernaqkunatapas chaynataq autoridadkunatapas. Arí, tukuy imatapas Diosqa churinwanmi unancharqa,+ hinaspapas paypaqmi unancharqa.
17 Diospa churinqa karqañam imamantapas aswan puntataraq,+ paywanmi tukuy imapas rikurimurqa.
18 Payqa iñiqkunapa umanmi, iñiqkunaqa runapa cuerpon hinam.+ Paymi tukuy imamanta punta kaqqa, paytaqmi llapallan wañuqkunamanta punta kawsarimuqpas,+ chaynapi tukuy imamanta punta kaq kananpaq.
19 Diosqa munarqam churinqa tukuy imapi pay hina kananta,+
20 munarqataqmi churinpa yawarninwan hanaq pachapi tukuy ima kaqkunatapas hinaspa kay pachapi tukuy ima kaqkunatapas kikinwan allinyanachiyta,+ chaynatam Diosqa allinyanachiwanchik ñakarichikuq qirupi* churinpa yawar chaqchusqanwan.+
21 Ñawpaqtaqa mana allinkunallapi piensaspaykichikmi Diosmanta karunchasqa hinaspa paypa enemigon karqankichik.
22 Chayna kachkaptikichikpas cuerpon entregaqpa wañukusqanwanmi Diosqa kikinwan allin kanaykichikpaq yanapasurqankichik, chaynapi mana imamantapas tumpasqa chuyay-chuyay hinaspa mana huchayuqña Diospa ñawpaqninpi kanaykichikpaq.+
23 Ichaqa chayna kanaykichikpaqqa hinallam Diospi iñisqaykichikman hina kawsakunaykichik,+ allinta takyanaykichik+ hinaspa qaqa hina* sayanaykichik,+ amayá karunchakuychikchu sumaq willakuykunata uyarisqaykichikrayku allin kaqkuna suyasqaykichikmantaqa, chay sumaq willakuykunaqa enteron kay pachapim willakusqaña kachkan,+ ñuqa Pablom chay sumaq willakuymanta willakunaypaq kamachisqa karqani.+
24 Qamkunarayku ñakarisqaymantam ñuqaqa kusikuni,+ ñuqaqa Cristo hinam ñakarichkani, hinaspapas qamkunapa allinnikichikpaqmi hinalla ñakarisaq,+ iñiqkunaqa Cristopa cuerpon hinam kankichik.+
25 Ñuqaqa Diospa kamachiwasqanman hinam iñiqkunapa serviqnin kani,+ chaynapi qamkunapa allinnikichikpaq Diospa palabranmanta lliwta willakunaypaq,
26 chay willakusqayqa Diospa pakasqan kaqkunam,+ chayqa pakasqam karqa ñawpaq tiempopi*+ runakunamanta hinaspa Diosta mana yupaychaq runakunamanta. Kunanmi ichaqa Diospa runankunaman riqsichisqa kachkan.+
27 Paykunamanmi Diosqa riqsichiyta munarqa ancha-ancha valorniyuq pakasqa kaqkunata,+ chayqa huklaw nacionniyuq runakunamanpas riqsichisqam karqa. Chay pakasqa kaqqa qamkunawan Cristo huklla kasqanmi, chayqa paywan kuska hatunchasqa kanaykichikpaq suyasqaykichikmi.+
28 Cristomantam willakunchik lliw runakunata anyaspa chaynataq tukuy yachaywan yachachispa, chaynapi llapallan runakunata Jesucristopa allin yuyayniyuq qatiqninta hina Diosman entregananchikpaq.+
29 Chaypaqmi ñuqaqa anchata llamkachkani kallpa quwaqniypa atiyninwan.+
Willakuykuna
^ Utaq: “Kachasqan runa”.
^ Griego rimaypiqa nichkan: “Cristo Jesuspa”, nispam.
^ Utaq: “Diospa akllasqanta”.
^ Kaypiqa rimachkan mana kuyana kachkaspa kuyasqa kaymantam. Qaway “mana kuyana kachkaspa kuyasqa kay” niqpa ima ninan kasqanta.
^ Kaypiqa rimachkan mana kuyana kachkaspa kuyasqa kaymantam.
^ Qaway A5 kaq yachachikuyta.
^ Utaq: “Churinpa gobiernonpiña”.
^ Utaq: “Kaspipi”. Qaway “ñakarichikuq qiru” niqpa ima ninan kasqanta.
^ Utaq: “Sunita”.
^ Qaway “kay tiempo” niqpa ima ninan kasqanta.
