YAQA llapallan runakunam “padre nuestro” utaq “yayayku” nisqa mañakuytaqa yachanku. Paykunaqa sapa punchawmi achka kutikama umallamanta chay mañakuytaqa mañakunku. Ichaqa manam allintaqa yachankuchu ima mañakusqankutaqa. Jesusqa manam munarqachu chayna mañakunankutaqa. ¿Imanasqataq chaynata ninchik?

Jesusmi qatiqninkunam imayna mañakunankupaq manaraq yachachichkaspan nirqa: ‘Mañakuspaykiqa amam [...] kuti-kutirispa hina rimasqallaykitaqa rimankichu’, nispa (Mateo 6:7). Jesusqa “padre nuestro” utaq “yayayku” nisqa mañakuyta yachachispanqa manam umallankumanta yacharuspanku mañakunankupaqchu yachachirqa. Aswanmi Jesusqa yachachiyta munarqa imakunamanta mañakunankupaq. ¿Imakunamantataq mañakunanchik? Chaypaqyá Mateo 6:9-13, niqpi Jesuspa nisqanmanta yachaykusun.

Qatiqninkunatam Jesusqa puntata yuyarichirqa Jehova Diosllata mañakunankupaq. Ichaqa chaymantaqa, ¿imanasqataq nirqa: “Sutiki chuyanchasqa kachun” nispaqa?

Ñawpaqmantapacham runakunaqa Diosmanta mana allinkunata rimanku. Satanaspas Jehova Diosmanta nin: Llulla, kikillanpaq munaq hinaspa mana allin kamachiq kasqanta (Genesis 3:1-6) *. Wakin runakunapas satanasman sayapakuykuspankum ninku Diosqa mana llakipayakuq, chiqnikuq hinaspa castigakuq kasqanta. Ninkuraqmi tukuy imatapas pay mana unanchasqanmanta. Wakinkuñataqmi bibliamanta Diospa sutinta hurqurunku.

Bibliapim ichaqa willawanchik kikin Jehova Dios sutinta chuyanchananmanta (Ezequiel 39:7). Hinaspa tukuy mana allinta chinkachiptinmi runakunaqa hawkaña kawsakusunchik. ¿Imaynatam chayta ruwanqa? Jesusmi chaymanta kaynata nirqa.

Kunan tiempopi runakunaqa manam sumaqtachu yachanku Diospa gobiernon ima kasqanta. Jesuspa tiemponpi Judio runakunam ichaqa chaymanta sumaqta yacharqaku. Paykunaqa yacharqakum Diospa akllasqan runa kamachiyta qallaykuspan allinkuna ruwananmanta (Isaias 9:6, 7; Daniel 2:44). Chay gobiernon Jehova Diospa sutinta chuyanchanqa, satanaspas chaynataq mana allin rikurichisqankunatapas chinkachinqam. Chaymantapas tukuchinqam guerrakunata, wañuyta, unquyta hinaspa yarqayta (Salmos 46:9; 72:12-16; Isaias 25:8; 33:24). Chaymi “gobiernoykiyá hamuchun”, nispa Diosta mañakuspanchikqa, mañakuchkanchik tukuy kaykuna cumplikunanpaq.

Hanaq pachapiqa Diospa munayninmi ruwakuchkanña, satanasta demonionkunatawan Jesus kay pachaman qarquramusqanmantapacha (Apocalipsis12:9-12). Chaymi, ‘munasqaykiyá ruwakuchun’, nispa mañakuspaqa nichkanchik hanaq pachapi hina kay pachapipas Diospa munasqan ruwakunanpaq. Diospa munasqan ruwakuptillanmi, tukuy imapas allin kanqa. Chaymi kikinchikpaq manaraq imatapas mañakuchkaspa puntata mañakunanchik Diospa sutin chuyanchasqa kananpaq, gobiernon hamunanpaq hinaspa munasqan kay pachapi ruwakunanpaq. Jesuspas kaynatam nirqa: “Amayá ñuqapa munasqaychu ruwasqaqa kachun, aswanqa qampa munasqaykiyá”, nispa (Lucas 22:42).

Mañakuspaqa mañakuchwantaqmi ima necesitasqanchiktapas. Jehova Diosqa manam piñakurunqachu astawanmi payqa quykuwasun ima pisipuwaqninchiktapas. Chaynata mañakuspaqa riqsikuchkanchiktaqmi Jehova Dioslla “vidata, samayta hinaspa tukuy imakunatapas”, quwaqninchik kasqanta (Hechos 17:25). Bibliapim niwanchik Jehova Diosqa kuyakuq tayta hina kasqanta. Kuyakuq taytaqa churinkunapa ima mañakusqankutapas quykuytam munan. Ichaqa imapas sasachananpaq hina kaptinqa manam quykunqachu maynataña mañakuptinkupas.

Kay tiempopi runakunaqa ima hucha ruwasqankutapas allinpaqmi hapinku. Bibliam ichaqa nin hucharayku ima mana allinpas hinaspa wañuypas kasqanmanta. Nacesqanchikmantapacha huchayuq kasqanchikraykum ima mana allintapas Diospa contranpi ruwanchik. Chaymi Dios kamachimuptin chaypi kawsakuyta munaspaqa, ima huchanchikkunamantapas Dios pampachaykuwananchikpaq mañakunanchik (Romanos 3:23; 5:12; 6:23). Bibliapiqa niwanchiktaqmi Jehova Diosqa kuyawaspanchik pampachaykuy munawasqanchiktapas (Salmos 86:5).

Llapallan runakunam necesitanchik Dios satanasmanta harkaykuwananchikta. Wakin runakunaqa piensankum satanasqa mana kasqanta. Jesusmi ichaqa mana chaynatachu piensarqa. Chaymi satanasmanta nirqa ‘kay pachata kamachiq’ kasqanmanta (Juan 12:31; 16:11). Satanasqa kay pachata kamachichkaspanpas munachkanraqmi Jehova Diosmanta karunchakurunanchikta (1 Pedro 5:8). Ichaqa satanastaqa manam manchakunanchikchu Jehova Diosmi paymanta aswan atiyniyuqqa. Paymi serviqninkunataqa amparaykunqa.

Jehova Diostaqa imamantapas mañakuchwanmi. 1 Juan 5:14 nisqanman hinapas, ‘munasqanman hina mañakuptinchikqa’ Diosqa uyariykuwasunmi. Arí, Jehova Diosmanqa tukuy ima llakinchikkunamantam willakuchwan. Payqa uyariykuwasunchikmi (1 Pedro 5:7).

¿Ima kaptintaq hinaspa maypitaq Diosta mañakunanchik? Chaymanta, ¿imallatapas ninchu biblia? Qatiqnin yachachikuypim chaymanta astawan yachaykusunchik.