Nirqam: “Huk nacionmi peleanqa huk law nacionwan, chaynataq huk gobiernopas huk law gobiernowan, kanqam manchakuypaq terremotokuna, kaypi-chaypi unquykuna hinaspa muchuykuna”, nispa (Lucas 21:10, 11). Kaykunam sutillata qawachiwanchik Jesuspa kamachinan tiempo hichpallapiña kasqanta. Kunanqa enterollan kay allpa pachapim chay nisqankunataqa qawachkanchikña.

1. GUERRAKUNA

1914 watamantapacham hatu-hatun guerrakuna qallaykurqa. Manam haykapipas chayna guerrakuna hinaqa karqachu. Chay guerrakuna karusqanraykum achkallay-achka runakuna ñakarirqaku. Chaypim tukuy rikchaq armakunawan hinaspa bombakunawan wañuchinakurqaku, chayna armakunawan bombakunaqa manam haykapipas rikukurqachu. Arí, 1914 watamantapacham guerrakuna kaypi-chaypi kasqanmanta uyarichkanchik.

2. TERREMOTOKUNA

Ancha riqsisqa qillqapim terremotokunamanta rimaspan nin sapa wata yaqa waranqa terremotokuna enteron allpa pachapi kasqanmanta. Estados Unidos nacionpi terremotokunamanta estudiaqkunapas ninkum chay terremotokunamanta 16 aswan hatu-hatun kasqanmanta. Wakinkuqa yaqapaschá ninmanku terremotokunaqa ñawpaq tiempomantaraq kasqanta ichaqa kay tiemponchikpim terremotokunarayku astawan achka runakuna wañunku.

 3. MUCHUYKUNA

Kay tiempopim runamasinchikkuna yarqaymanta kachkanku qullqinku mana kasqanrayku utaq llaqtankupi kawsay mana qispisqanrayku hinaspa nacionninkupi ñakariykuna kasqanrayku. Chaymanta yachaqkunam ninku enteron allpa pachapi achkallay-achka runakuna yarqaypi tarikusqankumanta hinaspapas ninkum paykunamanta wakinku wañuy patanpi tarikusqankumanta. Sapa watataqmi achka warmachakunapas wañunku mana allinta mikusqankurayku.

4. UNQUYKUNA

Unquykunamanta yachaq runakunam ninku ñawpaq watapi kaq unquykunapas hinalla kay watakunapi kasqanmanta, ninkutaqmi chay unquykunamantapas achka mana riqsisqa unquykunaraq rikurirusqanta. Chay unquykunamanta hukninmi karqa Coronavirus unquy. Wakin unquykunapaq hampita tariyta munaspankupas manaraqmi atinkuchu chay unquykunapaq hampi ruwaytaqa.

5. ENTERON PACHAPIM APAKUNAN KARQA DIOSMANTA WILLAKUY

Jesusmi nirqa: “Diospa munaychakuyninmanta kay sumaq willakuymi willakusqa kanqa enterollan kay pachapi llapallan nacionpi runakuna yachanankupaq, chayñam tukuy imapas tukunqa”, nispa (Mateo 24:14). Kay tiempopi llumpay sasachakuykuna kaptinpas achkallay-achka runakunam llapallan nacionkunapi hinaspa llaqtachakunapipas waranqa masnin rimaykunapi Diosmanta willakuchkanku. Manam chaynaqa haykapipas karqachu.

Jesuspa tukuy ima willakusqankunaqa ñam qawakuchkanña. Paymi nirqa: “Kaykuna kasqanta qawaspaykichikqa yachaychik Diospa munaychakuynin kayllapiña kasqanta”, nispa (Lucas 21:31).

Jesusqa ñam kay allpa pachata kamachiytaña qallaykunqa. Hanaq pachapiqa 1914 watamantapacham kamachichkanña. a Chay watapim Jesusta kamachiq kananpaq Dios churaykurqa (Salmo 2:2, 4, 6-9). Manapas unaymantam kay allpa pachata kamachiyta qallaykunqa hinaspam llapallan kamachiqkunata wiñaypaq chinkachinqa.

Jesus kamachiyta qallaykuptinmi chayraq kayna mañakusqanchik ruwakunqa: “Munaychakuynikiyá hamuchun. Munasqaykiyá ruwasqa kachun kay pachapipas hanaq pachapi hina”, nispa (Mateo 6:10). Ichaqa ¿imatam 1914 watamanta Jesusqa ruwachkanña? Hinaspa ¿imatam ruwanqa kay allpa pachata kamachispan?