Templopi qollqe churanankuqa warmikunapa- pationpim karqa. Huk librom nin: “Patiopa muyuriqninpi qollqe churanapaq llañulla kunkayoq cobremanta 13 puyñukuna perqan lawman churasqa kasqanmanta”. (El templo: Su ministerio y servicios en tiempos de Jesucristo.)

Imapaq qollqeta churanankupaqmi chay puyñukunaqa sapakama sutiyoq karqa. Chaypim Jesus rikurqa huknin puyñuman huk viuda qollqechan churasqanta (Lucas 21:1, 2).

Punta kaq hinaspa iskay kaq puyñukunam karqa templomanta impuesto pagasqanku qollqeta churanankupaq. Kimsa kaqmanta qanchiskamañataqmi karqa palomakunamanta, kullkukunamanta, yantamanta, inciensomanta, qori vasokunamanta chaynataq ima gastokunamantapas paganankupaq. Chaymi mayqen judiopas ofrendata qonanpaq kaqkunata rantiruptin qollqen puchuptinqa chayman winaq. Pusaq kaqmanta chunka iskayniyoqkamañataqmi karqa huchallikusqankumanta, Diospaq sapaqchakusqankumanta chaynataq leprawan onqospa sanoyasqankumanta ofrenda qosqankumanta puchuq qollqekunata churanankupaq. 13 kaq puyñuñataqmi karqa sonqonkupi tanteasqankuman hina churanankupaq.

Jesuspa discipulon Lucasmi qellqarqa Bibliapi iskay librokunata: Lucas hinaspa Hechos librokunata. Imaynata qellqasqanmantam nirqa: “Qallariyninmanta sumaqta yachaykuspaymi qellqamuyki”, nispa. Ichaqa wakin yachayniyoq runakunam mana confiankuchu Lucaspa qellqasqankunapiqa (Lucas 1:3). Chaynaqa, ¿confianapaqchu kanman Lucaspa qellqasqankunaqa?

Lucasqa allintam yacharqa Filipo, Tesalonica hinaspa Efeso llaqtakunapi pikuna autoridadkuna, juezkuna kasqankumanta (Hechos 16:20, 17:6; 19:31). Yacharqataqmi Galilea lawpiqa Herodes munaychakusqanmanta, yachayniyoq Sergio Pablo islapi prefecto kasqanmanta (Hechos 13:1, 7).

Chay tiempopi ima autoridadkuna kasqanmanta qellqasqanmi qawachin confianapaq kasqanmanta, chay tiempopi autoridadkunaqa watakuna pasasqanman hinam Roma nacionpa munaychakusqan huklaw llaqtakunapiña kamachiqku. Bibliamanta Estudiaq runam nin: “Ima autoridadkuna kasqankumanta Hechos libropi qellqasqanmi qawachin allintapuni yachaykuspan qellqasqanta”. (Bruce Metzger.) Ñawpaq tiempokuna imayna kasqanmanta estudiaq runam nin: “Lucaspa qellqasqan librokunaqa allin-allinta yachaykuspa qellqasqantam qawachin”. (William Ramsay.)