¿IMATAM NIWAQ?

Qillqay ima nisqaykimanta.

CHIQAPMI LLULLAM

1. Jehova Diospa testigonkunaqa Jesuspa qatiqninkunam kanku.

2. Jehova Diospa testigonkunaqa creenkum 6 punchawllapi tukuy ima unanchasqa kasqanta.

3. Jehova Diospa testigonkunaqa manam doctorkunawanqa hampichikunkuchu.

4. Jehova Diospa testigonkunaqa bibliapa tukuy ima nisqanpim creenku.

5. Jehova Diospa testigonkunaqa bibliallankutam servichikunku.

6. Jehova Diospa testigonkunaqa bibliatam munasqankuman hinaña qillqarunku.

7. Jehova Diospa testigonkunaqa manam llaqtapiqa yanapakunkuchu.

8. Jehova Diospa testigonkunaqa sapaq religionniyuq runakunatam chiqninku.

Kay qatiqninpim chay tapukuykunamanta yachanki.

1.  1 CHIQAPMI. Kallpanchakunikum tukuy imapi Jesusta qatipakunaykupaq chaynataq yachachisqanman hina kawsakunaykupaq (1 Pedro 2:21). Ichaqa manam wakin religionniyuq runakuna hinachu kaniku. Ñuqaykuqa manam wakin religionniyuq runakuna hinachu creeniku Jesusqa kikin Dios kasqanta, aswanqa Diospa churin kasqantam creeniku (Marcos 12:29). Manataqmi creenikuchu pipas wañukuptin alman hinalla kawsasqantaqa nitaq ninapi runakunata Dios ñakarichisqantapas. Manataqmi yachachiwaqniykutaqa “señor”, “pastor” nitaq huk sutikunawanpas sutichanikuchu (Eclesiastes 9:5; Ezequiel 18:4; Mateo 23:8-10).

2. 2 LLULLAM. Tukuy imata Dios unanchasqanmanta mana iskayrayaspaykupas manam ninikuchu suqta punchawllapi tukuy imata unanchasqantaqa. ¿Imanasqa? “Suqta punchawllapim tukuy ima unanchasqa karqa” nisqankuqa manam bibliapa yachachisqanwanqa tupanchu. Suqta punchawkunapi Dios tukuy imata unanchasqanmanta bibliapi rimaspanqa manam kunan hina punchawkunamantachu rimachkan, aswanmi “punchaw” nispanqa rimachkan unay tiempomanta (Genesis 2:4; Salmo 90:4). Dios tukuyta unanchasqanpi creeq wakin runakunaqa ninkutaqmi kay allpa pachanchik iskay-kimsa waranqa watallaraq kasqanta, ichaqa bibliaqa manam chaynatachu nin, bibliaqa ninmi llapa imata kay pachapi Dios unanchachkaptin kay allpa pachaqa kasqantaña  ¹(Genesis 1:1).

3. 3 LLULLAM. Jehova Diospa testigonkunaqa hampichikunikum doctorkunawanqa, hinaspapas hampikunatam unquymanta allinyanaykupaq tomaniku. Wakin iñiqmasiykuqa doctormi kanku, bibliapi Lucas qillqata qillqaqpas doctormi karqa (Colosenses 4:14). Ichaqa manam sanoyanaykuraykuqa llutanpiqa imawanñapas hampichikunikuchu, aswanmi bibliapa nisqanta kasukuniku. Bibliapiqa ninmi imakuna mana allin kasqanta, huknin nisqanmi yawarta ama mikunapaq, chaymi yawartaqa mana churachikunikuchu (Hechos 15:20, 28, 29).

   Yawarta mana churachikuspaykupas mana yawarllawan hampiq doctortam maskaniku. Yawarta mana chaskisqaykuraykum doctorkuna tukuyta ruwanku mana yawarllawan hampiwanankupaq, chayna ruwasqankuqa wakin runakunapaqpas allinninpaqmi. Achka nacionkunapim pipas mana yawarllawan hampichikunman, chaynata hampichikuspankuqa manam yawarnintakama ratakuq unquykunawanqa unqunqakuchu.

4. 4 CHIQAPMI. Jehova Diospa testigonkunaqa manam iskayrayanikuchu bibliaqa qallariyninmanta tukuyninkama Diospa yanapakuyninwan qillqasqa kasqanmantaqa nitaq yanapawasqanchikmantapas (2 Timoteo 3:16). Enteron biblia yanapawasqanchikmanta mana iskayrayaspaykum “Ñawpaq testamento” nisqankuta sutichaniku “Hebreo rimaypi Diospa palabran” nispa. Musuq testamentotañataqmi sutichaniku “Griego rimaypi Diospa palabran”, nispa.

5.  5 LLULLAM. Jehova Diospa testigonkunaqa wakin religionkunapa ruwasqan achka bibliakunatam servichikuniku. Ichaqa castellanopi Traducción del Nuevo Mundo de las Santas Escrituras sutiyuq bibliatam astawanqa servichikuniku. ¿Imanasqa? Diospa sutin achka kutita rikurisqanrayku, allin ruwasqa hinaspa chaylla entiendenapaq kasqanraykum. Religionkunapa ruwasqan huk kaqnin bibliapim qillqarqaku 79 runakunapa sutinta chay bibliata ruwaysisqankurayku, ichaqa manam Diospa sutintaqa qillqarqakuchu. Traducción del Nuevo Mundo de las Santas Escrituras sutiyuq bibliapim ichaqa qallariyninpi rikurisqanman hina maypi kananpi Diospa sutintaqa qillqarunku. ²

6. 6 LLULLAM. Ñawpaqpi imatapas mana allintaraq entiendesqaykuta allintaña yacharuspaykuqa manam bibliapa nisqantachu cambiarurqaniku aswanmi entiendesqaykuta. 1950 watamantapacham qallaykurqaniku Traducción del Nuevo Mundo de las Santas Escrituras sutiyuq bibliata servichikuyta, ñawpaqtam ichaqa wakin religionkunapa ruwasqan bibliakunata servichikuspayku chayman hina entienderqaniku.

7. 7 LLULLAM. Bibliamanta willakusqaykuqa achka runakunatam yanaparun. Wakinkum bibliamanta yacharuspanku trago upyayta hinaspa drogakuytapas saqirunku. Chaymantapas mana ñawinchay yachaqkunatam enteron pachapi yanapaniku, chayna yachachisqaykuwanmi waranqantin runakuna ñawinchaytawan qillqayta yacharunku. Ima llaqtapipas hatun sasachakuykuna kaptinqa, iñiqmasiykunatawan wakin runakunatam yanapaniku. Kallpanchanikutaqmi hawkayayta tarinankupaqpas. ³

8. 8 LLULLAM. Bibliam nin: “Respetaychik llapallanta”, nispa (1 Pedro 2:17). Chaytam kasukuniku. Ima religionniyuqña kaptinkupas llapallan runakunatam respetaniku. Wakin nacionkunapi achkallay-achka testigokuna kaspaykupas manam autoridadkunataqa hikutanikuchu wakin religionkunata mana allinta qawanankupaqqa. Manataqmi llaqtapi chaqwataqa ruwanikuchu ñuqaykupa yachachisqaykuman hina autoridadkuna imatapas ruwanankupaqqa. Ñuqaykupas respetasqa kayta munaspaykum kallpanchakuniku hukkunatapas respetanaykupaq (Mateo 7:12).

Kay yachachikuykunaqa internetpim kachkan. Astawan yachayta munaspaykiqa www. jw.org/quy nisqanman yaykuy: ÑUQAYKUMANTA > TAPUKUYKUNA.