¿YAQACHU kay tayta-mamakuna hina qampas sientekunki?, chayna tarikuspaykiqa ¿correginaykipaqchu tanteanki icha manachu? ¿Allinchu kanman warmakunata corregiyqa?

Bibliapi corregiymanta rimaspanqa entiendechinapaq sumaqllata rimapayaspa, yachachispa educanamantam rimachkan, manam piñakuspa maqaparuymantachu (Proverbios 4:1, 2).

Warmakunata corregiyqa huertapi wayta tarpusqanchikta cuiday hinam. Huertapi llamkaqqa tarpunanpaqmi allpata sumaqta preparan, yakuta hichan, huanota hinan, ima urukunamantapas hampin, qoran hinaspa rapichankunata otaq kallmachankunata kaptan chaynapi sumaqta wiñananpaq. Huertapi llamkaqqa plantachakuna sumaqta wiñananpaqmi imayna cuidayta yachan. Chaynallataqmi tayta-mamakunapas warmankuta imaynata yanapanankupaq kallpanchakunanku. Chaypaqmi taksachanmantapacha mana allin ruwasqankunamanta correginanku, chaynapi allinta wiñanankupaq. Huertapi llamkaqqa sumaqllatam plantakunapa llaqenta otaq kallmanta kaptan, chaynallataqmi tayta-mamapas wawa-churinta sumaqllata kuyakuywan correginanku.

Jehova Diosmi imayna corregisqanwan tayta-mamata yachachin. Diosqa serviqninkunatam allinninkupaq sumaqllata corregin, chaymi kasukuqninkunaqa corregisqa kayta munanku (Proverbios 12:1). Chaytaqa allinninkupaq kasqantam qawanku (Proverbios 4:13). Diosqa corregin 1) kuyakuywan, 2) entiendespan, 3) rimasqanta cumplispan. Corregisqaykiman hina warmaykikuna allinta wiñanankuta munaspaqa Jehova Diospa imayna corregisqanta qatipakuy.

Diosqa kuyasqankunatam kuyakuywan corregin. Chaymi Biblia nin: ‘Tayta Diosqa kuyasqan runatam corregin. Taytapas kuyasqan churintam [...] corregin’, nispa (Proverbios 3:12). Chaymantapas Jehova Diosqa llakipayakuqmi, llampu sonqom hinaspapas mana chaylla piñakuqmi (Exodo 34:6). Manataqmi pimantapas burlakunchu, manam nanay simichu nitaq hukkunapa contranpiqa rimanchu, chayna rimayqa espadapa otaq cuchillopa tuksisqan hinam (Proverbios 12:18).

Manapaschá mayqen tayta-mamapas atinqachu wawa-churinkuta pacienciakuspa Jehova Dios hina corregiytaqa. Wakinpiqa llumpay piñasqapaschá tarikunki, ichaqa chayna tarikuspaykiqa manam sumaqlla corregiytaqa atinkichu, chaynata uywaptikiqa mana kasukuqmi wiñanqaku.

Mana piñakuspalla warmaykikunata kuyakuywan corregiptikiqa allintam portakunqaku. Kay yachachikuypa qallariyninpi qawamusqanchik George hinaspa Nicole imaynata corregisqankupiyá reparasun.

“Jordan llumpay tutaña wasiykuman kutiramuptinmi ñoqaqa señoraypiwan llumpay piñasqa tarikurqaniku, ichaqa imanasqa demoramusqanmanta willawasqankutam hawkalla uyarirqaniku. Llumpay tutaña kaptinmi paqarinña rimanaykupaq tantearqaniku. Jehova Diosta mañakuykuspam puñuq pasarqaniku. Rikchariruspaykuqa hawkañam tarikurqaniku, chaymi warmaykupa sonqonman chayanaykupaq sumaqllata rimapayarqaniku. Warmaykupas reqsikurqam mana allin ruwasqanta, chaymi imayna correginaykupaq nisqaykuta uyarikurqa. Cuentatam qokururqaniku piñakusqayku hora corregiyqa mana allinpaq kasqanmanta. Imanasqa imayna portakusqanmanta puntata uyariyniykum aswan allinqa kasqa.” (George.)

“Llumpaytam piñakurqani qari waway paninta maqarusqanmanta, ichaqa chay rato correginaymantaqa rabiay pasanankamam cuartonpi kamunanpaq kamachirqani. Hawkayaruspayñam entiendechirqani maqakuq kayqa mana allinpaq kasqanta, chaynataq paninta nanachisqanmantapas. Chaynata entiendechisqaywanmi paninta nirqa pampachaykunanpaq hinaspam abrazaykurqa.” (Nicole.)

Chaynatam warmakunataqa kuyakuywan corregina, wakinpiqa chicotespapas.

Jehova Diosqa pitapas corregin ‘faltanman’ hinallam (Jeremias 30:11; 46:28). Payqa allintapunim reparan imanasqa mana allinta ruwasqankupi. ¿Imaynatam tayta-mamakuna qatipakunmanku? Stephen nin: “Natalie warmachayku llullakusqanwan hukmanyasqa tarikuspaykupas repararqanikum hayka watayoq kasqanpi chaynataq manaraq yuyayniyoq kasqanpipas”.

Nicolpa qosan Roberpas entiendespanmi churinkunata corregin. Churinkuna mana allinta portakuptinkuqa sonqonpim kaynata tapukun: “¿Mana tanteaspanchu kaynata ruwan icha costumbrachkanchu chayna portakuyman? ¿Pisipasqachu kachkan icha imanmi nanachkan? ¿Imawanpas sasachakusqankuraykuchu mana allinta portakun?”, nispa.

Allin yuyayniyoq tayta-mamaqa manam suyankuchu taksallaraq warmanku yuyayniyoq hina portakunankutaqa. Apostol Pablopas nirqam: “Taksallaraq kaspayqa warma hinam rimarqani, piensarqani, yuyaymanarqani”, nispa (1 Corintios 13:11). Robertqa nintaqmi: “Warma kaspay imakuna ruwasqayta yuyarisqaymi yanapawan pacienciakuspay warmaykunata sumaqllata correginaypaq”.

Warmaykitaqa faltanman hinalla correginaykipaqmi reparanayki hayka watayoq kasqanpi hinaspa imayna kasqanpi, chayman hina kuyakuywan sumaqllata correginaykipaq.

Jehova Diosmantam Biblia nin: “Ñoqa Tayta Diosqa haykapipas hina kaqllam kani”, nispa (Malaquias 3:6). Diosta serviqkunaqa chayna nisqanpi confiaspam hawkalla tarikunku. Warmakunapas manam iskayrayankuchu tayta-maman rimasqanman hina cumpliptinkuqa. Ichaqa piñasqa otaq hawkalla kasqankuman hina rimasqankuta mana cumpliptinkuqa warmakunam hukmanyanku.

Jesusmi nirqa Arí otaq Manam nisqanchikman hina ruwanapaq kasqanta. Chayna nisqanwanqa yanapachikunmankum warmankuta imayna uywasqankupi (Mateo 5:37). Mana cumplinaykipaq kaqkunataqa ama niychu. Warmayki mana allinta portakuptin imaynata correginaykipaq nisqaykiman hina ruway.

Warmaykichikta imaynata correginaykichikpaq parlaychik. Robertmi nin: “Wakin kutipiqa warmaykunam niwaq imapaqpas permisanaypaq, chaymi permisaq kani. Ichaqa manam niwaqkuchu permisananpaq mamanta niptinku mana munasqanmantaqa. Ichaqa señoraypa ima nisqanta kasukunankupaqmi kallpanchani”. Tayta-mamaqa imapipas mana acuerdopi kaspaqa sapallankupim parlananku.

Jehova Diosta qatipakuspa warmaykichikta kuyakuywan, entiendespa chaynataq rimasqaykichikta cumplispa corregiptikichikqa allinninpaqmi kanqa. Chaynata yanapaptikichikqa yuyayniyoq kaspanmi cumpliq hinaspa imapipas controlakuq kanqa. Chaymi Biblia nin: “Imaynam kawsananpaqyá yachachiy warmataqa. Yuyaqña kaspapas manam pantanqachu payqa”, nispa (Proverbios 22:6).