Bibliam nin: “Tukuy imapas allin kaqkunaqa hinaspa allinkuna chaskisqanchikqa hamun hanaq pachamantam, chaykunaqa hamun hanaq pachapi kanchariqkunata unanchaq Diosmantam”, nispa (Santiago 1:17). Chayna nisqanwanmi yachanchik Jehova Diosqa qukuykuq kasqanta. Ichaqa tukuy ima quwasqanchikmantapas, ¿mayqintaq aswan ancha allinqa? Juan 3:16 nisqanpim nin: “Diosqa ancha-anchatam runakunata kuyarqa chaymi sapallan churinta qumurqa haykam paypi iñiqqa mana wañuchisqa kanankupaq, aswanqa wiñay kawsayniyuq kanankupaq”, nispa.

Arí, churin Jesusta ñuqanchikrayku wañunanpaq Diospa kachamusqanmi ancha allinqa. Chayraykum huchamanta, yuyaqyaymanta hinaspa wañuymanta librasqa kayta atisunchik (Salmo 51:5; Juan 8:34). Chaykunamantaqa imataña ruwaspapas manam kikillanchikmantaqa librakuyta atichwanchu. Chayta yachaspanmi Diosqa piwi churin Jesusta kay pachaman kachamurqa ñuqanchikrayku wañunanpaq. Chaynapi haykam Diosta kasukuqkuna wiñaypaq kawsakuyta haypanankupaq. Ichaqa ¿imanasqataq Jesusqa ñuqanchikrayku wañunan karqa? ¿Imatam ruwananchik wiñaypaq kawsakuyta munaspaqa?

Bibliam willawanchik lliw runapa tayta-mamanchik Adanwan Evaqa mana ima huchayuq unanchasqa kasqankumanta, paykunataqa Diosqa unancharqa churi-wawankuwan kuska wiñaypaq kawsakunankupaqmi (Genesis 1:26-28). Ichaqa Diosta mana kasukuspankum huchaman wichiykurqaku, chaymi wañurqaku. Chayraykum ñuqanchikpas churinkuna kasqanchikrayku huchayuq kaspanchik wañunchik, chaytam biblia nin: “Chullalla runapa huchanwanmi lliw runakuna huchayuq rikurirurqa, huchawantaqmi wañuypas rikurirurqa. Chaynapim wañuyqa lliw runakunaman mirarurqa lliw huchallikurusqankurayku”, nispa (Romanos 5:12).

Chaymi huchamantawan wañuymanta librawananchikpaq Diosqa churin Jesusta kachamurqa ñuqanchikrayku chuya cuerponta entregaspan wañunanpaq. ¿Imanasqam chuya cuerpoyuq runa wañunan karqa? Adanpas manaraq huchallikuchkaspan chuya cuerpoyuq kasqanraykum (Romanos 5:19; Efesios 1:7). Mana chaynata Dios ruwaptinqa manach wiñaypaq sumaq huertapi kawsakuytaqa suyachwanchu, chayna kawsakuytam Adanwan Evaqa chinkachirqaku (Apocalipsis 21:3-5).

Arí, Diospa tukuy ima quwasqanchikmantapas aswan allinqa ñuqanchikrayku Jesuspa wañusqanmi, ¿imanasqa? Wañukusqanwanmi wiñaypaq kawsakuyta atisunchik. Qatiqninpim chaymanta astawan yachasunchik.

Diosqa yachanmi ima munasqanchikta. Runakunaqa lliwmi wiñaypaq kawsakuyta munanchik (Eclesiastes 3:11, NM). Ichaqa manam imata  ruwaspapas atichwanchu. Ñuqanchikrayku Jesuspa wañusqanwanmi ichaqa atichwan. Chaytam biblia nin: “Huchapa pagonqariki wañuymi, Diospa regalonmi ichaqa señorninchik Cristo Jesusrayku wiñaypaq kawsakuy”, nispa (Romanos 6:23).

Huchamantawan wañuymantam librawanchik. Manam pi runapas runamasintaqa huchamantawan wañuymantaqa librayta atinmanchu, manam maynaña quri-qullqiwanpas atinmanchu (Salmo 49:7, 8). Chaymi Diosqa, huchamantawan wañuymanta librawananchikpaq churin Jesusta kachamurqa (Romanos 3:23, 24).

Imam tiemponpim quwarqanchik. Bibliam nin: ‘Huchasaparaq kachkaptinchikmi ñuqanchikpa rantinchikpi Cristo wañukurqa’, nispa (Romanos 5:8). Arí, Diosqa ‘huchasaparaq kachkaptinchikmi’ Jesusta kachamurqa ñuqanchikrayku wañunanpaq, chaywanmi qawachiwanchik ancha-ancha kuyawasqanchikta. Chaywanpas kunanqa hinallaraqmi huchayuq kasqanchikrayku ñakarinchik, hamuq tiempopim ichaqa alli-allinña kawsakusun rantinchikpi Jesus wañukusqanrayku.

Kuyawasqanchikraykum churinta kachamurqa. Bibliam nin: “Diosninchikmi sapallan churinta kay pachaman kachamurqa churinrayku kawsakuyniyuq kananchikpaq, chaynatam Diosninchikqa kuyawasqanchikta qawachiwarqanchik”, nispa (1 Juan 4:9, 10).

¿Imatam ruwananchik ñuqanchikrayku Jesus wañusqanmanta agradecekunapaq? Juan 3:16 nisqanpim Jesus niwarqanchik ‘paypi iñiqlla’ salvasqa kananmanta. Bibliam nin iñiyqa ‘suyasqanchikta chiqaptapuni chaskinanchikpaqña suyay’ kasqanta (Hebreos 11:1). Iñiyniyuq kanapaqqa, tiempotam rakinanchik Diosmanta imam kaqta yachanapaq, chayta ruwaspaqa yachasunmi rantinchikpi Jesuspa wañukusqanwan wiñay kawsayta haypanapaq imata ruwanamanta.

Diosmantam imam kaqta yachawaq jw.org/quy nisqanman internetpi yaykuspa utaqmi Jehova Diospa testigonkunata mañakuwaq, testigokunaqa kusikuywanmi yachachisqaykiku. Ñuqanchikrayku Jesus wañusqanmanta astawan yachaspaykiqa yaqapaschá kaynata ninki: “¡Diosmanyá gracias kachun señorninchik Jesucristontakama!”, nispa (Romanos 7:25).