Pitapas chayllaraq riqsispaqa sutintam tapunchik. Tayta Diosta tapuptinchikqa ¿ima niwachwantaq?

“Ñuqam Jehova kani: chaymi sutiy” (Isaias 42:8, Reina-Valera, RV).

Diosqa munanmi sutin yachananchikta. Paypa sutinmi Jehova, chaymi bibliapi nin: “Kaymi wiñaypaq sutiyqa, kay sutiywanmi wiña-wiñaypaq yuyariwankichik”, nispa (Exodo 3:15). Bibliapiqa Diostaqa sutichankutaqmi tukuy atiyniyuq tayta, señor nispapas. Kay sutikunapas bibliapiqa rikurintaqmi Abrahan, Moises, David hinaspa Jesus, ichaqa Diospa sutinmi astawanqa rikurin. Arí, tayta Diosqa munanmi sutin yachananchikta paymi chay sutiwanqa sutichakurqa, chaymi bibliapi nin: ‘Sutikim Jehova. Kay pachapa altonpiqa qamllam kanki’, nispa (Salmo 83:18, RV).

Jesusqa munanmi taytanpa sutin yachananchikta. Kay allpapi kaspanmi qatiqninkunaman yachachirqa Diosta imaynata mañakunankumanta. Kaynatam qallarirqa: “Hanaq pachapi taytayku sutiki chuyanchasqa kachun”, nispa (Mateo 6:9). Chaymantapas taytanta mañakuspantaqmi Jesusqa kaynata nirqa: “Taytalláy, sutikita hatunchay”, nispa (Juan 12:28). Jesusqa taytanpa sutintam puntata hatuncharqa. Chaymi taytanman nirqa: “Ñuqaqa sutikitam riqsichirqani, riqsichisaqtaqmi kanpas”, nispa (Juan 17:26).

Diospa sutintam yupaychaqninkunapas rimarqaku. Diosta yupaychaq ñawpaq runakunaqa yachaqkum Jehova Diosqa amparakuq kasqanta.  Chaymi huk kaqnin nirqa: “Mana tuñichiy atina torre hinam Jehova sutiqa: Chaymanmi kallpan allin runaqa”, nispa. Huk kaqninñataqmi nirqa: “Pipas Jehova Diosta sutinmanta ruegakuspa mañakuqmi salvasqaqa kanqa”, nispa (Proverbios 18:10, RV; Romanos 10:13). Jehova Diosta yupaychaqkunaqa paypa sutinwanmi riqsichikunanku karqa, chaymi bibliapi nin: “Llapa llaqtakunam diosninkupa sutinpi hapipakunku, ñuqanchikqa Jehova Diosninchikpa sutinpim wiña-wiñaypaq hapipakusun”, nispa (Miqueas 4:5, RV; Hechos 15:14).

Diospa sutinqa payllapam. Jehova Diosmi Moisesman nirqa: “Ñuqam kasaq imapas ruwasqa kananpaq”, nispa (Exodo 3:14, NM). ¿Ima ninantaq chayqa? Diospa sutinqa qawachinmi payqa tukuy imata unanchaq kasqanta chaynataq munasqanta ruway atisqantapas, qawachintaqmi munaynin ruwasqa kananpaq unanchasqankunata servichikusqantapas. Tukuy atiyniyuq kasqanwan chaynataq llapallan kamachiq kasqanwan riqsichikuptinpas sutinmi astawanqa qawachin imayna Dios kasqantaqa.

Kuyawasqanchiktam qawachiwanchik. Diospa sutin ima ninan kasqanmi qawachiwanchik runakunata anchata kuyawasqanchikta. Kuyawasqanchikraykum Diosqa sutinta willawarqanchik, munantaqmi riqsinanchiktapas. Arí, Jehova Diosqa munanmi imayna kasqanta yachananchikta chaynataq asuykunanchiktapas (Salmo 73:28).

Diospa sutinta rimaspaqa kuyasqanchiktam qawachinchik. ¿Imaynataq tarikuwaq kuyasqayki amistadniki sutikita rimayta mana munaptinqa? Chayna kaptinqa ichapas manaña amistadnikipaqqa hapiwaqchu. Chaynam Jehova Dioswanpas, payqa munanmi sutin rimananchikta, chayraykum sutinta willawarqanchik. Sutinta rimaspaqa qawachinchikmi paywan kuyachikuyta munasqanchikta. Bibliam willawanchik Jehova Diosqa sutinta pikuna rimasqanmanta yachasqanta (Malaquias 3:16).

Diospa sutinta yachayqa ancha allinmi payta riqsinapaq. Ichaqa sutinta yachaspanchikpas, yachananchiktaqmi imayna Dios kasqantapas.