1 Samuel 4:1-22
4 Samuelpa nisqanqa llapa Israel llaqtamanmi chayarqan.
Chay tiempopin Israel runakunaqa Filistea runakunawan maqanakuq lloqsirqanku. Israel runakunan Ebenézer nisqaq ladonpi karpakurqanku, Filistea runakunataq Afec llaqtapi karpakurqanku.
2 Chaymantataq Filistea runakunaqa Israel runakunawan maqanakunankupaq listo kasharqanku. Israel runakunapaqqa sasan chay guerraqa karqan, chaymi Filistea runakunaqa paykunata atiparqan. Tawa waranqa Israel runakunatan Filistea runakunaqa wañuchirqanku.
3 Soldadokuna karpakusqankuman kutimuqtinkutaq Israelpi umalliqkunaqa* ninakurqanku: “¿Imaraykutaq Jehová Diosri mana yanapawarqanchischu?+ Jaku Siló llaqtamanta Jehová Diospa rimanakuynin arcata apamusun+ enemigonchismanta librawananchispaq”, nispa.
4 Jinan Siló llaqtaman runakunata kacharqanku. Paykunan querubín angelkuna+ patapi* kaq tronopi tiyaq Diospa rimanakuynin arcata, ejercitokunata kamachiq Jehová Diospa rimanakuynin arcata apamurqanku. Elipa churinkuna Ofnipas Finehaspas+ Diospa rimanakuynin arcawan kuskan rirqanku.
5 Israel runakunaq karpakusqanman Jehová Diospa rimanakuynin arca chayaqtin jinan Israel runakunaqa fuerteta qaparirqanku, pamparaqmi kuyurirqan.
6 Chayta uyarispan Filistea runakunaqa ninakurqanku: “¿Imaraykutaq hebreo runakunari chhaynataraq qaparimushanku?”, nispa. Jehová Diospa rimanakuynin arcata apamusqankuta yacharuspataq
7 Filistea runakunaqa sinchita mancharikurqanku. Chaymi nirqanku: “¡Diosmi Israel runakunaq karpakusqankupi kashan!”,+ nispa. Nillarqankutaqmi: “¡Achachau! ¡Imaraqchá pasawasun! ¡Manamá riki kayqa jayk’aqpas pasarqanchu!
8 ¡Wañusunchá kunanqa! ¡Pitaq khayna atiyniyoq manchana Diosmantari librawasun! Kay Diosmá riki Egipto runakunatapas castigaspa ch’inneqpi lliuta wañuchirqan.+
9 Ichaqa Filistea runakuna, ¡ama manchakuychischu! ¡Qhari jina sayaychis! Mana chayqa hebreo runakunatan servinkichis imaynan paykuna servishawanchis jinata.+ Chhaynaqa, ¡qhari jina maqanakuychis!”, nispa.
10 Jinan Filistea runakunaqa maqanakuypi Israel runakunata atiparqanku,+ chaymi Israel runakunaqa sapankanku wasinkuman ayqekurqanku. Chay kutipiqa askha runakunan wañurqanku. Israel runakunaqa kinsa chunka waranqa runakunan wañurqanku.
11 Chaymantapas Filistea runakunan apapurqanku Diospa rimanakuynin arcata. Elipa churinkuna Ofniwan Finehaswanqa iskayninkun wañupurqanku.+
12 Benjamín ayllumanta juj runan guerramanta ayqekurqan, jinaspa chay p’unchayllapi Siló llaqtaman chayarqan p’achanpas llik’i-llik’illaña, umanpas jallp’akamallaña.+
13 Chay runa llaqtaman chayananpaqqa ñan patapin Eliqa juj sillapi tiyasharqan, payqa sinchi llakisqan Diospa rimanakuynin arcata qhawapakusharqan.+ Chay runa llaqtaman jaykuspa imachus pasasqanta willaqtintaq runakunaqa qaparirqanku.
14 Chayta uyarispan Eliqa nirqan: “¿Imaraykutaq chhaynataraqri qaparimushanku?”, nispa. Jinan chay runaqa phawarqan imachus pasasqanta Eliman willaq.
15 (Chay tiempopaqqa isqon chunka pusaqniyoq watanpin Eliqa kasharqan, ñawinqa ñaupaqllatan rectota qhawaq, ichaqa manan imatapas rikuqchu).+
16 Chay runan Elita nirqan: “¡Guerramantan ayqekamushani, kunallanmi chayaramuni!”, nispa. Jinan Eliqa tapurqan: “¿Iman pasarun wawalláy?”, nispa.
17 Chay runataq nirqan: “Filistea runakunan llaqtanchista atiparapun, chaymi Israel runakunaqa ayqerikapunku.+ Churiyki Ofnipas Finehaspas iskayninkun wañupunku,+ Diospa rimanakuynin arcatapas Filistea runakunan aparikapunku”,+ nispa.
18 Chay runa Diospa rimanakuynin arcamanta rimaruqtin jinan Eliqa punku cercapi qhepanpamanta pampaman wijch’ukurqan. Chaypin kunkanta p’akikurqan, jinaspa wañupurqan. Payqa machuchañan karqan, cuerponpas nishutan llasaq. Sacerdote Eliqa tawa chunka watan Israel llaqtata juzgarqan.
19 Elipa qhachunin Finehaspa esposanqa onqoqmi kasharqan, ñataqmi onqokapunan tiempopas chayamusharqanña. Chaymi payqa Diospa rimanakuynin arcata apasqankuta yacharuspa, qosanpas suegronpas wañupusqanta yacharuspa nanaywan jap’ichikurqan, sinchitapunin nanachikurqan, chhaynapin onqokapurqan.
20 Payqa wañupusharqanñan, chayta reparaspan ladonpi kaq warmikunaqa nirqanku: “Ama manchakuychu, wawaykiqa qharichan kasqa”, nispa. Paymi ichaqa mana rimarirqanchu nitaq kasurqanpaschu.
21 Jinan wawanta suticharqan Icaboj*+ nispa. Paymi nirqan: “Israelmantan atiy chinkapun”,+ nispa. Chaytan payqa nirqan Diospa rimanakuynin arcata apapusqankurayku, qosanpas suegronpas wañupusqanrayku.+
22 Nillarqantaqmi: “Diospa rimanakuynin arcata apapusqankuraykun Israelpa qhapaq kaynin karu llaqtaman apasqa kapun”,+ nispa.
Uraypi willakuykuna
^ Chaypiqa “kuraq runakunaqa” nillanmantaqmi.
^ Chaypiqa yaqapaschá “chaupipi” nillanmantaq.
^ Icaboj sutiqa “¿maypin atiy kashan?” ninantan nin.
