35 KAQ YACHACHIKUY

¿Imataq yanapawanman Dioswan astawan kuyachikunaypaq?

Gabrielmi nin: “Chunka iskayniyuq wataypi kachkaptiymi papay saqiruwarqaku, chaymi Jehova Diosta waqaspay mañakurqani papay kutimunanpaq”, nispa.

Gabrielqa sunqunta tiyaykachinanpaqmi bibliata leerqa hinaspam tarirurqa Salmos 10:14 nisqanta, chaypim nin: “Qamllamanñamá hapipakullan wakchayasqa runakunapas. Qamllamanñamá amparakullan mana tayta-mamayuq kaqpas”, nispa (Chuya Qellqa, CQ). Bibliapa chayna nisqanqa sunqunmanmi chayarurqa. Chaymi Gabriel nin: “Chayqa karqa ‘ñuqam yanapasqayki, ñuqam kani taytayki’ nispan Jehova Dios niwachkanmanpas hinam”, nispa. Gabrieltaqa Jehova Diosmanta yachasqankunam anchata yanaparqa chay sasachakuyninta qunqarinanpaq.

YAQAPASCHÁ wakinninchikqa Gabriel hina tarikunchik. Wakiqninchikqa manapaschá pay hinachu tarikunchik, ichaqa atichwanmi Jehova Diosman asuykuytaqa. Bibliapim Santiago 4:8 nin: “Diosman asuykuptikichikqa paypas asuykusunkichikmi”, nispa. Diostaqa manam rikuyta atinchikchu, chayqa manam harkawananchikchu payman asuykunapaqqa. Payqa munanmi amistadnin kananchikta.

Jehova Dioswan kuyachikunapaqqa kallpanchakunanchikmi. Imaynam ima plantachatapas plantaruspanchikqa sumaq wiñananpaq yakunta tallinchik chaynataq wanuta hinanchik, chaynam Diosninchikwan kuyachikunanchikpaqpas kallpanchakunanchik. Qatiqninpim yachasunchik Dioswan kuyachikunapaq imakunapi kallpanchakunamanta.

Bibliatam allinta estudiananchik

Piwanpas riqsinakunanchikpaqqa parlarinanchikmi hinaspa imapas niwasqanchiktam uyarinanchik. Chaynallataqmi Jehova Dioswan kuyachikunapaqpas niwasqanchikta uyarinanchik, paytaqa uyarinchik palabranta estudiaspanchikmi hinaspa paymanta sumaqta yachaspanchikmi (Salmos 1:2, 3, CQ).

Diosmanta yachanapaqqa kallpanchakunam, yaqapaschá qillapakuspayki ninki: “Bibliata ñawinchanaymantaqa televisionta qawaymi pukllaymi ñuqataqa gustawan”, nispayki. Jehova Dioswan kuyachikuyta munaspaykiqa kallpanchakunaykim palabranta estudianaykipaq.

Leeyta mana gustasuptikipas leenaykipaq sapa kuti kallpanchakuptikiqa gustasunkiñam. Chaypaqqa tantianaykim imay hora leenaykipaq. Lay sutiyuq sipas hinam kallpanchakuwaq, paymi nin: “Ñuqaqa qatarisqay horam huk capitulota leeni”, nispa. Maria sutiyuq sipaspas ninmi: “Ñuqaqa manaraq puñuchkaspaymi bibliayta leeni”, nispa.

Qamqa, ¿imay horataq bibliata estudiawaq? Chaypaq puntata qawaykuy  292 paginapi yachachikuyta. Hinaspañataq kay uraychapi qillqaykuy imay horapi sapa punchaw estudianaykipaq. 30 minutollapas estudiawaqmi.

․․․․․

Wakinpiqa sasachakunkipaschá bibliapi nisqankunata entiendenaykipaq. Chunka hukniyuq watanpi Jezrel sutiyuq musuchapas kaynatam nin: “Bibliata leespayqa manam llapantachu chaylla entiendeni”, nispa. Chayna kaptinpas hinallayá bibliata estudiay. Chayta ruwaspaykiqa Jehova Diospa imapas nisusqaykitam uyarichkanki hinaspapas chaymantaqa gustasunkiñam, manañam estudiaytaqa saqinkiñachu.

Diostam mañakunanchik

Jehova Diosninchikqa munanmi sunqunchikpi imapas kaqta payman willakunanchikta. Tutapas punchawpas utaq imay horapas payta mañakuptinchikqa uyariwasunmi. Bibliapipas kaynatam niwanchik Filipenses 4:6, ninmi: “Diosmanyá lliwta willakuychik tukuy tiempo mañakuspaykichik, ruegakuspaykichik hinaspa graciasta quspaykichik”, nispa.

Chaynaqa Jehova Diosninchikmanqa willakuchwanmi imapas sasachawaqninchikkunata hinaspa imapas llakichiwaqninchikkunata. Manataqmi qunqananchikchu tukuy imapas quwasqanchikmanta agradecekuytaqa. Paymá pimantapas aswan yanapawaqninchikqa (Salmos 106:1, CQ).

Kaypi qillqay Jehova Diosta imakunamanta agradecekusqaykita.

․․․․․

Sasachakuynikikunawan hukmanyasqa tarikuspaykiqa Jehova Diosta mañakuy yanapaykusunaykipaq. Chaytam niwanchik Salmos 55:22, ninmi: “Tayta Diosman sasachakuynikikunata saqiykuy, paymi yanapasunki, allin ruwaq runataqa manam wichisqataqa saqinqachu”, nispa (CQ).

Kaypi qillqay imakuna llakichisusqaykimanta hinaspa chaykunapi yanapaykusunaykipaq Diosta mañakuy.

․․․․․

Diosninchik imaynata yanapawasqanchikpiyá yuyaymanasun

Jehova Diosta astawan kuyanaykipaqqa manam qunqanaykichu imakunapi yanapasusqaykita. Davidpas kaynatam qillqarqa: “Qawaspayá yachaykuychik Diospa allin kasqanta”, nispa (Salmos 34:8, CQ). Chaytaqa Davidqa qillqarqa sasachakuypi tarikuspanmi. Davidtaqa Saulmi wañurachiyta munarqa, chaymi Davidqa ayqikurqa hinaspam chayarurqa filisteo runakunapa kasqanman. Paykunapas Davidtaqa chiqnirqakum, chaymi mana wañurachinankupaq Davidqa locotukuspan tukuyta ruwarqa, chayta ruwaspanmi paykunapa makimanta ayqikurqa (1 Samuel 21:10-15, CQ).

Davidqa riqsikurqam Jehova Dios yanapaykusqanrayku mana wañurachisqankuta. Chaymi nirqa: “Tayta Diosta maskaptiymi uyariwan ñuqallayta. Payqa libraykullawanmi tukuy manchakusqaymanta”, nispa (Salmos 34:4, CQ). Davidqa Jehova Dios kuyakuq kasqantam yanapasqanwan yacharqa. Ñuqanchikpas David hinam kallpanchakunanchik Jehova Dios kuyakuq kasqanta yachananchikpaq.

Imakunapi Jehova Dios yanapasusqaykita qillqay.

․․․․․

Taksachanchikmanta tayta-mamanchik bibliamanta yachachiwaptinchikpas, sapakamam kallpanchakunanchik Jehova Dioswan kuyachikunapaqqa. ¿Yaqachu qam chaypaq kallpanchakuchkanki? Mana chayna kaptinqa kunanmantam kallpanchakuwaq, chaypaq kallpanchakusqaykiqa manamá yanqapaqchu kanqa. Bibliapipas ninmi: “Hinallayá mañakuychik hinaptinqa qusunkichikmi, hinallayá maskaychik hinaspaqa tarinkichikmi”, nispa (Mateo 7:7). Bibliata estudianaykipaq kallpanchakuspaqqa Jehova Diosmanmi asuykunki.

KAYMANTA ASTAWAN YACHANAYKIPAQQA, QAWAWAQMI LO QUE LOS JOVENES PREGUNTAM. RESPUESTAS PRÁCTICAS (VOLUMEN 1) CAPITULO 38 HINASPA CAPITULO 39

QATIQNIN YACHACHIKUYPIM KAYMANTA YACHASUNCHIK

¿Yaqachu manchakunki Diosmanta willakuyta? ¿Imatam ruwawaq mana manchakuspa willakunaykipaq?

BIBLIAM NIN

“Mayna kusisqam Diosta maskaqkunaqa”, nispa (Mateo 5:3).

KAYTAM RUWAWAQ

Watallapi bibliata leeyta tukunaykipaqqa sapa punchawmi tawa paginata leenayki.

KAYPI YUYAYMANAY

Jehova Diosninchikqa paypa amistadnin kanaykitam munan chaymi kallpanchasunki kay librota leenaykipaq (Juan 6:44).

IMATA RUWANAYKIPAQ QILLQAY

Bibliata astawan estudianaypaqmi kayta ruwasaq: ․․․․․

Jehova Diosta astawan mañakunaypaqmi kayta ruwasaq: ․․․․․

Astawan yachanaypaqmi tayta-mamayta kaymanta tapusaq: ․․․․․

QAMQA, ¿IMA NIWAQTAQ?

● ¿Imatam ruwawaq biblia estudiay astawan gustasunaykipaq?

● Pantaq runa kaptinchikpas, ¿imanasqataq Jehova Diosqa mañakusqanchikta uyariwanchik?

● ¿Imataq yanapasunkiman Diosta tukuy sunquwan mañakunaykipaq?

[Willakuy]

Evam nin: “Warma kaspayqa, Diosta mañakuspaymi kuti-kutirispa hina kaqllata rimaq kani. Kunanmi ichaqa sapa punchaw imawan llakisqa kasqaymanta chaynataq imawan kusisqa kasqaymanta willakuni”, nispa.

[Recuadro]

Bibliata entiendenaykipaq

1. Imamanta utaq pimanta yachay munasqaykita akllay. Leesqaykita entiendenaykipaq Jehova Diosta mañakuy.

  2. Amayá apurawllamanñaqa leeychu. Imamantapas leespaykiqa chaypipas kachkawaq hina leey, rimasqankuta uyarichkawaqpas hina chaynataq qawachkawaqpas hina. Chaynata ruwaptikiqa imapas yachasqaykim umaykiman hinaspa sunquykiman chayanqa.

3. Yuyaymanay. Leeyta tukuruspaykim kaykunapi yuyaymanawaq:

● ¿Imanasqataq Jehova Diosqa palabranpi kayta qillqachirqa?

● ¿Pikunataq qatipakunapaq hina kanman, pikunataq mana?

● ¿Imaynatam kayqa yanapawanman?

● ¿Jehova Dios imayna kasqantam kayqa yachachiwan?

4. Diosta mañakuy. Leeyta tukuruspam Jehova Diosta kaynata mañakuwaq: “Dioslláy palabraykipim kaykunamanta yachaykuni, ama hina kaspayá kaypi yachasqayman hina kawsakunaypaq yanapaykuway”, nispa. Manataqmi qunqanaykichu palabranmanta agradecekuytapas.

[Dibujo]

“Palabraykiqa chakiykunata kanchaykuq mechero hinaraqmi. Palabraykiqa purisqay ñanpipas achkiy hinaraqmi” (Salmos 119:105, Chuya Qellqa, CQ).

[Recuadro]

Imamantapas puntataqa, ¿imatam ruwana?

¿Manachu tiempoyki haypasunki Diosta mañakunaykipaq hinaspa estudianaykipaq? Yaqapaschá huk ruwaykunapi tiempoykita usuchichkanki.

Kayta ruway: Huk baldeman hinay rumikunata hinaspa qawanmanñataq huntanankama aquta talliykuy. Huntay-huntaymi kachkan ¿aw?

Kunanñataq puntata hinay aquta, qawanmanñataq rumikunata. ¿Yaqachu llapan yaykurun? Manam ¿aw? ¿Imanasqa? Puntata aquta hinarusqaykiraykum.

¿Imatam kaywan yachachwan? Aquta hinachkaq hina puntata pukllayllaman utaq ima ruwaymanpas qukuruptinchikqa manañam tiemponchik kanqañachu Jehova Diosmanta yachanapaq. Bibliapas niwanchikmi ‘imakuna aswan allin kasqanmanta yachananchikpaq’ (Filipenses 1:10). Bibliapa nisqanta kasukuspaykiqa tiempoyuqmi kanki Diosmanta yachanaykipaq, chaymantapas tiempoyuqmi kanki pukllanaykipaq hinaspa imatapas ruwanaykipaq. Chaynaqa, Diosmanta yachaynikim imamantapas puntapi kanan.