2011 kaq watapim Lorca llaqtapi terremoto karuptin 9 runakuna wañururqaku, heridokunañataqmi achka karqaku. Parqonankupaq allpa ukupi yakuta llumpayta horqosqankurayku chay terremoto kasqanmantam allpa Pachata estudiaq runakuna nirqaku.

China nacionmanta kaq turistakunam huklaw nacionkunaman rispanku 2012 kaq watapi gastarqaku 102.000 millon dolar qollqeta. Organización Mundial del Turismo nisqam nin Alemania hinaspa Estados Unidos nacionmantaqa China nacionniyoq runakuna astawan gastasqankuta, Alemaniapim gastarqaku 84.000 millon qollqeta hinaspa Estados Unidospiñataq 83.000 millon qollqeta.

Japonpi estudioso runakunam 68.000 runakunapa imayna kawsasqankuta 23 watapuni estudiarqaku. Paykunam ninku 1920 hinaspa 1945 kaq watakunapi naceq warmikuna manaraq 20 watankuman chayachkaspanku cigarro pitayta qallarispankuqa 10 wata menos kawsasqankumanta, qarikunañataq 8 wata menos kawsasqankumanta, chaytam willakurqa Gran Bretaña nacionmanta BMJ nisqa revista.

Mauritania nacionpim, plastico bolsata mana rantinankupaq, mana ruwanankupaq chaynataq mana servichikunankupaq leyta horqorunku, chaynapi yakupi kaq chaynataq allpapi kaq animalkunapas, chayta millpuruspa mana wañunankupaq. Chay nacionpi gobiernom kallpanchachkan ismuq bolsakunata servichikunankupaq.

Hatun desgraciakuna pasasqanwanmi seguro nisqanku empresa sapa wata 50.000 millon dolar qollqeta gastan. 1980 kaq watamantam sapa 10 wata astawanraq gastachkanku.