Isaías 40:1-31
40 Diosniykichismi nin: “Llaqtayta sonqochaychis, llaqtayta kallpachaychis.+
2 Jerusalenta sumaqta rimapayaychis,sonqoman chayaq simikunawan rimapayaychis.
Juchanmanta paganan tiempoqa ñan tukupunña,juchanqa ñan pagasqaña kapun.+
Jehová Diosqa ñan llapantaña pagachin”,+ nispa.
3 Ch’in ladomantan juj kunka wajakamushan:
“¡Jehová Diospa ñanninta allichaychis!+
Ch’in pampapi+ Diosninchispaq ñanta ruwapuychis.+
4 Llapa wayq’okuna junt’achisqa kachun,llapa orqokuna pampachasqa kachun,llapa moqokunapas llaqllasqa kachun.
Rumi-rumi kaqkuna allichasqa kachun,pata-pata kaqkuna pampayachisqa kachun.+
5 Jehová Diospa ancha jatun kayninmi rijurimunqa,+llapa runakunan chayta rikunqaku,+Jehová Dios kikinmi chayta nin”, nispa.
6 ¡Uyariy! Pichá nimushan: “¡Wajakamuy!”, nispa.
Juj kaqtaq tapukamushan: “¿Imanispataq wajakamusaqri?”, nispa.
“Llapa runakunaqa q’omer qora jinallan,munakuyninkupas* campopi t’ika jinallan.+
7 Q’omer qoraqa ch’akipullanmi,campopi t’ikapas naq’epullanmi,+Jehová Diospa samayninwanmi chaykunaqa ch’akipun.+
Runakunaqa q’omer qora jinallan kanku.
8 Q’omer qoraqa ch’akipunmi,campopi t’ikapas naq’epunmi,Diosninchispa rimasqankunan ichaqa wiñaypaq”.+
9 Sionpaq allin willakuykunata apamuq+ warmi, jatun orqoman seqay.
Jerusalenpaq allin willakuykunata apamuq warmi, kallpawan wajakuy;ama manchakuspa qapariy.
Judapi kaq llaqtakunata niy:
“Diosniykichisqa kaypin kashan”,+ nispa.
10 Tukuy munayniyoq Señorqa, Jehová Diosqa atiywanmi jamunqa,paña makinwanmi* payqa kamachikunqa.+
Payqa premio apaykusqan jamushan,pagota qonan aysarisqan jamushan.+
11 Michiq jinan ovejankunata sumaqta michinqa.+
Malta ovejakunatan sumaqta juñunqa,uñakunatan marq’ayninpi apanqa,uñayoq ovejakunatapas munayllatan purichinqa.+
12 ¿Pillapas lamar-qocha unuta makin qochapi* medirqanchu?+
¿Pillapas cielota makinwan cuartarqanchu?
¿Pillapas kay pacha polvota juj p’ukupi juñurqanchu?+
¿Pillapas orqokunata balanzapi pesarqanchu?
¿Pillapas moqokunata romanawan pesarqanchu?
13 ¿Pin may jatunchus Jehová Diospa atiynin chayta yachanman?
¿Pin payta yuyaychanman?
¿Pin payman imatapas yachachinman?+
14 ¿Pitan pay imatapas tapukurqan?
¿Pin payman chanin kaq ñanta reqsichirqan?
¿Pin payman yachayta qorqan?
¿Pin payman yachay ñanta reqsichirqan?+
15 Paypaqqa nacionkunaqa baldepi unu sut’uy jinallan,balanzapi tiyaykuq polvo jinallan.+
Paymi qochapi islakunata ñut’u jallp’ata jina oqarin.
16 Líbano orqontin sach’ataña wit’ukunman altar ninapaq chaypas,llapa salqa animalkunataña ñak’akunman ruphachina ofrendapaq chaypas,pisiraqmi chaykunapas kanman.
17 Paypaqqa nacionkunaqa manan imapaschu,+paypa ñaupanpiqa manapas kankumanchu jinan.+
18 ¿Piwanmi qankuna Diosta igualachiwaqchis?+
¿Imaman rijch’akuqmi pay qankunapaq kanman?+
19 Artesano runan metalmanta idolota ruwan,qolqe takaqtaq chayta qoriwan forran,+jinaspa qolqe cadenakunata chaypaq ruwan.
20 Payqa juj sach’atan ajllan ofrendapaq,+mana ismuq sach’atan ajllakun.
Jinaspa allin thupaq runata maskhan,paywanmi allin sayaq idolota ruwachin.+
21 ¿Manachu qankuna chayta yachankichis?
¿Manachu jayk’aqpas chayta uyarirqankichis?
¿Manachu pipas qallariypi chayta willarqasunkichis?
¿Manachu yacharqankichis kay pachaq cimentacionninkuna churakusqanmantapacha chaykuna kasqanta?+
22 Diosqa kay muyu* pachaq altonpin tiyan,+paypaqqa kay pachapi tiyaqkunaqa t’isku-t’isku* jinallan.
Paymi cielota llaflla* telata jina aysarin,tiyanapaq toldota jinan mast’arin.+
23 Payqa autoridadkunatapas mana valeqmanmi tukuchin,juezkunatapas* manapas kankumanchu jinamanmi tukuchin.
24 Plantasqa kaqtinku jinan,tarpusqa kaqtinku jinan,saphichakushaqtinku jinan,juj phukuyllapi ch’akipunku,chaymantataq wayra apapun.+
25 Ch’uya Diosmi nin:
“¿Piwanmi igualachiwankichisman?
¿Pin noqa jina kanman?
26 Cielota qhawariychis, ñawiykichista allinta kichariychis.
¿Pin chaypi kaqkunata kamarqan?+
Ch’askakunata ejercitota jina lloqsichimuqmi,sapankata yupaspa lloqsichimuqmi,sapankata sutinmantakama wajaqmi.+
Paypa manchay atiyninqa mana tukukuqmi, kallpanqa may admiranapaqmi,+chaymi llapan ch’askakunapas maypichus kanankupi kashanku.
27 Jacob, Israel, ¿imaraykun ninki:
Jehová Diosqa manan ima ruwasqaytapas reparanchu,Diosqa manan justiciata ruwapuwanchu,+ nispa?
28 ¿Manachu yachanki? ¿Manachu uyarirqanki?
Jehová Diosqa kay pachata juj k’uchunmanta juj k’uchunkamaraq kamaqmi,payqa wiñay-wiñaypaq Diosmi.+
Manan jayk’aqpas sayk’unchu, manan jayk’aqpas kallpanqa pisiyanchu.+
Yachayninqa mana aypay atiymi.+
29 Payqa sayk’usqakunatan kallpachan,mana kallpayoqkunamanmi atiyta qon.+
30 Erqekunapas sayk’unkun, pisipankun.
waynakunapas misk’akunkun, urmankun,
31 Jehová Diospi suyakuqkunan ichaqa kallpata jap’inqaku.
Anka jinaraqmi altota phalanqaku.+
Phawaspapas manan pisipanqakuchu,purispapas manan sayk’unqakuchu”,+ nispa.
Uraypi willakuykuna
^ Chaypiqa “mana tukukuq munakuyninkupas” nillanmantaqmi. Qhaway Explicasqa simikuna nisqapi “Mana tukukuq munakuy” nisqata.
^ Hebreo rimaypiqa “brazonwanmi” ninmi.
^ Maki qochataqa “maki p’ujtu” nillankutaqmi.
^ Llafllataqa “llafsa, ch’illpa” nillankutaqmi.
^ T’isku-t’iskutaqa “ch’illiku, ch’illkito” nillankutaqmi.
^ Chaypiqa “rump’u” nillanmantaqmi.
^ Chaypiqa “kamachikuqkunatapas” nillanmantaqmi.
