Juan 16:23 nin: “Imatapas taytayta mañakuptikichikqa sutiypim qusunkichik”, nispa.

Jesuspa nisqanmi sutillata musyachiwanchik Jehova Diosqa payllata mañakunanchikta munasqanta. Payqa manam munanchu taytacha-mamachakunata, angelkunata utaq wañusqa ayllunchikkunata mañakunanchiktaqa. Chaymantapas Jehova Diosqa munanmi Jesuspa sutillanpi payta mañakunanchikta. Jesuspa sutinpi Diosta mañakuspanchikqa qawachichkanchikmi wañukusqanrayku mañakusqanchikta Dios uyariwasqanchikmanta mana iskayrayasqanchikta. Jesusmi nirqa: “Ñuqantakamallam pipas taytaymanqa asuykun”, nispa (Juan 14:6).

Salmo 62:8 nin: ‘Paypa qayllanpi sunquykita kichariy’, nispa.

Diosta mañakuspanchikqa kuyakuq taytanchikta rimapayachkachwanpas hinam mañakunanchik. Huk qillqamanta utaq hina kaqllata kuti-kutirispa rimanamantaqa Diostam kuyakuywan hinaspa sunqumanta mañakunanchik.

1 Juan 5:14 nin: “Munasqanman hina mañakuptinchikqa Diosqa uyariwanchikmi”, nispa.

Bibliapim Diosqa niwanchik ñuqanchikpaq imakuna ruwananmanta. Niwanchiktaqmi paypaq imakuna ruwananchikta munasqantapas. Dios mañakusqanchikta uyariwananchikpaqqa paypa munasqanman hinam mañakunanchik. Chaypaqqa bibliatam ñawinchananchik. Chayta ruwaspallam Jehova Diosta sumaqta riqsisun, hinaspapas mañakusqanchiktam Diosqa uyariwasun.

Yanapawananchikpaqyá mañakusun. Diostam mañakuchwan mikuyninchik sapa punchaw kananpaq, pachanchik kananpaq hinaspa maypi samananchikpaq wasinchik kananpaq yanapawananchikpaqpas. Mañakuchwantaqmi imatapas tantiaypi yanapawananchikpaq hinaspa sasachakuykunawan mana hukmanyarunapaq yanapawananchikpaqpas. Chaymantapas mañakuchwanmi pampachaykuwananchikpaq, iñiyta quwananchikpaq hinaspa mana allinkunamanta waqaychawananchikpaqpas (Lucas 11:3, 4, 13; Santiago 1:5, 17).

Runamasinchikkunapaqyá mañakusun. Kuyakuq tayta-mamakunaqa munankum churi-wawanku kuyanakunankuta. Jehova Diosqa kuyakuq taytanchikmi. Chaymi payqa munan yanapakunanchikta hinaspa kuyanakunanchikta. Chayraykum ancha allin warminchikpaq, qusanchikpaq, churi-wawanchikpaq, ayllunchikpaq hinaspa amistadninchikkunapaq Diosta mañakuyninchikqa. Jesuspa qatiqnin Santiagopas nirqam: “Llapallaykichikpaqyá Diosta mañakuychik”, nispa (Santiago 5:16).

Agradecekunanchikpaqyá mañakusun. Bibliam niwanchik ñuqanchikrayku Jehova Dios tukuy ima ruwasqanmanta. Payqa parachimuspam tiempollanpi chakrakunata ruruchin, chaynapi mikusqa hinaspa sunqunchikpi kusisqa kanapaq (Hechos 14:17). Ñuqanchikrayku tukuy chaykuna ruwasqanpi yuyaymanaspaqa agradecekuytam munanchik. Agradecesqa kasqanchiktam qawachisun kamachikuyninkunata kasukuspanchik (Colosenses 3:15).

Wakinpim hukmanyasqa tarikuchwan mañakusqanchikman hina Jehova Dios mana yanapawaptinchik. ¿Chaywanchu nichwan Jehova Dios mañakusqanchikta mana uyarisqanta? Manam. Yachasunyá imanasqa mana amispa hinalla Diosta mañakunamanta.

Qallariyllanpi rimamusqanchik Estipmi nin: “Diosta mana mañakuspayqa llumpay hukmanyasqallañach kayman karqa”, nispa. ¿Imataq yanaparqa? Paytaqa biblia estudiayninmi yanaparqa. Estudiaspanmi yacharurqa Diostaqa mana amispa hinalla mañakunamanta. Estipmi nin: “Anchatam Diosta agradecekuni yanapawasqanmanta hinaspa amistadniykuna kuyawasqankumanta. Kunanqa ancha kusisqam tarikuni”, nispa.

Qallariyllanpi rimamusqanchik Yenipas ninmi: “Llumpay llakisqa tarikuspaymi Diosta yanapawananpaq mañakullarqani”, nispa. ¿Imapaqtaq Diosta mañakusqanqa yanaparqa? Paymi nin: “Yanapawarqam Dios ancha kuyawasqanta musyakunaypaq. Musyakurqanitaqmi mana allin ruwasqaykunata Dios mana yuyarayasqanta. Tukuy chaykunam anchata kallpanchawarqa”, nispa. Yeniqa ninraqmi: “Diosta mañakusqayqa yanapawarqataqmi Diosman astawan asuykunaypaq, paymanta mana iskayrayanaypaq hinaspa payllapi tukuy sunquywan hapipakunaypaq. Chaymantapas manam iskayrayanichu paypa nisqanta kasukuptiyqa mana haykapipas saqiwananmanta”, nispa.

Kunanñataq Isabel sutiyuq warmimanta rimaykusun. Wiksayuq kaptinmi paytaqa doctorkuna nirqaku wawachanqa unquq nacenanmanta. Chaymi wakin ayllunkunaqa nirqaku chay wawachanta abortananpaq. Tukuy chaykunawanmi payqa llumpay llakisqa tarikurqa. Paymi nin: “Chay niwasqankuwanmi llumpay llakisqa tarikullarqani”, nispa. ¿Imatam chayna kaspanqa ruwarqa? Ninmi: “Achka kutikamam Diosta mañakullarqani yanapaykuwananpaq”, nispa. Doctorkunapa nisqankuman hinam wawachanqa unquq nacerurqa. Chayna kaptinpas, ¿yaqachu Diosqa Isabelpa mañakusqanta uyariykurqa? Arí, Isabelmi nin: “14 watañam wawaywan kuska kachkani. Paytaqa Diosmi quykuwan. Payqa unquqña kaspanpas kusisqam tarikun. Chaywanmi musyakuni Jehova Diosqa mañakusqayta uyariwasqanmanta”, nispa.

Isabelpa nisqanqa Salmos qillqaqpa nisqantam yuyarichiwanchik. Paymi nirqa: “Qamqa uchuychakuqkunapa mañakuynintam uyarinki, uyariykuspam paykunata kallpanchanki”, nispa (Salmo 10:17). Chayraykuyá mana amispa hinalla mañakusun.

Diosta mañakunapaqqa Jesuspa mañakusqantam qatipakuchwan. Mañakusqantam bibliapi tarinchik. Aswan riqsisqa mañakusqantam qatiqninkunaman yachachirqa. ¿Imatam chaymanta yachachwan?