Romanos 12:1-21
12 Chaynaqa wawqi-panillaykuna, ancha llakipayakuqllaña Diosninchik kasqanraykum ruegakamuykichik, kawsachkaq animalta Diospaq quchkaq hinayá cuerpoykichikta+ Diosman quychik chuyay-chuyayta+ hinaspa pay chaskinanpaq hinata. Chayta ruwaspaqa tukuy yuyaynikichikwanmi Diosta yupaychachkankichik.+
2 Amayá kay tiempopi* runakunapa imayna kawsasqankutaqa qatipakuychikchu, aswanqa ñawpaqta imayna kasqaykichikta saqispayá yuyaynikichikta musuqyachiychik.+ Chayta ruwaspaqa allintapunim yachankichik+ ima ruwananchikta Diosninchik munasqanta, Diospa munayninqa allinpunim, mana pantaqmi, hinaspapas munasqanman hinam.
3 Kuyasqa kanaypaq hina mana kachkaptiypas Diosqa anchatam kuyawarqa, chayraykum sapakamata nimuykichik imayna kasqaykichikmanta aswan allinraq kasqaykichikta ama piensanaykichikpaq,+ aswanqa allin yuyaywanyá piensaychik Diospa qususqaykichik iñiynikichikman hina.+
4 Cuerponchikqa achka parteyuqmi,+ ichaqa achka parteyuq kaspapas sapakamam ruwayniyuq,
5 chaynam ñuqanchikpas achkallaña kaspapas Cristowan* kuska huk cuerpolla kanchik, sapa partenkunam chullalla cuerpoman hukllawasqa kachkanchik.+
6 Diosqa ancha kuyakuq* kasqanraykum sapakamaman yachayta quykuwanchik imakunapipas yanapakunapaq,+ chayraykuyá hamuq punchawkunamanta willakunapaq yachayniyuq kaspaqa iñiyniyuq kanapaq Dios yanapawasqanchikman hina willakusun,
7 pipas hukkunata yanapananpaq yachayniyuq kaspanqa hukkunata yanapananpaqyá anchata kallpanchakuchun, pipas yachachinanpaq yachayniyuq kaspaqa yachachichunyá,+
8 pipas runamasinta kallpanchay yachaqqa kallpanchachunyá*,+ qukuykuq kaqpas kusikuywanyá quchun,+ kamachinanpaq churasqa kaqpas allintayá* kamachichun,+ llakipayakuq kaqpas tukuy sunqumantayá llakipayachun.+
9 Tukuy sunquwanyá kuyanakuychik, amayá hawa sunqullachu*.+ Mana allinkuna ruwaytayá millakuychik,+ hinaspayá allin kaqkunata ruwanaykichikpaq ancha-anchata kallpanchakuychik.
10 Wawqi-panintin hinayá sunqumanta anchata kuyanakuychik. Qamkunapurayá anchata respetanakuychik, ichaqa qamyá puntataqa hukkunapaq allin kaqkunata ruwaykapuy.+
11 Llamkakuqyá* kaychik, amayá qillaqa kaychikchu.+ Diospa atiyninwanyá ancha kallpanchasqallaña kaychik.+ Jehova* Diospa serviqninyá kaychik.+
12 Hamuq punchawkunapi imam chaskinaykichikmantayá anchata kusikuychik. Hatun sasachakuykunapi kaspapas hinallayá aguantaychik.+ Mana amiruspayá Diosta mañakuychik.+
13 Iñiqmasikichikkunatayá imapas pisipuqninta quspa yanapaychik.+ Hinallayá kallpanchakuychik wasikichikpi pitapas samaykachinaykichikpaq*.+
14 Chiqnisuqnikichik runakunapaqpas hinallayá Diosta mañakuychik.+ Runakunataqa amayá ñakaychikchu, aswanqa Diostayá mañakuychik paykunata yanapananpaq.+
15 Kusikuqkunawanyá kusikuychik, waqaqkunawanyá waqaychik.
16 Hukkunatayá allin kasqankupaq hapiychik kikikichikpas allin kasqaykichikman hina. Amayá ancha riqsisqa kaypi umayuqqa kaychikchu*, aswanqa humillakuychikyá,+ amataqyá kikillaykichikqa wakinkunamanta aswan yachayniyuqpaqqa hapikuychikchu.+
17 Pipas mana allinta ruwasuptikichikqa amayá mana allinwanqa kutichiychikchu.+ Llapallan runakunapa qayllanpiyá allin kaqta ruwaychik.
18 Atisqaykichikman hinayá kallpanchakuychik llapallan runakunawan hawkalla kawsakunaykichikpaq.+
19 Kuyasqay wawqi-panillaykuna, amayá mana allin ruwasusqaykichikman hinaqa kutichikuychikchu, aswanqa Diosmanyá saqiykuychik ruwasqankuman hina kutichipunanpaq*.+ Chayna kasqanmantam ñawpaq qillqakunapi nin: “Ñuqa Jehova* Diosmi nini: ‘Mana allin ruwaqkunataqa ñuqam chinkachisaq, ñuqataqmi ruwasqankuman hina kutichipusaq’”, nispa.+
20 Ichaqa “chiqnisuqniki runa yarqaymanta kaptinqa mikuykachiyá, yakunayaptinpas tomaykunanpaqyá yakullatapas haywaykuy, chayta ruwaspaqa ninawan fierrota chulluchichkaq hinam sunqunta llampuyachinki*”.+
21 Amayá mana allinwanqa vencechikuychu, aswanqa hinallayá mana allinta vencey allin kaqta imapipas ruwaspa.+
Willakuykuna
^ Qaway “kay tiempo” niqpa ima ninan kasqanta.
^ Utaq: “Diospa akllasqanwan”.
^ Kaypiqa rimachkan mana kuyana kachkaspa kuyasqa kaymantam.
^ Utaq: “Rimapayay yachaqqa rimapayachunyá”.
^ Utaq: “Tukuy sunquwanyá”.
^ Griego rimaypiqa nichkan: “Kuyakuynikichikqa amayá iskay uyachu kachun”, nispam.
^ Utaq: “Allin llamkaqyá”.
^ Qaway A5 kaq yachachikuyta.
^ Kaypiqa rimachkan mana riqsisqa runakunata allinta chaskiykuymantam.
^ Utaq: “Amayá hatunchasqa kayllapiqa yuyaymanaychikchu”.
^ Utaq: “Piñakuyninta chayachinanpaq”.
^ Qaway A5 kaq yachachikuyta.
^ Griego rimaypiqa nichkan: “Chayta ruwaspaykiqa umanmanmi sansata churachkanki”, nispam.
