Genesis 13:1-18
13 Abranmi Egipto nacionmanta Negueb+ qichwaman rirqa. Paywanmi rirqa warmin Sarai hinaspa sobrinon Lot, aparqataqmi tukuy ima kapuqninkunatapas.
2 Abranpaqa achkallay-achkam animalninkuna chaynataq quri-qullqinpas karqa.+
3 Negueb qichwamantam rirqa Betelkama kaypi-chaypi samastin. Hinaspam chayarurqa ñawpaqta carpan sayachisqanman, chayqa karqa Betelpa waklawnin Haipa hichpanpim.+
4 Chaypitaqmi karqa Diospaq animalkunata kañananpaq altar ruwasqanpas. Chaypim Jehova Diosta sutinmanta qayakuspan hatuncharqa.
5 Abranqa Lotwan kuskam purirqa. Lotpapas karqam ovejankuna, vacankuna hinaspa carpankuna.
6 Ichaqa iskayninku achka animalniyuq kasqankuraykum michinankupaq allpaqa manaña hayparqachu, chayraykum huk hawaqllapi kuska kaytaqa manaña atirqakuchu.
7 Chaymi Abranpa michiqninkunawan Lotpa michiqninkuna piñanakururqaku. Chaylaw allpakunapiqa yacharqakutaqmi* Canaan runakunapas chaynataq Perizita runakunapas.+
8 Hinaptinmi Abranqa Lotta nirqa:+ “Aylluntinmi kanchik, amayá piñanakusunchu, amataqyá michipuwaqninchikkunapas piñanakuchunkuchu.
9 Kayqaya allpaqa akllakunapaq kachkan, chaynaqa rakinakusunyá. Ichuq* lawman riptikiqa alliq* lawmanmi risaq, alliq lawman riptikiñataqmi ichuq lawman risaq”, nispa.
10 Hinaptinmi Lotqa lliw Jordan lawta+ qawarirqa Zoar lawkama.+ Chaylawqa Jehova Diospa huertan hina+ hinaspa Egipto allpa hinam yakuyuq karqa. Chaynam karqa Sodoma hinaspa Gomorra llaqtakunata Jehova Dios manaraq chinkachichkaptin.
11 Lotqa intipa qispimunan Jordan lawtam akllakururqa, hinaspam chayman ripukurqa. Chaynapim rakinakururqaku.
12 Abranñataqmi Canaan lawman pasakurqa. Lotqa Jordan lawpi kaq llaqtachakunapa hichpanpim yacharqa,+ hinaspam carpanta sayachirqa Sodoma llaqtapa waqtanpi.
13 Sodoma llaqtayuq runakunaqa llumpay mana allin ruwaqmi karqaku, chaymi huchallikusqankuwan Jehova Diosta piñachirqaku.+
14 Abranmanta Lotpa rakikusqan qipatañataqmi Jehova Dios Abranta nirqa: “Maymi kasqaykimantayá muyuriqnikita qawariy.
15 Chay qawasqayki allpakunatam qanman qusqayki, qusaqtaqmi miraynikikunamanpas. Chayqa qamkunapam una-unaypaq kanqa.+
16 Miraynikikunatam ñutu allpata hina achkallay-achkata mirachisaq. Ñutu allpata yupay atiqllam miraynikikunataqa yupayta atinman.+
17 Rispaykiyá kay allpata patanmanta-patankama qawaramuy, kay allpataqa qanmanmi qusqayki”, nispa.
18 Abranqa carpakunallapi yachastinmi purirqa. Chaymi punchawkuna risqanman hina chayarurqa hatun sachakunapa kasqan Mamre lawkama,+ chayqa karqa Hebronpa hichpanpim.+ Chaypi yachaspanmi animal kañana altarta Jehova Diospaq ruwapurqa.+
