Hebreos 10:1-39
-
Animalkunata sacrificiopi jayway manaña valepusqanmanta (1-4)
-
Kamachikuy simiqa qhepaman chayamunan kaqkunaq llanthullanmi (1)
-
-
Cristoqa jujpaqkama juj sacrificiollata jaywasqanmanta (5-18)
-
Kausayman apaq mosoq ñanmanta (19-25)
-
Amapuni juñunakuykunataqa saqesunchu (24, 25)
-
-
Ama yuyaypi juchallikunamanta (26-31)
-
Aguantanapaq allin iñiyniyoq mana pisipaq ima kanamanta (32-39)
10 Kamachikuy simiqa imakunachus qhepaman jamunan karqan chay allin kaqkunaq+ llanthullanmi karqan,+ manan chay allin kaqkunachu; chaymi watan-watan sacrificiokuna jaywakusqanqa mana atinmanchu Diosman qayllaykuqkunata mana juchayoqman tukuchiytaqa.+
2 Ichaqa sacrificio ruwaychus Diosta serviqkunata ch’uyaman tukuchinman karqan chayqa, manañachá necesitakunmanchu karqan ima sacrificiotapas, concienciankupas manañachá paykunataqa imamantapas juchachanmanchu karqan.
3 Ichaqa manan chhaynachu karqan, aswanmi chay sacrificiokunaqa watan-watan paykunata yuyarichirqan juchasapa kasqankuta.+
4 Chaymantapas torokunaq cabrakunaq yawarninqa manan atinmanchu juchakuna chinkachiytaqa.
5 Chaymi payqa kay pachaman jamuspa nirqan: “Manan sacrificiotapas ni ofrendatapas munarqankichu, aswanmi qanqa juj cuerpota ruwapuwarqanki.
6 Qanqa manan allinpaqchu qhawarirqanki ruphachina ofrendakunatapas ni jucha pampachay ofrendakunatapas.+
7 Jinan nirqani: Diosníy, noqaqa munayniykita ruwaqmi jamushani,+ qelqa k’uyupin noqamanta qelqasqa kashan, nispay”, nispa.
8 Rikusqanchis jina, ñaupaqtan payqa nirqan: “Manan munarqankichu ni allinpaqpaschu qhawarirqanki sacrificiokunatapas, ofrendakunatapas, ni ruphachina ofrendakunatapas, nitaq jucha pampachay ofrendakunatapas”, nispa. Chay sacrificiokunaqa kamachikuy simiq nisqanman jinan karqan.
9 Chay qhepamantaq nirqan: “Noqaqa munayniykita ruwaqmi jamushani”,+ nispa. Paymi ñaupaq kaqta chinkachipurqan, jinaspa mosoq kaqta rijurichimurqan.
10 Diospa chay munayninman jinan+ noqanchisqa Jesucristoq cuerpon juj kutillata ofrendapi jaywasqa kasqanwan ch’uyanchasqa karqanchis.+
11 Sacerdotekunaqa sapa p’unchaymi maypichus llank’anankuman riqku Diospaq llank’anankuwan junt’aq,+ kaq sacrificiokunallata sapa ratu jaywaq ima;+ ichaqa manan chay sacrificiokunaqa jujpaqkamachu juchataqa chinkachiq.+
12 Criston ichaqa juchata chinkachinanpaq juj sacrificiollata wiñaypaq jaywarqan, chaymantataq Diospa paña ladonpi tiyaykurqan.+
13 Chaymantapachan payqa suyashan enemigonkuna chaki sarunanman churasqa kananta.+
14 Juj sacrificiollawanmi payqa wiñaypaq mana juchayoqman tukuchipurqan+ pikunachus ch’uyanchasqa kanku chaykunata.
15 Chayqa chhaynapuni kasqanmanta willaspan santo espiritupas nin:
16 “Chay p’unchaykuna qhepamanmi paykunawan kayta rimanakusaq; kamachikuyniytan paykunaq yuyayninkuman churasaq, sonqonkupin qelqasaq,+ ninmi Jehová* Diosqa”, nispa.
17 Nillantaqmi: “Manañan jayk’aqpas juchankutaqa yuyarisaqñachu ni mana allin ruwasqankutapas”,*+ nispa.
18 Chay juchakuna perdonasqa kaqtinqa, manañan necesitakunmanchu juchamanta ima ofrendatapas.
19 Chhaynaqa, wayqeykuna,* Jesuspa yawarninraykun mana manchakuspa purinanchis ch’uyay-ch’uya parteman jaykuq punkunta.+
20 Chay ñanqa wiñay kausayman apaq mosoq ñanmi, chaytan payqa kichapuwarqanchis* cortina ukhunta pasaspa,+ chay cortinaqa paypa cuerponmi.
21 Chaymantapas payqa Diospa wasinmanta encargasqa ancha allin sacerdotenchismi.+
22 Chayrayku, ñataq sonqonchispas conciencianchispas mana allinmanta ch’uyanchasqaña* kashan chayqa,+ cuerponchispas limpio unuwan maqchisqañataq kashan chayqa,+ tukuy sonqowan junt’asqa iñiywan ima Diosman qayllaykusun.
23 Ama iskayaspa lliuman willashallasun suyakuyninchismanta,+ pichus prometewaqninchisqa rimasqanta junt’aqmi.
24 Chaymantapas, jujkuna-jujkunawan allintapuni reqsinakusun, chhaynapin kallpachanakusunchis astawan munanakunanchispaq ancha allin ruwaykunatapas ruwananchispaqwan.+
25 Amapuni juñunakuyninchiskunatapas saqesunchu+ imaynan wakinkuna saqeshanku jinataqa, aswanpas astawanraq kallpachanakushasun;+ Diospa p’unchayninpas cercapiñataq kashan chayqa+ astawanyá chaykunata ruwashasun.
26 Cheqaq kaqta allinta yachashaspachus+ yuyaypi juchata ruwasunman chayqa, manañan perdonasqachu kasunman, chhayna juchapaq mana ima sacrificiopas kasqanrayku.+
27 Aswanmi manchay juiciota, raurashaq phiñakuyta imallaña suyana kanman, chay phiñakuymi Diospa contranpi kaqkunataqa ch’usaqyachipunqa.+
28 Pipas Moisespa chaskisqan kamachikuykunata mana kasukuqtaqa iskay otaq kinsa testigoq willakusqanwanmi+ mana khuyapayaspa wañuchiqku.
29 Chhaynaqa, pipas Diospa Churinta sarunchaqqa, ima yawarwanchus ch’uyanchasqa karqan chay rimanakuy yawartapas pisi valorniyoqpaq qhawariqqa,+ Diospa ancha sumaq sonqo kayninta rikuchiq espiritutapas pisichaqqa,+ aswan castigasqachá kanqa riki.
30 ¿Manachu Diosqa nirqan: “Noqamanmi tupawan vengakuyqa, noqañan kutichipusaq”, nispa? Chaymantapas simin qelqapin nishan: “Jehová* Diosmi llaqtanta juzganqa”,+ nispa.
31 Sinchi manchakuymi kanman kausaq Diospa makinman chayayqa.
32 Amayá qonqankichischu k’anchayta rikusqaykichis qhepaman+ sinchi ñak’ariypiña kashaspapas imaynatachus tukuy imatapas aguantarqankichis chaytaqa.
33 Mayninpin riki qankunaqa lliupa qayllanpi k’amisqa ñak’arichisqa ima kaq kankichis, mayninpitaq chhaynapi tarikushaqkunaq ñak’ariqmasinkuna kaq kankichis.
34 Chaymantapas qankunaqa khuyapayaqmi kankichis riki carcelpi kaqkunatapas, kaqniykichiskunataña qechurqasunkiku chaypas, kusisqallan riki kasharqankichis;+ qhepaman imakunatachus chaskinkichis chaykunaqa aswan allin kasqanta, mana tukukuq kasqanta+ yachaspachá chaytaqa ruwarqankichis.
35 Chhaynaqa, ama manchakuspa rimashallaychis, chayta ruwankichis chayqa, ancha allin premiotan chaskinkichis.+
36 Diospa promesanta chaskinaykichispaqqa aguantaqpunin kanaykichis,+ ñaupaqtan ichaqa paypa munaynintaraq ruwanaykichis.
37 “Juj chhikantawan” suyasunchis,+ “pichus jamushan chayqa tiempollanpipunin chayamunqa”.+
38 “Chanin runan ichaqa iñisqanrayku kausanqa”,+ “ichaqa qhepamanchus kutipunqa chayqa, manan paytaqa sumaqtachu qhawarisaq”.+
39 Noqanchisqa manan qhepaman kutipuspa wañuyman rishaq t’aqamantachu kanchis,+ aswanpas iñispa kausayta tariqkuna t’aqamantan kanchis.
Uraypi willakuykuna
^ Qhaway “Astawan yachanapaq A5” nisqata.
^ Griego rimaypiqa “leypa contranpi ruwasqankutapas” nillanmantaqmi.
^ Mayninpiqa warmipaq qharipaqwanmi Bibliapiqa “wayqeykuna” nispa nin.
^ Griego rimaypiqa “inaugurapuwarqanchis” ninmi.
^ Griego rimaypiqa “ch’aqchusqaña” ninmi. Chaypiqa Jesuspa yawarninwan ch’aqchusqamantan rimashan.
^ Qhaway “Astawan yachanapaq A5” nisqata.
