Santiago 1:1-27
1 Diospa hinaspa señor Jesucristopa serviqnin ñuqa Santiagom+ saludamuykichik tukuy hinastinpi chiqisqa 12 ayllukunata.
2 Wawqi-panillaykuna, kusisqayá kaychik tukuy ima sasachakuykunapi kaspaykichikqa.+
3 Yachasqaykichikpi hinapas sasachakuykunata atipaptikichikqa yachakunqam Diospi allin iñiq runakuna kasqaykichik, chayqa yanapasunkichik hamuq sasachakuykunatapas aguantayta atinaykichikpaqmi.+
4 Hinallayá imaymana sasachakuykunata aguantaychik, chayqa yanapasunkichik tukuy imapi allin kanaykichikpaqmi hinaspa cabal runa kanaykichikpaqmi.+
5 Mayqinnikichikpapas yachaynikichik pisilla kaptinqa Diostayá tukuy tiempo mañakuychik+ yachayta qusunaykichikpaq+ hinaptinqa quykusunkichikmi, payqa mana piñakuspa tukuy sunqunmanta achkanpi llapallanman quykuqmi.+
6 Mañakuspaqa Dios uyarisunaykichikmanta ama imaniraqllatapas iskayrayaspayá mañakuychik.+ Iskayrayaspa mañakuqqa rikchakun lamar quchapi wayrawan kaylawman-waklawman apachikuq yakumanmi.
7 Chayna iskayrayaq runaqa manam suyananchu Jehova* Diosmanta imallatapas chaskiytaqa.
8 Chayna runaqa iskay-kimsa piensaqmi,+ ima ruwananpaqpas huktaña-huktaña tantiaqmi.
9 Wakcha iñiqmasinchikqa kusikuchunyá hatunchasqa kasqanmanta.+
10 Apuñataqyá kusikuchun humilde kayta yacharusqanmanta,+ apu runakunaqa purun wayta hina chinkaruqllam.
11 Inti qispiramuspa rupamuptinmi quraqa chakirun, waytanñataqmi wichirun hinaptinmi sumaqllaña kayninpas tukurun, chaynapunim apu runapas wañurunqa tukuy ima maskasqanpi.+
12 Ancha kusisqam sasachakuykunata hinalla aguantaq runaqa.+ Payqa Diospa chaskisqan kaspanmi premionta chaskinqa.+ Chay premioqa hinalla kuyaqninkunaman Jehova* Diospa prometesqan kawsakuymi.+
13 Pipas sasachakuypi kaspanqa amayá nichunchu: “Diosmi sasachakuyman churawachkan imayna kasqayta yachananpaq”, nispanqa. Diostaqa manam pipas mana allinwanqa sasachanmanchu, manataqmi Diosqa pitapas imayna kasqanta yachananpaqqa sasachakuymanqa churanmanchu.
14 Aswanqa pipas sasachakuypiqa tarikun munasqankunawan aysachikuspanmi hinaspa apachikuspanmi.+
15 Hinaptinmi chay munasqan aswan atiparuptin huchallikun, chaymi hucha ruwasqanrayku wañun.+
16 Kuyasqay wawqi-panillaykuna amayá pantaychikchu.
17 Tukuy imapas allin kaqkunaqa hinaspa allinkuna chaskisqanchikqa hamun hanaq pachamantam,+ chaykunaqa hamun hanaq pachapi kanchariqkunata unanchaq Diosmantam,+ payqa hina kaqllam, manam kaypi kachkaspa huklawmanña muyuruq llantuy hinachu.+
18 Paymi munayninman hina chiqap yachachikuyninkunawan*+ rikurichiwarqanchik llapankumanta punta akllakusqankuna kananchikpaq.+
19 Kuyasqay wawqi-panillaykuna qamkunaqa chaylla uyariqyá kaychik, rimaychikpas allinta tantiaspayá,+ amataqyá chaylla piñakuqqa kaychikchu.+
20 Piñakuq runataqa mana allin ruwaqpaqmi Diosqa hapin.+
21 Chayraykuyá saqiychik tukuy millakuypaq kaqkunatawan mana allin ruwaykunata,+ hinaspayá palabranta sunquykichikpi Dios churananta llampu sunqulla chaskikuychik, chay palabranqa salvakunaykichikpaqmi.
22 Qamkunaqa amayá Diospa palabranta+ uyariqllachu kaychik, aswanqa kasukuqyá kaychik. Uyariqlla kaspaqa yanqa pensamientokunawanmi kikillaykichikta engañakuchkankichik.
23 Pipas Diospa palabranta uyariqlla kaspan mana kasukuq runaqa+ rikchakun espejopi uyan qawakuq runamanmi.
24 Payqa uyanta qawakuykuspanmi pasakun, hinaspam chaylla qunqarun imayna kasqanta.
25 Diospa palabranta sumaqta qawaykuspa+ mana qunqaspan yuyaymanaq runam ichaqa tukuy ima ruwasqanpi kusisqa kanqa. Payqa manam Diospa palabranta uyarispa chaylla qunqaruq runachu, aswanqa uyarisqanta kasukuq runam. Diospa palabranqa mana pantaqmi hinaspapas librawaqninchikmi.+
26 Diosta yupaychaq kasqanta piensachkaspa rimasqanta mana controlaq+ runaqa kikintapunim engañakuchkan, Dios yupaychasqanpas yanqapaqmi.
27 Dios taytanchikpa munasqanman hina yupaychayninchik* mana qanrachasqa hinaspa chuya kananpaqqa kaytam ruwananchik: Mana tayta-mamayuqkunatawan+ viudakunatam+ llakinkupi yanapaykunanchik+ hinaspapas runakunapa mana allin ruwasqankunamanqa manam chapukunanchikchu.+
Willakuykuna
^ Qaway A5 kaq yachachikuyta.
^ Qaway A5 kaq yachachikuyta.
^ Griego rimaypiqa nichkan: “Palabrawan”, nispam.
^ Utaq: “Religionninchik”.
