Kimsa watachaypi kachkaptiymi politicakunapi mana chaqrukusqankurayku taytayta, tioyta hinaspa abueloyta llamkanankupaq presochaspa huklaw llaqtaman pusarurqaku. Chaymantaqa iskay kaq Hatun Guerra pasaytam 1947 kaq watapi taytallayña wasa tullun falseasqa kutimurqa, ichaqa allin iñiyniyoq kasqantam qawachirqa.

Isqon wataypi kachkaptiymi Moldavia llaqtapi kaq pachaknintin Testigokunata chaynataq familiaytapas presochaspa aparuwarqaku Siberia lawman. 1949 julio 6 punchawninpim uywakunata apanankupaq kaq trenman seqachiwarqaku, chaymi 12 punchawkuna viajarqaniku 6.400 kilometrota Lebyazhe lawman. Hinaptinmi trenkunapa sayananpi policiakuna suyawachkasqaku. Paykunaqa grupo-grupota chaylla rakiruwaspankum tukuy lawman aparuwarqaku. Grupoypi kaqkunam karqaniku uchuylla chunniq escuelapi. Pisipasqa chaynataq llumpay llakisqam tarikurqaniku. Chaymi iskay kaq Hatun Guerrapi Testigokunapa ruwasqan takita yuyaqña iñiqmasiyku lala-lalayta qallaykurqa. Hinaptinmi chay takita takirqaniku:

“Achka iñiqmasinchikkunam kaymanta karu llaqtapi presochasqa kachkanku.

Wakintam aparunku Intipa seqaykunan lawman, wakintañataq Intipa qespimunan lawman.

Diosta servisqankuraykum tukuywan ñakarichisqa wañuypa patanpi tarikurqaku.”

Tiempo pasaytaqa huñunakuyniykumanmi domingonpi rirqaniku wasiykumanta 13 kilometrota. Llumpay chiri tiempopim tutapayllaraq wasiykumanta sapa domingo lloqsiq kaniku. Weqawniykukama haypaq riti ñannintam riq kaniku (40 grados bajo cero). Uchuychalla cuartochapim 50 otaq masnin runakuna ñitiy-ñitiy huñunakuq kaniku, iskayta otaq kimsa takita takiruptiykum Diosta mañakuspa Bibliata estudiaq kaniku huk horata otaq masninta. Hinaspam takikunata kaqmanta takispa Bibliata hinalla estudiaq kaniku. Chay huñunakuykunaqa anchatam iñiyniykupi kallpanchawarqaku.

1960 kaq watapiqa Jehova Diospa testigonkunaqa manañam llumpay harkasqañachu karqaniku predicanaykupaq, chaymi Moldaviaman watukuq rirqani. Chaypim reqsirurqani Nina sutiyoq sipasta, paypa taytanpas chaynataq abuelonpas Testigom karqaku. Pisi tiempollamantam casarakururqaniku hinaspam paywan kutirqani Siberiaman, chaypim churiykuna nacerqa: Dina 1964 kaq watapi, Viktorñataq 1966 kaq watapi. Chaymanta iskay wata pasaytam Ucraniaman astakurqaniku. Hinaspam Yalta llaqtamanta 160 kilometro  karupi Dzhankoy sutiyoq llaqtapi taksa wasichapi tiyarqaniku.

Crimea lawpiqa manam munarqakuchu predicanaykuta, chaynam karqa enteron Unión Soviética nacionpi. Ichaqa manam llumpay ñakarichisqachu tarikurqaniku chaymi wakin Testigokunaqa manaña ñawpaqpi hinañachu Diosta serviypi kallpanchakurqaku. Siberiapim ñakariramunchikña nispankum kapuqniyoq kanankupaq llamkayta qallaykurqaku.

1991 marzo 27 punchawpim willawarqaku Unión Soviética nacionpi libre predicanaykupaq autoridadkuna leyta horqosqankumanta, kay tiempopiqa manañam kanchu chay nacionqa. Chaymi chay nacionpa llaqtankunapi iskay punchaw asamblea kananpaq chaylla alistayta qallaykurqaku. Ñoqaykum rinayku karqa Odesa llaqtaman (Ucrania), asambleaykum qallarinan karqa 24 agostota. Ichaqa huk killa ñawpaqtaraqmi rirqani estadiota limpianaykupaq yanapakuq.

Anchatam sapa punchaw llamkarqaniku, chaymi wakin tutaqa gradaskunapi puñuq kaniku. Warmikunam limpiarqaku chay estadiopa muyuriqninpi parqueta. Achkallaña basuratam huñurqaniku (yaqa 70 tonelada). Samapakuymanta encargakuqkunam asambleaman 15.000 hamuqkunapaq enteron llaqtapi sitiokunata maskarqaku samachinankupaq. Ichaqa llumpay mana allin noticiamantam yacharurqaniku.

Pichqa punchawllaña asambleaykupaq faltachkaptinmi 19 agosto punchawta Yalta llaqtapi vacacionninpi kachkaptin Mikhail Gorbachev sutiyoq presidenteta wasillanpi kananpaq presocharurqaku, payqa Unión Soviética nacionpa presidentenmi karqa. Chaywanmi asambleaykuta ruwanaykupaq permisawasqankuta negaruwarqaku. Chaymi asambleaman hamunankupaq kaqkuna telefonowan qayakamuyta qallaykurqaku, yachaytam munarqaku carrowan otaq trenwan hamunankupaq pasajenkuwan imata ruwanankupaq kasqanmanta. Hinaptinmi asamblea kananpaq tanteaqkuna tukuy sonqonkuwan achka kutikama Jehova Diosta mañakuspanku nirqaku: “Imaña kaptinpas hinalla hamuychik”, nispa.

Tukuy sonqonkuwan Diosta mañakuykuspam asamblea kananpaq hinalla tukuyta alistarqaku. Unión Soviética nacionpa tukuy lawninmanta hamuqkunata chaskiqmi iñiqmasinchikkuna rirqaku, chayamusqankuman hinam samapakunankuman aparqaku. Asamblea kananpaq encargakuqkunañataqmi sapa tempranon rirqaku autoridadkunamanta permisota mañakuq ichaqa sapa tutaykuqtam kutimuqku llakisqa.

Asambleaykupaq iskay punchawllaña faltachkaptinmi jueves 22 agostota asamblea kananpaq encargakuqkuna kusisqallaña kutiramusqaku autoridadkuna permisaykamuptin. Asambleayku qallarinanpaq takita takisqaykuman hinam sonqoykupi ancha kusisqa tarikurqaniku. Chay punchawpi asamblea tukuytam ñawpaq watakunamantaraq amistadniykuwan parlaspayku tutakama qeparqaniku. Chaypim karqaku ima sasachakuytapas aguantaspa iñiyninkupi takyaqkuna.

Chay asambleamantam 22 masnin watakunaña pasarun, chaymantaqa achkamanmi yapakuruniku. Huñunakunaykupaq Salonkunatam entero Ucrania nacionpi ruwarunku. 1991 kaq watapiqa 25.000 predicaqkunallam karqaniku, kunanñataq 150.000 predicaqkunaña.

Familiaymi kunankama yachan hina kaq wasillaykupi Dzhankoy sutiyoq llaqtapi, chay llaqtapim kunanqa kan yaqa 40.000 runakuna. 1968 kaq watapi Siberiamanta chayaptiykuqa pisillam karqa Testigokunaqa, kunanqa soqta congregacionkunañam kachkan.

Familiaypas mirarunmi. Churiykunapas, willkaykunapas chaynataq willkaykunapa wawa-churinkupas Jehova Diostam tukuy sonqoykuwan servichkaniku.