ANCHA kuyasqa amistadniki imapas imanasqa ruwasqanta mana entiendesqaykipi chaynataq chayna ruwasqanmanta paypa contranpi hukkuna rimayta qallaykusqankupipas piensariy. ¿Paykuna hinachu amistadnikipa contranpi rimawaq icha imanasqa ruwasqanmanta kikinpuni willasunaykitachu suyawaq? ¿Yaqachu pacienciakuspa suyawaq kikinpuni willasunaykikama?

Chay tapuykunata manaraq contestachkaspa kaynataraq tapukuy: “¿Allintapunichu amistadniyta reqsini? ¿Imanasqataq anchata kuyani?”, nispa. Chayna tapukuynikiqa allinpunim kanman. Diosqa mana llakipayakuqmi nispa chaylla piensanamantaqa, ¿manachu chaynataraq tapukuchwan?

Wakinpiqa manapaschá entiendenkichu imatapas imanasqa Dios ruwasqanmanta otaq imanasqa saqesqanmanta. Chayna mana entiendesqankuwanmi wakinqa rimanku Diosqa mana llakipayakuqmi nispa. Chaynaqa, ¿manachu allintaraq yachaykuwaq Diosqa imanasqa runakuna juzgananpaq tanteasqanmanta? Chaypaqqa paymantam allintaraq yachanayki. Tapukuy: “¿Amistadniyta hinachu Diosta qawani?”, nispa.

Ñakariykunapi tarikuspaqa manapaschá Diostaqa amistadnikita hinachu qawanki. Ichaqa piensariy, ¿Dioschu tukuy sasachakuypi tarichisunki icha bendecisusqaykiraykuchu kawsachkanki? Yachamusqanchikman hinaqa, ‘kay pachapi kamachiqqa Diablom’ (Juan 12:31). Paymi runakunataqa tukuy mana allinwan ñakarichin. Chaymantapas runakunaqa ñakarinchik pantaq kasqanchikwanmi chaynataq qonqayllamanta imapas pasawasqanchikwanmi.

¿Imatam Jehova Diosqa ruwarqa? Bibliam willawanchik Hanaq pachatapas kay Pachatapas unanchasqanmanta. Willawanchiktaqmi cuerponchiktapas suma-sumaqta ruwasqanmanta. Chaymantapas willawanchikmi vidanchikqa paypa makinpi kasqanmanta (Salmo 124:8; 139:14; Daniel 5:23). ¿Ima ninantaq chayqa?

Dios vidata qowaptinchikmi kawsanchik (Hechos 17:28). Paymi unanchawarqanchik kuyakuyniyoq kanapaq, amistadta armanapaq, tukuyta qawanapaq, mikuykuna imayna gustoyoq kasqanta musyanapaq, waytata otaq frutata muskinapaq, ima takitapas uyarinapaq chaynataq llachpaykuspa imayna kasqanta musyanapaqpas..., tukuy chaykunaqa Diospa regalo qowasqanchikmi (Santiago 1:17). ¿Manachu tukuy chaykuna qowasqanchikqa kallpanchawanchik tukuy sonqonchikwan Jehova Diosta kuyanapaq chaynataq confianapaq?

Chaykuna yachasqaykiwanqa manaraqpaschá Diospiqa confiankichu. Yaqapaschá piensanki Diostaqa manaraq allinta reqsisqaykipi. Diosqa manam llakipayakuqmi nisqankumantaqa manam lliwtaraqchu yachanchik kay pisilla yachachikuypiqa. Ichaqa, ¿manachu allin kanman astawan reqsinaykipaq kallpanchakuynikiqa? a Kallpanchakuspaykiqa Jehova Diosmantam astawan yachanki. Jehova Diosqa mana llakipayakuqmi nispa runakuna niptinkupas, payqa “kuyakuqllañam” (1 Juan 4:8).