Eclesiastés 4:1-16
4 Astawanmi imachus rikusqaypi piensarqani, jinaspa kay pachapi imaymana ñak’ariykunapi* yuyaymanarqani. Millay runakunan jujkunata khuyayta waqachirqan, manan pipas yanapaqninku karqanchu.+ Chay waqachiqkunaqa atiyniyoqmi karqanku, manan pipas waqaqkunata sonqochaq karqanchu.
2 Jinan noqaqa kusikurqani wañusqakunapi piensaspay. Wañusqa kaymi aswan allin kausashallaymantaqa.+
3 Paykunamanta aswan allinqa kashanku manaraq nacemuqkunan,+ kay pachapi imaymana ñak’ariy kasqanta manaraq rikuqkunan.+
4 Kaytan rikullarqanitaq: Runakunaq envidianakusqan jawan imaymana llank’aykuna* ruwaykunapas paqarimun.+ Chaypas yanqan, wayrata qatikachay jinan.
5 Mana yuyayniyoq runaqa makinta oqllaykuspan llakhi kan, chaywanmi payllataq mana allinta ruwakun.+
6 Aswan allinqa juj jaft’ay* samariymi iskay jaft’ay sinchi llank’aymantaqa. Chayqa wayrata qatikachay jinan.+
7 Kay pachapin juj yanqa ruwayta rikullarqanitaq:
8 Juj runan kan mana piniyoq sapallan, manan churinpas ni wayqenpas kanchu, payqa mana samaspan llank’an, ñawinpas manan llapa ima tarisqanwanpas contentakunchu.+ Payqa manapaschá tapurikullanpaschu: “¿Pipaqtaq noqari khaynaniraqta llank’ashani? ¿Imaraykutaq allin kaqkunawanpas mana kusirikunichu?”,+ nispallapas. Chaypas yanqan, uma nanaymi.+
9 Juj runallamantaqa iskaymi aswan allinqa,+ iskayninkuqa aswan allintan llank’asqankumantapas chaskinqaku.
10 Jujninchus urmanqa chayqa jujninmi aysarinqa. Ichaqa, ¿pin aysarinman sapallan kaqtin?
11 Chaymantapas iskaychus puñunqaku chayqa q’oñichinakunqakun. Ichaqa, ¿imaynatan jujlla q’oñirinman?
12 Sapallan puriqqa atipachikunmanmi, iskaymi ichaqa maqaqninkuta atipanqaku. Kinsanpasqa* waskhaqa manan ratullaqa p’itikunmanchu.*
13 Aswan allinqa allin yuyayniyoq wajcha* wawan mana yuyayniyoq machu reymantaqa,+ payqa mana yuyayniyoq kayninpin manaña yuyaychasqatapas uyarikunchu.+
14 Payqa* juj rey kamachikushaqtin wajchaña nacerqan chaypas,+ rey kananpaqmi carcelmanta lloqsimurqan.+
15 Kay pachapi kausaq runakunapin, wichayman urayman puriqkunapin piensarqani; piensallarqanitaqmi jujpa rantinpi jaykuq wayna reywan imachus pasan chaypipas.
16 Payta yanapaq runakuna askhaña kankuman chaypas, qhepaman jamuqkunaqa manan kusisqachu paywan kanqaku.+ Chaypas yanqan, wayrata qatikachay jinan.
Uraypi willakuykuna
^ Chaypiqa “ñak’arichiykunapi” otaq “sarunchaykunapi” nillanmantaqmi.
^ Chaypiqa “may sasa llank’aykuna” nillanmantaqmi.
^ Jaft’aytaqa “jach’i” nillankutaqmi.
^ Chaypiqa “Kinsa pata” nillanmantaqmi.
^ P’itiytaqa “t’ipiy” nillankutaqmi.
^ Wajchataqa “pobre” nillankutaqmi.
^ Chaypiqa yaqapaschá allin yuyayniyoq wajcha wawamanta rimashan.
