GREGORIOWAN Marilou sutiyoq iñiqmasinchikkunam 10 wata ñawpaqtaqa Manila llaqtapi karqaku, paykunaqa 30 wata masniyoqñam karqaku. Tukuy punchaw llamkaspankupas precursor regularmi karqaku. Sasa kaptinpas kallpanchakurqakum. Chaynata kallpanchakuchkaptinkum Marilouta bancopi llamkaqkunata kamachiq kananpaq nombrarurqaku. Yuyarispanmi Marilou nin: “Tukuy imaykum kapuwarqaku”, nispa. Allin tarikusqankuraykum qollqeyoq runakunapa kasqan sitiopi munasqanku wasita ruwachinankupaq tantearurqaku, chayqa karqa intipa qespimunan lawpim Manila llaqtamanta 19 kilometro karupi. Chaypaqmi wasikunata ruwachiq empresawan contratota ruwarqaku wasinkumanta 10 watapi paganankupaq.

Mariloum nin: “Bancopi kamachiq kaspayqa achka horakunatam llamkarqani, chaywan pisipasqa tarikuspaymi Diosta serviyniypiqa hukmanyayta qallaykurqani. Jehova Diostapas suwakuchkaq hinam sientekurqani. Manañam anchatañachu tiempochakurqani Jehova Diosta servinaypaq”, nispa. Chaywan hukmanyasqa tarikuspankum Marilouwan Gregorioqa imayna tarikusqankumanta parlarinankupaq tiempochakurqaku.  Gregoriom nin: “Vidayku cambiaytam munarqaniku ichaqa manam imayna tanteakuytapas atirqanikuchu. Mana wawa-churiyoq kasqaykuraykum Jehova Diosta astawan serviyta munarqaniku, chaymi payta mañakurqaniku chuya espiritunwan yanapawanankupaq”, nispa.

Hinaptinmi chay punchawkunapi uyarirqaku Diosmanta willakuqkunapa mana ancha kasqanku llaqtakunapi yanapakunankupaq kallpanchaq discursota. Gregoriom nin: “Chayta uyarisqaykuwanmi cuentata qokurqaniku mañakusqaykuta Dios contestawasqankumanta”, nispa. Iskayninkum Diosta mañakurqaku astawan iñiyniyoq kanankupaq chaynataq mana manchakuspa allinta tanteakunankupaqpas, ichaqa wasinku kananpaq contrato ruwasqankumantam ima ruwaytapas mana atirqakuchu, chaypaqqa kimsa watañam pagachkarqaku. ¿Imatam ruwarqaku? Mariloum nin: “Chay wasimanta manaña pagaptiykuqa kimsa wataña pagasqaykuqa yanqapaqmi kanan karqa. Ichaqa tanteakunaykum karqa Jehova Diospa munayninta otaq kikiykupata ruwanaykupaq”, nispa. Apostol Pablom Diospa Gobiernonmanta willakunanrayku tukuy kapuqninta saqerqa, paypa chayna ruwasqanpi reparaspankum tanteakurqaku wasipaq contrato ruwasqankuta manaña paganankupaq, llamkapakuyninkutapas saqenankupaq chaynataq yaqa lliw kapuqninkutapas rantikunankupaq hinaspam Palawan sutichasqa islaman pasakurqaku, chayqa Manila llaqtapa sur lawnin 480 kilometro karupim kachkan (Filip. 3:8).

Chay islaman manaraq richkaspankum Gregoriowan Marilouqa kallpanchakurqaku chay islapi kaqkuna hina kawsanankupaq, ichaqa chayaruspankuñam cuentata qokurqaku chay islapi kaqkuna imayna vida pasasqankumanta. Mariloum nin: “Chay islaman chayaruspaykuqa admirakuymantam yaqaña imanakurqanikupas. Chaypiqa manam luz kasqachu. Arrocera nisqanku mankata corrienteman enchufanaykumantaqa yantata chitqaspam yanukurqaniku. Extrañarqanim rantipakuq riymanta, restaurantepi mikuymanta chaynataq saqesqay llaqtapi imakunamantapas”, nispa. Ichaqa yuyaymanarqakum chay islaman imarayku risqankupi, chaymi pisi tiempollapi costumbrarurqaku. Marilouqa nintaqmi: “Kunanqa kusikunim sumaq orqokunata otaq pampakunata qawaspay chaynataq tutayaypipas qoyllurkuna llipipipiqta qawaspay. Astawanqa kusichiwan predicasqayku runakunapa kusisqa kasqankuta qawasqaymi. Kaypiqa yacharunikum kapuqllaykuwan ‘contentakuyta’”, nispa (Filip. 4:12).

Gregoriom nin: “Kayman chayamuptiykuqa tawa Testigokunallam karqaku. Paykunaqa anchatam kusikurqaku huñunakuypi sapa semana yachachiptiy otaq discursota qoptiy chaynataq Diospaq takinaykupaq guitarrayta tocaptiy”, nispa. Ichaqa 24 predicaqkunañam watamanqa karqaku. Gregorioqa nintaqmi: “Kaypi iñiqmasiykupa kuyakuyninkum sonqoykuta kusichin”, nispa. Chay islapi soqta wataña servisqankumantam  ninku: “Imamantapas astawanqa kusichiwanku Diospa llaqtanman achka runakuna yapakusqanta qawasqaykum. Chaywanmi cuentata qokuniku vidayku mana yanqapaq kasqanmanta”, nispa.

Filipinas nacionpim predicaqkunapa mana ancha kasqan llaqtachakunaman 3.000 yanapakuq pasanku. Paykunamanta wakinmi 500 solterakuna kachkan. Hukninpa sutinmi Karen.

Karenqa 25 watayoqñam, payqa wiñarqa Baggao (Cagayán) sutiyoq llaqtapim. Sipasyasqan tiempomantaraqmi Diosta astawan serviyta munarqa. Ninmi: “Diospa Gobiernonmanta yachanankupaq pisi tiempollaña kasqanmantam cuentata qokurqani chaymi predicaqkunapa mana ancha kasqanpi yanapakuyta munarqani”, nispa. Wakin familianqa consejarqam llaqtachakunaman rispan predicananmantaqa universidadpi estudiananpaq, Karenqa Jehova Diospa yanapayninta mañakuspanmi llaqtachakunapi yanapakuq iñiqmasinchikkunawan rimarqa. Hinaspam 18 watallanpiraq kachkaspan wasinmanta 64 kilometro karuman rirqa.

Karenqa lamar qochapa hichpan orqo-orqo llaqtachakunamanmi rirqa, chay congregacionpiqa pisillam karqaku iñiqmasinchikkuna. Paymi nin: “Baggao llaqtamantam chay congregacionman chayanaykupaq chakiwan kimsa punchaw rirqaniku. Orqonkunatam wichayman urayman rirqaniku, chaymantapas 30 masnin mayukunatam chimparqaniku”, nispa. Nirqataqmi: “Bibliamanta estudiachisqaykunam wakinqa soqta hora puriypi yachanku otaq tiyanku, chaymi paykunaman rispayqa paqarinnintaña soqta hora puriyta kutimuq kani”, nispa. ¿Yanqapaqchu chayna kallpanchakusqanqa? Karenmi asirispan nin: “Chayna purisqaywan wakinpiqa chakiy puramenteta nanawaptinpas 18 runakunamanmi Diosmanta yachachini. Chaywanmi yacharuni Jehova Diosqa kuyapayakuq kasqanta”, nispa (Sal. 34:8).

Estados Unidosmanta Sukhi sutiyoq iñiqmasinchikmi 40 wata masniyoq soltera, payqa Filipinas nacionmanmi rirqa. ¿Imataq chaylawman rinanpaq kallpancharqa? 2011 kaq watapim iskay punchawpaq asambleapi casarasqa iñiqmasinchikta tapurqaku. Paykunam willakurqaku yaqa lliw kapuqninkuta rantikuruspanku México nacionman rispa Diosmanta yachachiypi yanapakusqankumanta. Sukhim nin: “Chay willakusqankum kallpanchawarqa imaynata Diosta astawan servinaypaq kasqanpi”, nispa. Filipinas nacionpi panjabí idiomapi predicaqkuna necesitakusqanmanta yacharuspanmi Sukhimqa chaylawman astakurqa, paypa abuelonkunawan tayta-mamanmi India nacionmanta kanku. ¿Imawanpas sasachakurqachu?

Sukhim nin: “Awriki, tanteanaymi karqa imakunata rantikunaypaq chaynataq imakunata qepachinaypaq. Chaypaq tanteayqa sasam karqa. Chaymantapas tukuy imaypas mana faltasqanmi 13 wataña sapallay yacharqani, ichaqa familiaypa kasqanmanmi astakurqani paykunaqa imankutapas cajakunallapim allichaqku.  Chaypi kayqa sasam karqa, ichaqa mana tukuy imayoq kawsayman costumbranaypaqmi yanapawarqa”, nispa. ¿Ima sasachakuykunatam atiparqa Filipinasman chayaruspan? Sukhim nin: “Llumpaytam manchakurqani ima uruchakunatapas chaymantapas saqemusqay nacionpi kaqkunatam anchata extrañarqani. Ichaqa Jehova Diospi astawan confiaytam yacharuni”, nispa. ¿Allinpaqchu karqa? Asirispanmi Sukhi nin: “Jehova Diosmi prometen: ‘Pruebawaychik bendicionniytam qomusqaykichik llimparinankama’, nispa. Chayna nisqanqa cheqapmi. Chayna bendeciwasqanmantam sapa kutilla cuentata qokuni paymanta yachay munaq runakuna yapamanta watukunaypaq niwaptinku. Anchatam kusichiwan Jehova Diosmanta yachay munaqkunata yanapasqay”, nispa (Mal. 3:10). Chaymantapas ninmi: “Imamantapas aswan sasaqa karqa Filipinas nacionman astakuyniymi. Chaymantaqa admirakuypaqmi imapipas Jehova Dios yanapawan”, nispa.

Sime sutiyoq casado iñiqmasinchikqa yaqa 40 watayoqñam, payqa Filipinas nacionmantam pasakurqa huklaw nacionman llamkapakuq chaypim allinta ganarqa. Chay nacionpi kachkaspanmi congregacionkunata watukuq ancianopa yachachisqanta uyarirqa chaynataq Diospa Llaqtanpi Punta Apaqkunamanta hukninpa yachachisqantapas. Chaywanmi ima ruwayninmantapas Dios serviyta astawan munarqa. Paymi nin: “Llamkapakuyniy saqeytam ichaqa manchakurqani”, nispa. Chaywanpas chay llamkayninta saqespanmi Filipinas nacionman kutirqa. Kunanqa señoranpiwanmi yanapakuchkanku Davao del Sur nisqan hatun llaqtapi, chay lawpiqa pisillam kan predicaqkuna. Payqa nintaqmi: “Pasaq watakunapi piensaspayqa anchatam kusikuni, llamkapakuyniy saqey manchakusqaytam atiparqani chaymantapas ima ruwayniymantapas Dios serviyniytam puntapi churarqani. ¡Ima ruwaymantapas Jehova Diosta tukuy sonqowan serviymi aswan allinqa!”, nispa.

Casarasqa Ramilo hinaspa Juliet sutiyoq iñiqmasinchikkunam precursor kanku, paykunaqa 30 wata masniyoqñam, wasinkumanta 30 kilometrollapi huk congregacion yanapanata munasqankumanta yacharuspankum chaypi yanapakunankupaq tanteakurqaku. Chaypi huñunakunankupaq chaynataq predicanankupaqmi sapa semana motopi rinku llumpaytaña paraptinpas. Warkusqa otaq waylinyaq chakata chimpaspanku chaynataq uchku-uchku carreteranta rispankupas chay congregacionpi yanapakunankupaq tanteakusqankumantaqa manam ñakakunkuchu. Ramilom nin: “Iskayniykum 11 runakunaman Diosmanta yachachichkaniku. Iñiqmasinchikkunapa mana ancha kasqankupi Diosta serviyqa sasam ichaqa chay ruwasqaykuqa anchatam kusichiwanku”, nispa (1 Cor. 15:58).

¿Munawaqchu astawan yachayta nacionnikipi otaq huklaw nacionpi predicaqkunapa mana ancha kasqankupi imaynata yanapakunaykipaq? Chaynaqa congregacionkunata watukuq ancianowan rimay hinaspa astawan yachanaykipaq qaway 2011 watapa agosto killanpi lloqsimuq Diospaq Llamkayninchik qellqapi, “¿Riwaqchu Macedoniaman?” niq yachachikuyta.